Mfano wa Abrahamu

¹Basi, tusemeje juu ya Abrahamu, baba yetu kwa jinsi ya mwili?

²Kwa maana ikiwa Abrahamu alihesabiwa haki kwa ajili ya matendo yake, analo la kujisifia; lakini si mbele za Mungu.

³Maana Maandiko yasemaje? Abrahamu alimwamini Mungu, ikahesabiwa kwake kuwa haki.[#Mwa 15:6; Gal 3:6; Yak 2:23]

⁴Lakini kwa mtu afanyaye kazi, ujira wake hauhesabiwi kuwa ni neema, bali kuwa ni deni.[#Rum 11:6; Mt 20:7,14]

⁵Lakini kwa mtu asiyefanya kazi, bali anamwamini yeye ambaye amhesabia haki asiyekuwa mtauwa, imani yake mtu huyo imehesabiwa kuwa haki.

⁶Kama vile Daudi ainenavyo heri yake mtu yule ambaye Mungu amhesabia kuwa na haki pasipo matendo,[#Zab 32:1,2]

⁷Heri waliosamehewa makosa yao,[#Zab 32:1-2]

Na waliositiriwa dhambi zao.

⁸Heri mtu yule ambaye Bwana hamhesabii dhambi.

⁹Basi je! Heri hiyo ni kwa hao waliotahiriwa, au kwa hao pia wasiotahiriwa? Kwa kuwa tunanena ya kwamba kwake Abrahamu imani yake ilihesabiwa kuwa ni haki.[#Mwa 15:6]

¹⁰Alihesabiwaje basi? Alipokwisha kutahiriwa, au kabla hajatahiriwa? Si baada ya kutahiriwa, bali kabla ya kutahiriwa.

¹¹Naye aliipokea dalili hii ya kutahiriwa, mhuri wa ile haki ya imani aliyokuwa nayo kabla hajatahiriwa; apate kuwa baba yao wote waaminio, ijapokuwa hawakutahiriwa, ili na wao pia wahesabiwe haki;[#Mwa 17:10,11]

¹²tena awe baba wa kutahiriwa, kwa wale ambao si waliotahiriwa tu, bali pia wanazifuata nyayo za imani yake baba yetu Abrahamu aliyokuwa nayo kabla hajatahiriwa.[#Mt 3:9; 1 Pet 2:21; 2 Kor 12:18]

Ahadi ya Mungu yatimizwa kwa imani

¹³Kwa maana ahadi ile ya kwamba atakuwa mrithi wa ulimwengu alipewa Abrahamu na uzao wake, si kwa sheria bali kwa haki aliyohesabiwa kwa imani.[#Mwa 17:4-6; 22:17-18; Gal 3:29]

¹⁴Maana ikiwa wale wa sheria ndio warithi, imani imekuwa bure, na ahadi imebatilika.[#Gal 3:18]

¹⁵Kwa sababu sheria ndiyo ifanyayo hasira; maana pasipokuwapo sheria, hapana kosa.[#Rum 3:20; 5:13; 7:8,10]

¹⁶Kwa hiyo ilitoka katika imani, iwe kwa njia ya neema, ili kwamba ile ahadi iwe imara kwa wazawa wote; si kwa wale wa torati tu, ila na kwa wale wa imani ya Abrahamu; aliye baba yetu sisi sote;[#Gal 3:7]

¹⁷(kama ilivyoandikwa, Nimekuweka kuwa baba wa mataifa mengi); mbele zake yeye aliyemwamini, yaani Mungu, mwenye kuwahuisha wafu, ayatajaye yale yasiyokuwako kana kwamba yamekuwako.[#Mwa 17:5; Isa 48:13]

¹⁸Naye aliamini kwa kutarajia yasiyoweza kutarajiwa, ili apate kuwa baba wa mataifa mengi, kama ilivyonenwa, Ndivyo utakavyokuwa uzao wako.[#Mwa 15:5]

¹⁹Yeye asiyekuwa dhaifu wa imani, alifikiri hali ya mwili wake uliokuwa umekwisha kufa, (akiwa amekwisha kupata umri wa kama miaka mia moja), na hali ya utasa wa tumbo lake Sara.[#Mwa 17:17; #4:19 Katika Kigiriki ni ‘hali ya kufa ya tumbo lake Sara’.]

²⁰Lakini akiiona ahadi ya Mungu hakusita kwa kutoamini, bali alitiwa nguvu kwa imani, akimtukuza Mungu;[#Ebr 11:7,11,34]

²¹huku akijua hakika ya kuwa Mungu aweza kufanya yale aliyoahidi.

²²Kwa hiyo ilihesabiwa kwake kuwa ni haki.[#Mwa 15:6]

²³Lakini haikuandikwa kwa ajili yake tu kwamba ilihesabiwa kwake;[#Rum 15:4]

²⁴bali na kwa ajili yetu sisi mtakaohesabiwa vivyo hivyo, sisi tunaomwamini yeye aliyemfufua Yesu Bwana wetu katika wafu;[#1 Pet 1:21]

²⁵ambaye alitolewa kwa ajili ya makosa yetu, na kufufuliwa ili mpate kuhesabiwa haki.[#Isa 53:4-5; 1 Kor 15:17]