Maombolezo juu ya maangamizi ya nchi

¹Neno la BWANA lililomjia Yoeli, mwana wa Pethueli.[#Ebr 1:1; 2 Pet 1:21]

²Sikilizeni haya, enyi wazee;[#Kum 4:32; Isa 7:17; Dan 12:1; Yoe 2:2; Mt 24:21]

Sikilizeni, enyi wenyeji wote wa nchi.

Je! Mambo haya yamekuwako katika siku zenu,

Au katika siku za baba zenu?

³Waambieni watoto wenu habari yake,[#Zab 78:4]

Watoto wenu wakawaambie watoto wao,

Na watoto wao wakakiambie kizazi kingine.

⁴Yaliyosazwa na tunutu yameliwa na nzige; na yaliyosazwa na nzige yameliwa na parare; na yaliyosazwa na parare yameliwa na madumadu.

⁵Levukeni, enyi walevi, mkalie;[#Isa 32:10]

Pigeni yowe, ninyi nyote mnywao divai;

Kwa sababu ya divai mpya;

Maana umekatiliwa mbali na vinywa vyenu.

⁶Maana taifa limepanda juu ya nchi yangu,[#Mit 30:25; Ufu 9:8]

Lenye nguvu, tena halina hesabu;

Meno yake ni kama meno ya simba,

Naye ana magego ya simba mkubwa.

⁷Ameuharibu mzabibu wangu; ameuvunja mtini wangu; ameyaambua magamba yake kabisa; ameuangusha chini; matawi yake yamefanywa kuwa meupe.[#Isa 5:6]

⁸Omboleza kama mwanamwali avaaye magunia[#Isa 22:12; Mit 2:17]

Kwa ajili ya mume wa ujana wake.

⁹Sadaka ya unga na sadaka ya kinywaji[#Yoe 2:14]

Zimekatiliwa mbali na nyumba ya BWANA;

Hao makuhani, wahudumu wa BWANA, wanaomboleza.

¹⁰Shamba limeharibika, nchi inaomboleza; maana nafaka imeharibika, divai mpya imekauka, mafuta yamepunguka.[#Yer 12:11; Isa 24:7]

¹¹Tahayarini, enyi wakulima;[#Yer 14:3]

Pigeni yowe, enyi watunzaji wa mizabibu;

Kwa ajili ya ngano na shayiri,

Maana mavuno ya mashamba yamepotea.

¹²Mzabibu umesinyaa, mtini nao umevia;[#Isa 9:3; Yer 48:33; Hos 9:1,2]

Nao mkomamanga na mtende na mtofaa;

Naam, miti yote ya mashamba imekauka;

Maana furaha imetoweka kwa wanadamu.

Mwito wa toba na sala

¹³Jikazeni mkaomboleze, enyi makuhani;[#Yer 4:8]

Pigeni yowe, enyi wahudumu wa madhabahu;

Njooni mlale usiku kucha katika magunia,

Enyi wahudumu wa Mungu wangu;

Kwa kuwa sadaka ya unga na sadaka ya kinywaji

Zimezuiwa katika nyumba ya Mungu wenu.

¹⁴Takaseni saumu, iteni kusanyiko la dini,[#2 Nya 20:3,13]

Wazee na wakusanye wenyeji wote wa nchi;

Waende nyumbani kwa BWANA, Mungu wenu,

Na kumlilia BWANA,

¹⁵Ole wake siku hii![#Yer 30:7; Yoe 2:3; Amo 5:16-18; Isa 13:6]

Kwa maana siku ya BWANA inakaribia, nayo itakuja kama maangamizi yatokayo kwake aliye Mwenyezi.

¹⁶Je! Chakula hakikukatiliwa mbali mbele ya macho yetu? Naam, furaha na kicheko mbali na nyumba ya Mungu wetu?[#Kum 12:7,12; 16:11]

¹⁷Mbegu zinaoza chini ya udongo wake; mabohari yameachwa ukiwa; ghala zimeharibika; kwa maana nafaka imekauka.

¹⁸Jinsi wanyama wanavyougua! Makundi ya ng'ombe yamefadhaika, kwa sababu hawana malisho; naam, makundi ya kondoo yamehangaika.[#1 Fal 18:5; Hos 4:3]

¹⁹Ee BWANA, nakulilia wewe;

Kwa maana moto umeyala malisho ya nyikani,

Na miali ya moto imeteketeza miti yote ya mashamba.

²⁰Naam, hata wanyama pori wanakulilia wewe;[#Ayu 38:41; Zab 104:31; 1 Fal 17:7]

Kwa maana vijito vya maji vimekauka,

Na moto umeyateketeza malisho ya nyikani.