Sofari anena: Hatia ya Ayubu yastahili adhabu

¹Ndipo Sofari Mnaamathi akajibu, na kusema,

²Je! Huu wingi wa maneno usijibiwe?

Na mtu aliyejaa maneno, je! Ahesabiwe kuwa na haki?

³Je! Majivuno yako yawanyamazishe watu wawe kimya?

Nawe hapo ufanyapo dhihaka, je! Hapana mtu atakayekutahayarisha?

⁴Kwa kuwa wewe wasema, Mafunzo yangu ni safi,[#Ayu 6:10; 1 Pet 3:15]

Nami ni safi machoni pako.

⁵Lakini, laiti Mungu angenena,

Na kuifunua midomo yake juu yako;

⁶Tena akuonyeshe hizo siri za hekima,[#Omb 3:22]

Ya kuwa hufanikiwa katika kuyatimiza makusudi yake!

Ujue basi ya kuwa Mungu akuachilia katika uovu wako.

⁷Je! Wewe waweza kuuvumbua ukuu wa Mungu?[#Ayu 5:9; Mhu 3:11; Isa 40:28; Mt 11:27; Rum 11:33; Efe 3:8]

Waweza kuufikia upeo wa huyo Mwenyezi?

⁸Ni juu mno kama mbingu; waweza kufanya nini wewe?

Ni wenye kina kuliko kuzimuni; waweza kujua nini wewe?

⁹Cheo chake ni kirefu kuliko dunia,

Ni kipana zaidi ya bahari.

¹⁰Yeye akipita, na kufunga watu,

Na kuwaita hukumuni, ni nani basi awezaye kumzuia?

¹¹Kwa kuwa yeye awajua watu baradhuli;[#Zab 10:11]

Anapouona uovu, je; hatauangalia?

¹²Lakini mpumbavu aweza kupata ufahamu,

Ingawa mwanadamu huzaliwa kama mtoto wa punda mwitu.

¹³Wewe ukiuweka moyo wako kwa uelekevu,[#1 Sam 7:3; Zab 78:8; 143:6]

Na kumnyoshea mikono yako;

¹⁴Ikiwa una uovu mkononi mwako, uweke mbali nawe,

Wala usikubali upuzi kukaa hemani mwako;

¹⁵Hakika ndipo utakapopata kuinua uso pasipo ila;[#Mwa 4:5; Ayu 22:26; Zab 119:6; 1 Tim 2:8; 1 Yoh 3:21]

Naam, utathibitika, wala hutakuwa na hofu;

¹⁶Kwa kuwa utasahau mateso yako;

Utayakumbuka kama maji yaliyokwisha pita;

¹⁷Na maisha yako yatakuwa meupe kuliko adhuhuri;

Giza lake litakuwa kama alfajiri.

¹⁸Nawe utakuwa salama, kwa sababu kuna matumaini;

Naam, utatafutatafuta kando yako, na kupumzika salama.

¹⁹Tena utalala, wala hapana atakayekutia hofu;

Naam, wengi watakutafuta uso wako.

²⁰Lakini macho ya waovu yataingia kiwi,

Nao hawatakuwa na njia ya kukimbilia,

Na matumaini yao yatakuwa ni kutoa roho.