Wapiga vita wa Dawidi.

¹Hawa ndio waliomjia Dawidi huko Siklagi, alipokuwa amefukuzwa, asimtokee Sauli, mwana wa Kisi. Nao hao ndio mafundi wa vita waliomsaidia kupigana.[#1 Sam. 27:6.]

²Walishika pindi, nao walijua kutupa mawe kuumeni na kushotoni na kupiga mishale kwa pindi zao; nao walikuwa ndugu zake Sauli, maana ni Wabenyamini.[#1 Mambo 8:40.]

³Mkuu Ahiezeri na Yoasi, wana wa Hasemaa wa Gibea; na Yezieli na Peleti, wana wa Azimaweti, na Beraka na Yehu wa Anatoti,

⁴na Isimaya wa Gibeoni, ni mmoja wao wale mafundi wa vita thelathini, tena ni mkuu wao hao thelathini, na Yeremia na Yahazieli na Yohana na Yozabadi wa Gedera,

⁵Eliuzai na Yerimoti na Balia na Semaria na Sefatia wa Harifu;

⁶Elkana na Isia na Azareli na Yoezeri na Yasobamu waliokuwa Wakora;[#1 Mambo 25:18.]

⁷na Yoela na Zebadia, wana wa Yerohamu wa Gedori.

⁸Kwao Wagadi nako walikuwako waliojitenga kumjia Dawidi kule gengeni nyikani; nao walikuwa mafundi wa vita wenye nguvu, waume waliozoea kupigana, walishika ngao na mikuki, nyuso zao zilikuwa kama nyuso za simba, wakapiga mbio kama paa milimani.[#2 Sam. 2:18.]

⁹Mkuu Ezeri, wa pili Obadia, wa tatu Eliabu,

¹⁰wa nne Misimana, wa tano Yeremia,

¹¹wa sita Atai, wa saba Elieli,

¹²wa nane Yohana, wa tisa Elizabadi,

¹³wa kumi Yeremia, wa kumi na moja Makibanai.

¹⁴Hawa Wagadi walikuwa wakuu wa vikosi, aliyekuwa mdogo kwao aliweza kushinda mia, naye mkubwa elfu.

¹⁵Hawa ndio waliovuka Yordani katika mwezi wa kwanza, mto ulipojaa na kuzifurikia kingo zake zote mbili, wakawafukuza wote waliokaa huko mabondeni upande wa maawioni kwa jua na machweoni kwa jua.

¹⁶Watu wengine wa Benyamini na wa Yuda walipomjia Dawidi pale gengeni pake,

¹⁷Dawidi akawatokea, akaanza kusema nao akiwaambia: Kama mnakuja kwangu kwa kunitakia mema, mnisaidie, basi, moyo wangu utafanya bia nanyi, tupatane; lakini kama mnataka kunichongea kwao wanaonisonga, ingawa ukorofi haumo mikononi mwangu, Mungu wa baba zetu na ayatazame, awapatilize!

¹⁸Ndipo, roho ilipomwingia Amasai aliyekuwa mkuu wa thelathini, akasema: Tu watu wako, Dawidi; tuko pamoja na wewe, mwana wa Isai. Tengemana, tengemana! Naye atakayekusaidia na atengemane! Kwani Mungu wako anakusaidia. Ndipo, Dawidi alipowapokea, akawapa kuwa wakuu wa vikosi.

¹⁹Hata kwa Wamanase walikuwako waliourudia upande wa Dawidi, alipomjia Sauli pamoja na Wafilisti kupigana naye, lakini hawakuwasaidia; kwani wakuu wa Wafilisti walikuwa wamefanya shauri, kwa hiyo walikuwa wamempa ruhusa kwa kumwazia kwamba: Atarudi kwa bwana wake Sauli na kumtolea vichwa vyetu.[#1 Sam. 29:4.]

²⁰Kisha alipokwenda Siklagi, Wamanase hawa wakarudi upande wake: Adina na Yozabadi na Yediaeli na Mikaeli na Yozabadi na Elihu na Siltai, ndio wakuu wa vikosi vyenye watu elfu kwao Wamanase.

²¹Hawa wakamsaidia Dawidi kushindana na askari za adui, kwani wao wote walikuwa mafundi wa vita wenye nguvu, wakawa wakuu wa vikosi.

²²Kwani siku hizo watu wakaja kwa Dawidi siku kwa siku, wamsaidie, mpaka wakiwa jeshi kubwa kama jeshi la Mungu.

²³Hii ndiyo hesabu ya wakuu wao wapiga vita waliomjia Dawidi huko Heburoni wakishika mata yao, wampe ufalme wakiuondoa kwake Sauli, kama Bwana alivyosema:

²⁴wana wa Yuda waliochukua ngao na mikuki, watu 6800 wenye mata ya kupigia vita.

²⁵Wana wa Simeoni, mafundi wa vita wenye nguvu wajuao kupiga vita, watu 7100.

²⁶Wana wa Lawi watu 4600,

²⁷naye Yoyada, mkuu wao wa Haroni, tena pamoja naye watu 3700,

²⁸naye Sadoki aliyekuwa kijana mwenye nguvu ya kupiga vita, namo mlangoni mwa baba yake wakatoka wakuu 22.[#1 Mambo 6:8; 2 Sam. 15:24.]

²⁹Wana wa Benyamini waliokuwa ndugu zake Sauli, watu 3000; kwani mpaka hapo wengi wao walikuwa upande wa mlango wa Sauli na kuulindia.

³⁰Wana wa Efuraimu, mafundi wa vita wenye nguvu, watu 20800, ni watu waliokuwa wenye macheo katika milango yao.

³¹Katika nusu ya shina la Manase wakatoka watu 18000 waliokuwa wameandikwa majina yao, waje, wamfanye Dawidi kuwa mfalme.

³²Wana wa Isakari waliojua kuitambua maana ya siku walijua nayo yaliyowapasa Waisiraeli kufanya, kwa hiyo wakaja wakuu wao 200 nao ndugu zao wote kwa kuagizwa nao.

³³Kwa Zebuluni vikatoka vikosi vya watu waliokuwa tayari kupiga vita kwa kushika vyombo vyote vya vitani, watu 50000 waliozoea kujipanga pasipo kupitana mioyo.

³⁴Kwa Nafutali wakatoka wakuu 1000, tena pamoja nao watu 37000 wenye ngao na mikuki.

³⁵Kwa Dani wakatoka waliokuwa tayari kupiga vita, watu 28600.

³⁶Kwa Aseri watu wakatoka vikosi vizima kwa kuwa tayari kupiga vita, watu 40000.

³⁷Ng'ambo ya Yordani kwa Rubeni na kwa Gadi na katika nusu ya shina la Manase vikatoka vikosi vyenye vyombo vyote vya vitani, watu 120000.

³⁸Watu hawa wote wa vita waliojua kujipanga vema vitani wakaja Heburoni, mioyo yao ikiwa mmoja kabisa, wakataka kumfanya Dawidi kuwa mfalme wa Waisiraeli wote; nao Waisiraeli wote waliosalia kwao mioyo yao ilikuwa mmoja tu wakitaka kumfanya Dawidi kuwa mfalme.

³⁹Wakawa huko pamoja na Dawidi wakila, wakinywa siku tatu, kwani ndugu zao waliwaandalia.

⁴⁰Nao waliokaa karibu kwao kuzifikia nchi za Isakari na za Zebuluni na za Nafutali waliwaletea vyakula vikichukuliwa na punda na ngamia na nyumbu na ng'ombe, vilikuwa vilaji vya unga na maandazi ya kuyu na ya zabibu na mvinyo na mafuta na ng'ombe na mbuzi na kondoo wengi, kwa kuwa ilikuwako furaha kwao Waisiraeli.