¹Lakini anayepania kujifunza sheria ya Mungu Mkuu,

hutafuta hekima ya watu wa kale,

na kushughulikia waliyosema manabii.

²Huyahifadhi mazungumzo ya watu mashuhuri,

na kupambanua magumu ya mifano.

³Hutafuta maana zilizofichika za methali,

na methali za kutatiza kwake si kitu.

⁴Huyo huwatumikia wakuu,

na huonekana mbele ya watawala;

husafiri nchi za kigeni

na amepata kujua wema na ubaya wa watu.

⁵Asubuhi huamka kwa moyo na bidii

na kutafuta kumwomba Bwana aliyemuumba;

humwekea Mungu Mkuu maombi yake,

hufungua kinywa kusali,

na kuomba msamaha kwa dhambi zake.

⁶Kama Bwana aliye mkuu anataka

atamjaza mtu huyo busara,

naye atabubujika maneno ya hekima

na kumshukuru Bwana katika sala.

⁷Ataelekeza mashauri na maarifa yake vizuri,

na kutafakari juu ya siri zake Bwana.

⁸Ataonesha maarifa yake aliyojifunza,

na kuionea fahari sheria ya agano la Bwana.

⁹Watu wengi watasifu maarifa yake,

nayo hayatasahaulika kamwe.

Kumbukumbu lake halitatoweka,

na jina lake litakumbukwa vizazi vyote.

¹⁰Mataifa yatatangaza hekima yake,

nayo jumuiya ya watu itasema sifa zake.

¹¹Ataishi maisha marefu ataacha jina maarufu kuliko wengi;

na akifariki, kwake itakuwa imetosha.

Wimbo wa kumsifu Mungu

¹²Bado nina ya kusema niliyoyafikiria,

nami nimejaa kama mwezi mpevu.

¹³Nisikilizeni enyi watoto wema,

mkachanue kama waridi lililopandwa kando ya kijito.

¹⁴Toeni harufu nzuri kama ya ubani,

na kuchanua maua kama yungiyungi.

Tawanyeni angani harufu yenu na kuimba wimbo wa sifa;

msifuni Bwana kwa ajili ya matendo yake yote.

¹⁵Tangazeni ukuu wa jina lake,

mshukuruni kwa nyimbo za sifa,

mwimbieni kwa vinywa vyenu na vinubi.

Mnapomshukuru mwimbieni hivi:

¹⁶“Vitu vyote vimeumbwa na Bwana,

maana vyote ni vizuri sana.

Kila anachoamuru kitafanyika wakati wake.”

¹⁷Usiulize “Hiki ni kitu gani?” au, “Kwa nini hiki?”

Maana tutajifunza vyote wakati wake Bwana.

Kwa neno lake maji huacha kutiririka yakajirundika

kwa tamko la kinywa chake maji yalikaa ghalani mwake.

¹⁸Kwa amri yake kila anachopenda hufanyika,

hakuna awezaye kupunguza uwezo wake wa kuokoa.

¹⁹Matendo ya viumbe vyote ni wazi mbele yake,

hakuna kiwezacho kujificha mbele yake.

²⁰Yeye huona tangu milele hata milele,

na hakuna kitu cha ajabu kwake.

²¹Usiulize “Hiki ni kitu gani?” au, “Kwa nini hiki?”

maana kila kitu kimeumbwa kwa matumizi yake.

²²Baraka zake huijaza nchi kavu kama kwa mto,

huzilowanisha kama kwa mafuriko.

²³Ghadhabu yake itayafukuza mataifa,

kama ageuzavyo maji mazuri kuwa ya chumvi.

²⁴Kwa wanaomcha njia zake zimenyoka,

hali kwa waovu njia zake zina vikwazo.

²⁵Tangu mwanzoni Mwenyezi-Mungu aliumba vitu vyema kwa ajili ya walio wema,

lakini kwa watu wabaya aliumba vitu vibaya na vyema.

²⁶Mahitaji ya msingi kwa maisha ya mtu

ni maji, moto, chuma na chumvi;

unga, maziwa, asali, divai, mafuta na mavazi.

²⁷Hivi vyote ni vizuri kwa wamchao Mungu,

lakini hugeuka kuwa maovu kwa wenye dhambi.

²⁸Kuna pepo zilizoumbwa kuwaadhibu watu,

nazo zikikasirika zinaadhibu vikali.

Wakati wa hukumu zitaonesha nguvu yake,

na hivyo kuituliza hasira ya Muumba wao.

²⁹Moto, mvua ya mawe, njaa na maradhi;

hivi vyote vimeumbwa kuwaadhibu watu.

³⁰Meno ya wanyama wakali, nge na nyoka

na upanga unaowaadhibu wasiomcha Mungu kwa maangamizi.

³¹Vyote vitafurahi kutekeleza amri za Bwana;

vitakuwa tayari duniani kumhudumia,

na wakati utakapowadia havitaiasi amri yake.

³²Kwa hiyo nimekuwa na hakika ya hayo tangu mwanzo;

nimeyawaza na kuwazua, nikayaandika.

³³Kazi zote za Bwana ni njema,

naye huwapatia watu mahitaji yao yote wakati wake.

³⁴Usiseme: “Kitu hiki ni kibaya kuliko kile,”

maana faida ya kila kitu itaonekena wakati wake.

³⁵Sasa basi, imba sifa kwa moyo wote,

na kulisifu jina la Bwana.