Anwani.

¹Mimi Petero niliye mtumwa wa Yesu Kristo nawaandikia ninyi wateule mkaao ugenini na kutawanyika kule Ponto na Galatia na Kapadokia na Asia na Bitinia.[#Yak. 1:1.]

²Kwa hivyo, Mungu Baba alivyowatambua kale, aliwatakasa kwa Roho yake, mpate kutii kwa kunyunyizwa damu yake Yesu Kristo. Upole uwafurikie na utengemano![#Rom. 8:29.]

Fungu letu lililoko mbinguni.

³*Atukuzwe Mungu, Baba wa Bwana wetu Yesu Kristo! Kwa sababu alituonea huruma nyingi, akatuzaa mara ya pili, tupate kingojeo chenye uzima kwamba: Yesu kristo amefufuka katika wafu![#1 Petr. 1:23.]

⁴Ndipo, alipotupatia fungu lisiloozeka, lisilochafuka, lisilonyauka; hilo mmelimbikiwa mbinguni ninyi.[#Kol. 1:12.]

⁵Tena mkikaa na kumtegemea mnalindwa kwa nguvu za Mungu, mpate wokovu uliotengenezwa wa kutokea waziwazi siku za mwisho.[#Yoh. 10:28; 17:11.]

⁶Hapo mtashangilia, hata ikiwapasa sasa kusikitika siku kidogo, mkijaribiwa na mambo menginemengine,[#Rom. 5:2; 2 Kor. 4:17; 1 Petr. 5:10.]

⁷kwamba: Kumtegemea Mungu kujulike kwenu kuwa kwa kweli, kisha kuonekane kuwa kwenye kima sana kuliko dhahabu iangamikayo, nayo uzuri wake hujulikana motoni. Mkiwa hivyo mtapata sifa na utukufu na macheo hapo, Yesu Kristo atakapotokea waziwazi.[#Fano. 17:3; Mal. 3:3.]

⁸Naye mmempenda pasipo kumwona, mkamtegemea pasipo kumwona kamwe; kwa hiyo mtashangilia kwa furaha isiyosemeka kwa utukufu wake;[#Yoh. 20:29; 2 Kor. 5:7.]

⁹itakuwa hapo, mtakapoutwaa mwisho wa kumtegemea, ndio wokovu wa roho zenu.*[#Rom. 6:22.]

Kazi ya wafumbuaji.

¹⁰Nao wafumbuaji walioyafumbua hayo mema, mliyogawiwa, waliutafuta sana wokovu huo na kuuchunguza; wakayafuatafuata, wapate kujua,[#Luk. 10:24.]

¹¹kama ni siku za wakati gani zile, ambazo Roho ya Kristo, waliyokuwa nayo, inazivumbua na kuyashuhudia hapo kale mateso yatakayompata Kristo nao utukufu utakaokuwa mwishoni.[#Sh. 22; Yes. 53.]

¹²Wao walikuwa wamefunuliwa, ya kama mafumbuo yao hayakuwa ya kuwatumikia wao wenyewe, ila ninyi. Nako kwenu yanatangazwa sasa nao wawapigiao hiyo mbiu njema kwa nguvu ya Roho takatifu iliyotumwa toka mbinguni. Basi, mambo hayo hata malaika huyatunukia kuyachungulia.[#Ef. 3:10.]

Makombozi yetu.

¹³*Kwa hiyo jifungeni kiroho viuno vyenu, mlevuke! Mtimilike na kuyangojea yale mema, mnayoletewa, mgawiwe, Yesu Kristo atakapotokea waziwazi![#Luk. 12:35-36.]

¹⁴Kwa sababu m watoto wanaotii, msijielekeze penye tamaa zenu, mlizozifuata hapo kale, mlipokuwa hamjajua maana![#Rom. 12:2.]

¹⁵Ila kama yeye aliyewaita alivyo mtakatifu, vivyo hivyo nanyi mwe watakatifu katika mwenendo wenu wote!

¹⁶Kwani imeandikwa:

Mwe watakatifu! Kwani mimi ni mtakatifu.*

¹⁷*Tena ninyi humwita Baba yeye anayemhukumu kila mtu kwa kazi yake pasipo kupendelea; kwa hiyo mwendelee miaka yenu ya kukaa ugenini na kuogopa![#Rom. 2:11; Fil. 2:12.]

¹⁸Jueni: vyenye kuoza, vingawa fedha au dhahabu, sivyo, ambavyo mlikombolewa navyo katika mwenendo wenu wa kikale uliokuwa hauna maana;[#1 Petr. 4:3; 1 Kor. 6:20; 7:23.]

¹⁹ila mmekombolewa kwa damu ya Kristo iliyo yenye kima kikuu, maana alikuwa mwana kondoo asiye na kilema wala doadoa.[#Yes. 53:7; Yoh. 1:29; Ebr. 9:14.]

²⁰Alitambulika kale, ulimwengu ulipokuwa haujaumbwa, lakini kutokea alitokea waziwazi siku hizi za nyuma kwa ajili yenu ninyi.[#Rom. 16:25-26; Ef. 1:4.]

²¹Kwake yeye mmepata kumtegemea Mungu aliyemfufua katika wafu na kumpa utukufu kwamba: Awe Mungu tu, mnayemtegemea na kumngojea.[#Yoh. 14:6.]

²²Kwa kuwa mmezitakasa roho zenu na kuyatii yaliyo ya kweli, pendaneni kindugu pasipo ujanja mkijikaza kupendana kila mtu na mwenziwe kwa moyo!

²³Kwani mkiwa mmezaliwa mara ya pili, siyo nguvu ya mbegu iozayo, ila ni nguvu ya mbegu isiyoozeka, ndiyo Neno la Mungu lililo lenye uzima, nalo ndilo likaalo.[#Yoh. 1:13; 3:5; Yak. 1:18.]

²⁴Kwani

kila mwenye mwili ni kama majani,

nao uzuri wake wote ni kama ua la majani.

Majani hunyauka, nayo maua yake hupukutika.

²⁵Lakini neno lake Bwana hukaa kale na kale.

Basi, hilo ndilo neno la mbiu njema, mpigiwayo ninyi.*