Sanduku la Agano linapelekwa Yerusalemu.

¹Dawidi akajijengea nyumba mjini mwake, nalo Sanduku la Mungu akalitengenezea mahali na kulipigia hema.

²Kisha Dawidi akasema: Sanduku la Mungu asilichukue mtu, wasipokuwa Walawi, kwani ndio, Bwana aliowachagua kulichukua Sanduku la Mungu na kumtumikia kale na kale.

³Dawidi akawakusanya Waisiraeli wote mle Yerusalemu, walipandishe Sanduku la Bwana na kuliweka mahali pake, alipolitengenezea.

⁴Dawidi akawakusanya wana wa Haroni na Walawi,

⁵kwao wana wa Kehati: mkuu Urieli na ndugu zake, watu 120;

⁶kwao wana wa Merari: mkuu Asaya na ndugu zake, watu 220;

⁷kwao wana wa Gersomu: mkuu Yoeli na ndugu zake, watu 130;

⁸kwao wana wa Elisafani: mkuu Semaya na ndugu zake, watu 200;

⁹kwao wana wa Heburoni: mkuu Elieli na ndugu zake, watu 80;

¹⁰kwao wana wa Uzieli: mkuu Aminadabu na ndugu zake, watu 112.

¹¹Kisha Dawidi akawaita watambikaji Sadoki na Abiatari na Walawi Urieli, Asaya na Yoeli, Semaya na Elieli na Aminadabu,[#2 Sam. 15:29.]

¹²akawaambia: Ninyi m wakuu wa milango ya Walawi, jitakaseni ninyi na ndugu zenu! Kisha mtalipandisha Sanduku la Bwana Mungu wa Isiraeli na kuliweka mahali pake, nilipolitengenezea.

¹³Kwa kuwa mara ya kwanza hamkuwako. Bwana Mungu wetu akatupiga pigo, kwa kuwa hatukumtafuta kwa njia itupasayo.[#1 Mambo 13:9-10.]

¹⁴Watambikaji na Walawi wakajitakasa, wapate kulipandisha Sanduku la Bwana Mungu wa Isiraeli.

¹⁵Walawi wakalichukua Sanduku la Mungu kwa kuweka mipiko mabegani pao, kama Mose alivyoagiza kwa kuambiwa na Bwana.[#2 Mose 25:14; 4 Mose 4:15.]

¹⁶Kisha Dawidi akawaambia wakuu wa Walawi, wawapange ndugu zao waimbaji, wakivishika vyombo vyao vya kuimbia: mapango na mazeze na matoazi, wapige shangwe na kuzipaza sauti kwa furaha.

¹⁷Ndipo, Walawi walipowapanga: Hemani, mwana wa Yoeli, na kwa ndugu zake: Asafu, mwana wa Berekia, na kwa wana wa Merari walio ndugu zao: Etani, mwana wa Kusaya.

¹⁸Pamoja nao wakawapanga ndugu zao wa uzao wa pili: Zakaria, Beni na Yazieli, na Semiramoti na Yehieli na Uni, Eliabu na Benaya na Masea na Matitia na Elifelehu na Mikinea na Obedi-Edomu na Yieli waliokuwa walinda malango.

¹⁹nao waimbaji Hemani, Asafu na Etani walioshika matoazi ya shaba, wayavumishe,[#1 Mambo 6:33,39,44; 25:1.]

²⁰na Zakaria na Azieli na Semiramoti na Yehieli na Uni na Eliabu na Masea na Benaya walioshika mapango, waimbe sauti za juu;

²¹na Matitia na Elifelehu na Mikinea na Obedi-Edomu na Yieli na Azazia walioshika mazeze, waimbe sauti za chini na kuwaongoza wengine.

²²Kenania, mkuu wa Walawi, aliyewaimbisha akawasimamia, walipoimba, kwani aliijua kazi hiyo.

²³Naye Berekia pamoja na Elkana wakayangoja malango penye Sanduku la Agano.

²⁴Nao watambikaji Sebania na Yosafati na Netaneli na Amasai na Zakaria na Benaya na Eliezeri wakalitangulia Sanduku la Mungu na kupiga matarumbeta, nao Obedi-Edomu na Yehia wakayalinda malango penye sanduku hilo.

²⁵Ndivyo, Dawidi na wazee wa Waisiraeli na wakuu wa maelfu walivyokwenda kulipandisha Sanduku la Agano la Bwana wakilitoa nyumbani mwa Obedi-Edomu kwa furaha.

²⁶Kwa sababu Mungu aliwasaidia Walawi waliolichukua Sanduku la Agano la Bwana, wakamtolea ng'ombe saba kuwa za tambiko pamoja na madume saba ya kondoo.

²⁷Dawidi alikuwa amevaa kanzu ya bafta, hata Walawi wote waliolichukua hilo Sanduku na waimbaji na Kenania, mkuu wao waimbaji aliyewaimbisha, naye Dawidi alikuwa amevaa kisibau cheupe cha ukonge.

²⁸Nao Waisiraeli wote wakalipandisha Sanduku la Agano la Bwana kwa kushangilia na kwa kupiga mabaragumu na matarumbeta na matoazi pamoja na kuyavumisha nayo mapango na mazeze.

²⁹Ikawa, Sanduku la Agano la Bwana lilipoingia mjini kwa Dawidi, Mikali, binti Sauli, alichungulia dirishani, naye alipomwona mfalme Dawidi, jinsi alivyorukaruka na kuchezacheza, ndipo, alipombeza moyoni mwake.