Samweli anampaka Sauli mafuta.

¹Ndipo, Samweli alipokitwaa kichupa cha mafuta, akayamiminia kichwa chake, akamnonea midomo na kumwambia: Hivi ndivyo, Bwana anavyokupaka mafuta, uwe mkuu wao walio fungu lake.

²Utakapotoka kwangu leo, utaona watu wawili penye kaburi la Raheli mpakani mwa Benyamini huko Selsa, nao watakuambia: Wale punda wa kike, uliokwenda kuwatafuta, wameonekana. Tazama, baba yako ameyaacha mambo ya punda kwa kuwahangaikia ninyi akisema: Mwanangu nimfanyie nini?[#1 Mose 35:19.]

³Utakapoondoka huko kwenda zako na kufika penye mvule wa Tabori, huko watu watatu watakutana na wewe, nao wanapanda kwenda Beteli kwa Mungu, mmoja anachukua wana mbuzi watatu, mmoja mikate mitatu, mmoja kiriba cha mvinyo.

⁴Nao watakuamkia na kukupa mikate miwili, nawe utaipokea mikononi mwao.

⁵Baadaye utafika kwenye kilima cha Mungu, ngome ya Wafilisti iliko. Utakapofika huko penye mji huo utakuta kikosi cha wafumbuaji wanaoshuka kilimani pa kutambikia wakitanguliwa na mapango na matoazi na mazomari na mazeze, nao wanakwenda wakifumbua maneno.

⁶Ndipo, roho ya Bwana itakapokujia, ufumbue pamoja nao; ndivyo, utakavyogeuzwa kuwa mtu mwingine.[#1 Sam. 10:10.]

⁷Hapo, hivyo vielekezo vitakapokutukia, fanya, mkono wako utakayoyaona! kwani Mungu yuko na wewe.

⁸Kisha shuka kunitangulia kwenda Gilgali! Nami utaniona, nikishuka kuja kwako kutoa ng'ombe za tambiko za kuteketezwa nzima na kuchinja ng'ombe za tambiko za shukrani. Utangoja siku saba, hata nitakapokuja kwako, nikujulishe utakayoyafanya.[#1 Sam. 13:8.]

⁹Ikawa, Sauli alipogeuka, atoke kwake Samweli, ndipo, Mungu alipougeuza moyo wake kuwa mwingine. Navyo vielekezo vile vyote vikatukia siku ile.

¹⁰Walipofika kule Gibea, wakaona kikosi cha wafumbuaji kilichokuja kukutana naye; ndipo, roho ya Mungu ilipomjia, naye akafumbua mambo katikati yao.[#1 Sam. 19:20-24.]

¹¹Ikawa, wote waliomjua zamani zote walipomwona, ya kuwa anafumbua mambo pamoja na wafumbuaji, ndipo, watu hao waliposemezana kila mtu na mwenzake: Hivi vya mwana wa Kisi vinakuwaje? Kumbe Sauli naye yumo katika wafumbuaji?

¹²Mtu wa huko akajibu: Je? Baba yao ni nani? Kwa hiyo likawa fumbo la kwamba: Kumbe Sauli naye yumo katika wafumbuaji!

¹³Alipokwisha kufumbua mambo akaja kilimani pa kutambikia.

¹⁴Mjomba wake Sauli akamwuliza yeye na kijana wake: Mlikwenda wapi? Akajibu: Kuwatatufa wale punda wa kike; lakini tusipowaona tukaenda kwa Samweli.

¹⁵Mjomba wake Sauli akasema: Nisimulie, Samweli aliyowaambia!

¹⁶Sauli akamwambia mjomba wake: Ametupasha habari, ya kuwa wale punda wa kike wameonekana; lakini lile neno la ufalme, Samweli alilolisema, hakumsimulia.

Sauli anachaguliwa kuwa mfalme.

¹⁷Kisha Samweli akawaita watu kuja kwake Bwana huko Misipa.

¹⁸Akawaambia wana wa Isiraeli: Hivi ndivyo, anavyosema Bwana Mungu wa Isiraeli: Mimi niliwatoa Waisiraeli Misri, nikawaponya mikononi mwa Wamisri namo mikononi mwa wafalme wote waliowasumbua ninyi.

¹⁹Nanyi siku hii ya leo mmemkataa Mungu wenu aliyewaokoa katika mabaya na katika masongano yenu yote mkimwambia: Tuwekee mfalme, atutawale! Sasa jipangeni hapa machoni pake Bwana kwa mashina yenu na kwa maelfu yenu![#1 Sam. 8:7.]

²⁰Samweli alipokwisha kuyafikisha mashina yote, wakipiga kura, likashikwa shina la Benyamini.[#1 Sam. 14:41-42.]

²¹Kisha alipolifikisha shina la Benyamini milango kwa milango, ukashikwa mlango wa Matiri, kisha akashikwa Sauli, mwana wa Kisi. Lakini walipomtafuta hawakumwona.

²²Ndipo, walipomwuliza Bwana tena: Mtu huyu amefika kweli huku? Bwana akajibu: Mtazameni, amejificha kwenye mizigo!

²³Wakapiga mbio kwenda kumchukua huko. Alipokuja kusimama katikati ya watu aliwapita watu wote kwa urefu wa kichwa, kikianza kupimwa mabegani.

²⁴Samweli akawaambia watu wote: Mmemwona, Bwana aliyemchagua? Kwani kwao watu wote hakuna afananaye naye. Ndipo, wote walipopiga yowe za kumshangilia kwamba: Pongezi, mfalme![#1 Fal. 1:25.]

²⁵Kisha Samweli akawaambia watu haki yake mfalme, akaiandika katika kitabu, akakiweka hapo pake Bwana; kisha Samweli akawaaga watu wote, waende zao kila mtu nyumbani kwake.[#1 Sam. 8:11; 5 Mose 17:14-20.]

²⁶Naye Sauli akaenda zake nyumbani kwake huko Gibea, nao vijana wenye nguvu, Mungu aliowahimiza mioyoni, wakamsindikiza.

²⁷Lakini watu wasiofaa kitu wakasema: Huyu atatuokoaje? Wakambeza, hawakumletea matunzo. Lakini yeye akawa, kama hakuyasikia, waliyoyasema.[#1 Sam. 11:12.]