Elihu asifia wema wa Mungu

¹Tena Elihu akaendelea na kusema,

²Ningojee kidogo nami nitakueleza;

Kwa kuwa ningali na maneno kwa ajili ya Mungu.

³Nitayaleta maarifa yangu kutoka mbali,

Nami nitampa haki Muumba wangu.

⁴Maana hakika maneno yangu si ya uongo;

Aliyekamilika katika maarifa yu pamoja nawe.

⁵Tazama, Mungu ni hodari, wala hamdharau mtu yeyote;

Ana uweza katika nguvu za fahamu.

⁶Hauhifadhi uhai wa waovu;

Lakini huwapa wateswao haki yao.

⁷Yeye hawaondolei macho yake wenye haki;[#Zab 113:8]

Lakini pamoja na wafalme huwaweka

Katika viti vya enzi milele, nao hutukuzwa.

⁸Nao wakifungwa kwa pingu,[#Zab 107:10]

Wakitwaliwa kwa kamba za mateso;

⁹Ndipo huwaonesha matendo yao,

Na makosa yao, ya kuwa wametenda kwa kujivuna.

¹⁰Yeye huyafunua masikio yao, wasikie maonyo,

Na kuwaagiza warudi kuuacha uovu.

¹¹Kama wakisikia na kumtumikia,[#Ayu 11:13-19; Isa 1:19; 1 Tim 4:8; Yak 5:5]

Watapisha siku zao katika kufanikiwa,

Na miaka yao katika furaha.

¹²Lakini wasiposikia, wataangamia kwa upanga,

Nao watakufa pasipo maarifa.

¹³Lakini hao wasiomcha Mungu mioyoni hujiwekea hasira

Hawalilii msaada hapo awafungapo.

¹⁴Wao hufa wakingali vijana,

Na uhai wao huangamia katikati ya wachafu.

¹⁵Yeye humponya aliyetaabika kwa njia ya taabu yake,

Na kuyafunua masikio yao kwa maonevu.

¹⁶Naam, yeye angekuongoza utoke katika msiba

Hata mahali penye nafasi, ambapo hapana kizuizi;

Na kilichowekwa mezani pako kingejaa mafuta.

¹⁷Lakini umejaa hukumu ya waovu;

Hukumu na haki hukushika.

¹⁸Basi ujitunze, isije hasira ikakuvuta hata ukafanya mzaha;

Wala usikubali ukuu wa ukombozi ukugeuze.

¹⁹Je! Mali yako itatosha, hata usiwe katika taabu,

Au uwezo wote wa nguvu zako?

²⁰Usiutamani usiku,

Wakati watu wakatwapo katika mahali pao.

²¹Jitunze, usiutazame uovu;[#Ebr 11:25]

Kwani umeuchagua huo zaidi ya taabu.

²²Tazama, Mungu hutenda makuu kwa uweza wake;[#Isa 40:13; Rum 11:34; 1 Kor 2:16]

Ni nani afundishaye kama yeye?

²³Ni nani aliyemwagiza njia yake?[#Kum 32:4]

Au ni nani awezaye kusema, Wewe umetenda yasiyo haki?

Elihu atangaza ukuu wa Mungu

²⁴Kumbuka kuitukuza kazi yake,[#Zab 33:4; Dan 4:37; Yer 9:24; 1 Kor 1:31; 2 Kor 10:17; Ufu 15:3]

Watu waliyoiimbia.

²⁵Wanadamu wote wameitazama;[#Rum 1:19]

Watu huiangalia kwa mbali.

²⁶Tazama, Mungu ni mkuu, nasi hatumjui;[#1 Kor 13:12; Zab 90:2; Ebr 1:12]

Hesabu ya miaka yake haichunguziki.

²⁷Maana yeye huvuta juu matone ya maji,

Yamwagikayo katika mvua kutoka ukungu wake;

²⁸Ambayo mawingu yainyesha

Na kudondoza juu ya wanadamu kwa wingi.

²⁹Naam, mtu aweza kuelewa matandazo ya mawingu,

Ngurumo za makao yake?

³⁰Tazama, yeye huutandaza mwanga wake, umzunguke;

Naye hufunika vilindi vya bahari.

³¹Kwani huwahukumu makabila ya watu kwa njia hizi;

Hutoa chakula kwa ukarimu.

³²Yeye huifunika mikono yake kwa umeme;

Na kuuagiza shabaha utakayopiga.

³³Mshindo wake hutoa habari zake,

Anayewaka hasira juu ya uovu.