HEKIMA NA MUNGU KATIKA HISTORIA

Kazi ya Hekima toka Adamu hadi Musa

¹Hekima ilimlinda hata mwisho yule mtu wa kwanza, baba wa ulimwengu, aliyehulukiwa peke yake; akamponya katika kosa lake mwenyewe,[#Mwa 1:26-28]

²na kumpa uwezo wa kujipatia amri juu ya vitu vyote.

³Lakini yule mwenye hatia alipojitenga nayo katika hasira yake aliangamia mwenyewe katika ghadhabu, ambayo katika hiyo alimwua nduguye.[#Mwa 4:8-13]

⁴Na hapo kwa ajili yake dunia ilipokuwa ikifurikishwa na gharika, mara ya pili Hekima ilileta wokovu, kwa kumwongoza yule mtu wa haki katika njia yake kwa kipande dhaifu cha mti.[#Mwa 7:1–8:22]

⁵Aidha, mataifa walipoafikiana katika uovu, wakachafuliwa ndimi zao, Hekima ilimtambua yule mtu mwaminifu, na kumhifadhi katika unyofu wake mbele za Mungu, ikamthibitisha wakati ule moyo wake ulipomwonea shauku mwanawe.[#Mwa 11:1-9; 12:1-3; 22:1-19]

⁶Aidha, pindi walipokuwa wakiangamizwa wale wabaya, Hekima ilimponya yule mtu mwenye haki, ambaye alikimbia kutoka moto ulioshuka mbinguni juu ya ile miji mitano;[#Mwa 19:1-29]

⁷na hata sasa maganjo yatokayo moshi ni ushuhuda wa ubaya wao, pia na mimea inayozaa matunda mazuri yasiyoiva kamwe. Naam, hata na roho isiyoamini inalo kumbukumbu lake huko, yaani nguzo ya chumvi iliyoko leo.

⁸Maana hao walioiomba Hekima walidhoofika, hata wasiweze kuyatambua yaliyo mema; na zaidi ya hayo waliacha nyuma yao, kwa faida ya maisha ya kibinadamu, kumbukumbu la upumbavu wao; ili makusudi walivyokengeua wasikose kutambulikana.

⁹Walakini Hekima iliwaponya katika shida zao wale waliongoja kwa saburi.

¹⁰Aidha, hapo yule mwenye haki alipokimbia mbele ya hasira ya nduguye, Hekima ilimwongoza katika njia sawa; ikamwonesha ufalme wa Mungu, na kumjulisha mambo matakatifu; ikimfanikisha katika taabu zake, na kumzidishia mazao ya kazi zake;[#Mwa 27:43; 28:10-22; 32:24-30]

¹¹tena, watu walipomwonelea kwa sababu ya ubahili wao, ikasimama upande wake na kumtajirisha;

¹²ikamlinda na adui zake, na kumhifadhi salama kati yao waliomwotea; mfano wa mwamuzi ikaangalia pigano lake kuu; ili afahamu ya kwamba utauwa una nguvu kupita mambo yote.

¹³Aidha, alipouzwa yule mwenye haki Hekima haikumwacha, ila ilimwokoa na kutenda dhambi;[#Mwa 37:12-36; 39:1-23; 41:37-44]

¹⁴ikateremka pamoja naye hata gerezani, wala vifungo havikumwondoka, hata ilipomletea fimbo ya enzi ya ufalme, na amri juu yao waliomdhulumu; ikaudhihirisha uongo wao waliomshitaki kwa dhihaka, na kumjalia yeye mwenyewe utukufu wa milele.

Hekima iliwaongoza Waisraeli kutoka Misri

¹⁵Hekima nayo iliwaokoa watu watakatifu, wazao wasio na hatia, mikononi mwa lile taifa dhalimu.[#Kut 1:1–15:21]

¹⁶Ikaingia katika roho yake yule mtumishi wa BWANA, naye akawapinga wafalme wenye kutisha kwa maajabu na ishara.

¹⁷Ikawajazi wale watu watakatifu malipo ya kazi zao za taabu; ikawaongoza wapitie njia ya ajabu; ikawa kwao kifuniko wakati wa mchana, na mwako wa nyota wakati wa usiku.

¹⁸Ikawavusha penye Bahari ya Shamu, na kuwaongoza panapo maji mengi;

¹⁹lakini ikawatosa adui zao, na kuwatupa ufuoni kutoka chini ya vilindi.

²⁰Kwa hiyo wenye haki waliwateka wasio haki wakaimba nyimbo za kulihimidi jina lako, BWANA, na kuutukuza kwa umoja mkono wako uliowapigania;

²¹kwa sababu Hekima ilikifumbua hata kinywa cha bubu, na kuzinenesha vizuri ndimi zao waliokuwa wachanga.