Kulichunga kundi la Kristo. Simba anayenguruma.

¹Wazee walioko kwenu nawaonya mimi niliye mzee mwenzao na shahidi wa mateso yake Kristo, nitakayekuwa mwenziwe hata katika utukufu utakaofunuliwa.[#Rom. 8:17; 2 Yoh. 1.]

²Nawaonya kwamba: Lichungeni kundi la Mungu lililoko kwenu, si kwa shuruti, ila kwa kuyapenda wenyewe, Mungu ayatakayo, wala si kwa kufuata machumo mabaya, ila kwa mioyo![#Yoh. 21:16; Tume. 20:28; 1 Tim. 3:2-7.]

³Msiwatawale wateule, ila mwe vielezo vya kikundi cha kwenu![#Ez. 34:2-10; 2 Kor. 1:24; Tit. 2:7.]

⁴Mkiwa hivyo mtapewa kilemba chenye utukufu kisichonyauka, hapo, mchungaji mkuu atakapotokea waziwazi.[#1 Petr. 2:25; 1 Kor. 9:25; 2 Tim. 4:8; Ebr. 13:20.]

⁵Vilevile ninyi mlio watu wazima, watiini wazee!* Nyote tumikianeni kila mtu na mwenziwe, kama ni mtumwa wake kwa kujinyenyekeza!

Kwani wenye kujikweza Mungu huwapingia,

lakini wanyenyekevu huwapatia huruma.

⁶Kwa hiyo unyenyekeeni mkono wa Mungu ulio wenye nguvu, yeye awakweze, siku yake itakapofika![#Iy. 22:29; Yak. 4:10.]

⁷Mtupieni Mungu yote, myahangaikiayo! Kwani yeye huwatunza.[#Sh. 55:23; Mat. 6:25; Luk. 22:31; Fil. 4:6.]

⁸Levukeni, mkeshe! Kwani mpingani wenu Satani huzunguka kama simba anayenguruma akitafuta, atakayemmeza.[#1 Tes. 5:6.]

⁹Huyo mgombanisheni kwa nguvu ya kumtegemea Mungu mkijua, ya kuwa mateso yayo hayo huwapata nao ndugu zenu walioko ulimwenguni![#Ef. 6:11-13.]

¹⁰Naye Mungu mwenye mema yote ya kuwagawia, aliyewaitia nanyi utukufu wake wa kale na kale uliomo katika Kristo, atawalinganya mwenyewe, mkiteseka kidogo, na kuwapa uwezo na nguvu na msingi mgumu.[#1 Petr. 1:6.]

¹¹Wake yeye ni utukufu na uwezo kale na kale pasipo mwisho! Amin.*

¹²Nimewaandikia kidogo kwa mkono wa ndugu Silwano, ninayemwona kuwa mwelekevu. Nimewaonya na kuwashuhudia kwamba: Mmegawiwa mema ya Mungu yaliyo ya kweli. Nayo yakalieni![#Ebr. 13:22.]

¹³Wateule waliomo humu Babiloni pamoja nasi wanawasalimu, hata mwanangu Marko.[#Tume. 12:12,25; 2 Tim. 4:11.]

¹⁴Mwamkiane na kunoneana kwa kupendana! Utengemano uwakalie nyote mlio wake Kristo![#1 Kor. 16:20.]