Dawidi anajijengea nyumba. Wakeze na wanawe.

¹Hiramu, mfalme wa Tiro, akatuma wajumbe kwa Dawidi na miti ya miangati na waashi na maseremala, wamjengee Dawidi nyumba.

²Ndipo, Dawidi alipojua, ya kuwa Bwana amemweka kweli kuwa mfalme wao Waisiraeli, kwani ufalme wake ukaja kutukuka zaidi kwa ajili ya ukoo wake wa Waisiraeli.

³Kisha Dawidi akachukua wanawake wengine mle Yerusalemu, Dawidi akazaa tena wana wa kiume na wa kike.

⁴Haya ndiyo majina ya wana, waliozaliwa Yerusalemu: Samua na Sobabu, Natani na Salomo,

⁵Ibuhari na Elisua na Elpeleti,

⁶na Noga na Nefegi na Yafia,

⁷na Elisama na Beliada na Elifeleti.

Dawidi anawashinda Wafilisti.

⁸Wafilisti waliposikia, ya kuwa Dawidi amepakwa mafuta, awe mfalme wao Waisiraeli wote, ndipo, Wafilisti wote walipopanda kumtafuta Dawidi. Dawidi alipovisikia akatoka kukutana nao.

⁹Wafilisti wakaja, wakajieneza Bondeni kwa Majitu.

¹⁰Dawidi akamwuliza Mungu kwamba: Nikipanda kupigana na Wafilisti, utawatia mkononi mwangu? Bwana akamwambia: Panda! Nitawatia mkononi mwako.

¹¹Ndipo, walipopanda Baali-Perasimu; Dawidi alipowapiga huko, akasema yeye Dawidi: Mungu amewaatua adui zangu kwa nguvu ya mkono wangu, kama maji yanavyoatua ukingo. Kwa sababu hii wakapaita mahali pale Baali-Perasimu (Maatuko).

¹²Kwa kuwa wale waliiacha huko miungu yao, Dawidi akaagiza iteketezwe kwa moto.[#5 Mose 7:5,25.]

¹³Lakini Wafilisti wakapanda tena na kujieneza bondeni kulekuke.

¹⁴Naye Dawidi alipomwuliza Mungu tena, Mungu akamwambia: Usipande kuwafuata, ila uzunguke hapo, walipo, upate kuwajia ukitoka juu, misandarusi iliko.

¹⁵Hapo, utakaposikia vileleni kwa misandarusi shindo kama ya watu wapitao, basi, hapo watokee kupigana nao! Kwani ndipo, Mungu atakapotokea, akutangulie kuyapiga majeshi ya Wafilisti.

¹⁶Dawidi akafanya, kama Mungu alivyomwagiza, wakayapiga majeshi ya Wafilisti toka Gibeoni hata Gezeri.

¹⁷Jina lake Dawidi likaenea katika nchi zote, Bwana akawatia wamizimu wote woga wa kumwogopa.