Ayubu akosolewa na Mungu

¹Haya, ita sasa; je! Yuko atakayekujibu?

Nawe utamwelekea yupi katika hao watakatifu?

²Kwani hasira humwua mtu mpumbavu,

Nao wivu humwua mjinga.

³Nimewaona wapumbavu wakishusha mizizi;

Lakini mara niliyalaani maskani yake.

⁴Watoto wake wako mbali na wokovu,

Nao wamesongwa langoni,

Wala hapana atakayewaponya.

⁵Mavuno yake wale wenye njaa huyala,

Na kuyatwaa hata kuyatoa miibani,

Nao wenye kiu huzitwetea mali zao.

⁶Kwani taabu haitoki mchangani,

Wala mashaka hayachipuki katika nchi;

⁷Lakini mwanadamu huzaliwa ili apate shida,

Kama cheche za moto zirukavyo juu.

⁸Lakini mimi ningemtafuta Mungu,[#Zab 50:15]

Ningemwekea Mungu kesi yangu;

⁹Yeye afanyaye mambo makuu, yasiyotambulikana;

Mambo ya ajabu yasiyo na hesabu;

¹⁰Yeye atoaye mvua inyeshe juu ya nchi,

Na kuyapeleka maji mashambani;

¹¹Awainuaye juu hao walio chini;

Na hao waombolezao hukuzwa wawe salama.

¹²Yeye huitangua mipango ya wadanganyifu,

Mikono yao isipate kuyatimiza makusudi yao.

¹³Yeye huwanasa wenye hekima katika hila yao wenyewe;[#1 Kor 3:19]

Na mashauri ya washupavu yaharibika kwa haraka.

¹⁴Wao hupatwa na giza wakati wa mchana,

Hupapasa mchana vile vile kama usiku.

¹⁵Lakini yeye huokoa na upanga wa kinywa chao,

Hata kumwokoa mhitaji na mkono wake aliye hodari.

¹⁶Basi hivi huyo maskini ana matumaini,

Na uovu hufumba kinywa chake.

¹⁷Tazama, yu heri mtu yule Mungu amwadhibuye;[#Mit 3:11-12; Ebr 12:5-6; Zab 94:12; Yak 1:12]

Kwa hiyo usidharau kurudiwa na huyo Mwenyezi.

¹⁸Kwani yeye huumiza, lakini tena huuguza;[#Hos 6:1]

Yeye hutia jeraha, na mikono yake huponya.

¹⁹Yeye atakuokoa na mateso sita;[#Kut 12:46; Zab 34:19; Yn 19:36; Zab 91:10; Mit 1:33; 2 The 3:3; 2 Pet 2:9]

Naam, hata katika saba hapana uovu utakaokugusa.

²⁰Wakati wa njaa atakukomboa na mauti;

Na vitani atakukomboa na nguvu za upanga.

²¹Utafichwa na mapigo ya ulimi;[#Zab 31:15]

Wala usiogope maangamizo yatakapokuja.

²²Wewe utayacheka maangamizo na njaa;

Wala hutawaogopa wanyama wakali wa nchi.

²³Kwani utakuwa na mapatano na mawe ya bara;[#Zab 91:12]

Nao wanyama wa bara watakuwa na amani kwako.

²⁴Nawe utajua ya kwamba hema yako ni salama;

Na zizi lako utalikagua, wala usikose kitu.

²⁵Tena utajua ya kwamba uzao wako utakuwa mwingi,

Na uzao wako utakuwa kama nyasi za nchi.

²⁶Utafika kaburini mwenye umri mtimilifu,

Kama mganda wa ngano ulivyo wakati wake.

²⁷Tazama, haya tumeyapeleleza, ndivyo yalivyo;

Yasikie, uyajue, ili upate mema.