Ayubu ajibu: Malalamiko yangu ni machungu

¹Ndipo Ayubu akajibu, na kusema,

²Hata leo malalamiko yangu yana uchungu;

Pigo langu ni zito zaidi ya kuugua kwangu.

³Laiti ningejua mahali niwezapo kumwona,

Nifike hata hapo anapokaa!

⁴Ningeiweka kesi yangu mbele yake,

Na kukijaza kinywa changu hoja.

⁵Ningeyajua maneno atakayonijibu,

Na kuelewa hayo atakayoniambia.

⁶Je! Angeshindana nami kwa ukuu wa uwezo wake?[#Ayu 9:19; Isa 27:4]

La, lakini angenisikiliza.

⁷Hapo wanyofu wangepata kuhojiana naye;

Basi hivyo ningeachiliwa na mwamuzi wangu milele.

⁸Tazama, naenda mbele, wala hayuko;[#Zab 10:1; 1 Tim 6:16]

Narudi nyuma, lakini siwezi kumwona;

⁹Na mkono wa kushoto, afanyapo kazi, lakini siwezi kumwona;

Hujificha upande wa kulia, hata nisimwone.

¹⁰Lakini yeye aijua njia niendeayo;[#Zab 17:3; Yak 1:12]

Akisha kunijaribu, nitatoka kama dhahabu.

¹¹Mguu wangu umeshikamana sana na hatua zake;[#Zab 44:18]

Njia yake nimeishika, wala sikukengeuka.

¹²Sikurudi nyuma kuiacha amri ya midomo yake;

Nimeyatunza maneno ya kinywa chake zaidi ya riziki yangu,

¹³Lakini yeye ni mmoja, ni nani awezaye kumgeuza?[#Ayu 34:29; Mhu 3:14; Rum 9:19; Yak 1:17]

Tena nafsi yake ilitakalo, ndilo afanyalo.

¹⁴Kwani yeye hulitimiliza hilo nililoamriwa;[#1 The 3:3]

Tena mambo mengi kama hayo ya pamoja naye.

¹⁵Kwa hiyo naona taabu mbele ya uso wake;[#Zab 119:120]

Nitakapofikiri, namwogopa.

¹⁶Kwa maana Mungu ameufanya moyo wangu kuzimia,

Naye Mwenyezi amenitaabisha;

¹⁷Maana sikufadhaishwa kwa sababu ya giza,[#Ayu 6:9]

Wala kwa sababu giza kuu limenifunika uso.