Hesabu na Kazi za Walawi.

¹Dawidi alipokuwa mzee mwenye kushiba siku za kuwapo, akampa mwanawe Salomo ufalme wa Waisiraeli,[#1 Fal. 1:28-40.]

²akawakusanya wakuu wote wa Waisiraeli na watambikaji na Walawi.

³Hapo Walawi waliomaliza miaka thelathini na zaidi walipohesabiwa, ikawa hesabu yao ya vichwa vya waume 38000.

⁴Katika hawa wakapewa watu 24000 kuziangalia kazi za nyumba ya Bwana, watu 6000 kuwa wenye amri na waamuzi,

⁵watu 4000 kuwa walinda malango, tena watu 4000 kumtukuza Bwana kwa vyombo, Dawidi alivyovitengeneza vya kumtukuza Bwana.

⁶Kisha Dawidi akawagawanya kuwa mafungu yao wana wa Lawi, ndio Gersoni, Kehati na Merari.[#1 Mambo 6:1,16,17.]

⁷Wagersoni ni Ladani na Simei.[#1 Mambo 26:21.]

⁸Wana wa Ladani walikuwa watatu: mkubwa Yehieli, tena Zetamu na Yoeli.

⁹Wana wa simei walikuwa watatu: Selomiti na Hazieli na Harani. Hawa ndio wakubwa wa mlango wa Ladani.

¹⁰Wana wa Simei walikuwa: Yahati na Zina na Yeusi na Beria, hawa wanne walikuwa wana wa Simei.

¹¹Naye Yahati alikuwa mkubwa, naye Ziza wa pili; lakini Yeusi na Beria hawakuwa na wana wengi, kwa hiyo walihesabiwa kuwa mlango mmoja.

¹²Wana wa Kehati walikuwa wanne: Amuramu, Isihari, Heburoni na Uzieli.[#1 Mambo 6:2-3.]

¹³Wana wa Amuramu walikuwa Haroni na Mose. Haroni akatengwa na kutakaswa, apatumikie Patakatifu Penyewe, yeye na wanawe kale na kale, wamvukizie Bwana kwa utumishi wao, tena wawabariki watu katika Jina lake kale na kale.[#1 Mambo 6:49; 5 Mose 10:8; Ebr. 5:4.]

¹⁴Naye Mose akawa mtu wa Mungu, wanawe wakatajwa majina yao penye shina la Lawi.[#5 Mose 33:1.]

¹⁵Wana wa Mose walikuwa Gersomu na Eliezeri.[#2 Mose 18:3-4.]

¹⁶Wana wa Gersomu mkubwa wao alikuwa Sebueli.[#1 Mambo 26:24.]

¹⁷Wana wa Eliezeri mkubwa wao alikuwa Rehabia; yeye Eliezeri hakuwa na wana wengine, lakini wana wa Rehabia walikuwa wengi zaidi.[#1 Mambo 24:21-30.]

¹⁸Wana wa Isahari mkubwa wao alikuwa Selomiti.

¹⁹Wana wa Heburoni mkubwa wao alikuwa Yeria, wa pili Amaria, wa tatu Yahazieli na wa nne Yekamamu.

²⁰Wana wa Uzieli mkubwa wao alikuwa Mika, wa pili Isia.

²¹Wana wa Merari walikuwa Mahali na Musi, nao wana wa Mahali walikuwa Elazari na Kisi.[#1 Mambo 6:19.]

²²Elazari akafa pasipo kupata wana wa kiume, alipata wa kike tu, nao wana wa Kisi wakawaoa hao ndugu zao.

²³Wana wa Musi walikuwa watatu: Mahali na Ederi na Yeremoti.

²⁴Hawa ndio wana wa Lawi kwa milango yao nao wakuu wa milango, kama walivyoandikwa kichwa kwa kichwa kwa hesabu ya majina yao, ndio waliofanyia nyumba ya Bwana kazi za utumishi, waliomaliza miaka ishirini na zaidi;

²⁵kwani Dawidi alisema: Kwa kuwa Bwana Mungu wa Isiraeli ameupatia ukoo wake utulivu, tena kwa kuwa atakaa Yerusalemu kale na kale,[#Yoe. 3:21.]

²⁶sasa Walawi hawana tena kazi za kulichukua hilo Kao na vyombo vyake vyote vya kulitumikia.

²⁷Kwani kwa maagizo ya Dawidi ya mwisho wana wa Lawi walihesabiwa wao waliomaliza miaka ishirini na zaidi.

²⁸Tangu hapo kazi zao zikawa kuwasaidia wana wa Haroni, wakiitumikia nyumba ya Bwana, waziangalie nyua na vyumba, wayasafishe matakatifu yote; hizi zikawa kazi zao za utumishi wa nyumba ya Mungu.

²⁹Tena iliwapasa kuiandaa mikate, aliyowekewa Bwana, na unga uliopepetwa vema wa vilaji vya tambiko na wa maandazi membamba yasiyochachwa na wa vikate vilivyochomwa katika bati la chuma na wa vitumbua na kuviangalia vibaba na vipimo vyote pia.

³⁰Tena iliwapasa kusimama siku kwa siku kulipokucha, wakimshukuru Bwana na kumtukuza, na vilevile kulipokuchwa.[#Sh. 92:3.]

³¹Tena iliwapasa kumtolea Bwana ng'ombe za tambiko za kuteketezwa nzima za siku za mapumziko na za miandamo ya mwezi na za sikukuu kwa hesabu zao zilizowekwa za kumtolea Bwana pasipo kukoma.

³²Hivyo walishika zamu ya Hema la Mkutano na zamu ya Patakatifu na zamu ya kuwasaidia ndugu zao wana wa Haroni wakitumikia nyumbani mwa Bwana.