Anawaonya, watakate.

¹*Pamesalia, ndugu, tuwahimize na kuwabembeleza, kwa hivyo, mlivyo wake Bwana Yesu, mfanye mwenendo uwapasao wa kumpendeza Mungu ulivyo.

²Kwani mwayajua maagizo, tuliyowaagiza, kama tulivyoyapata kwake Bwana Yesu.

³Kwani haya ndiyo, Mungu ayatakayo: mtakaswe, mwuepuke ugoni.

⁴Kila mmoja wenu ajue kuuangalia mwili wake, uwepo ukitakata na kupata heshima iupasayo,[#1 Kor. 6:13,15.]

⁵usivurugikane na tamaa na kijicho, kama wamizimu walivyofanya, wasiomjua Mungu!

⁶Katika jambo hili mtu asiupite mpaka akimdanganya ndugu yake, kwani Bwana ndiye atakayeyalipizia hayo yote, kama tulivyowaambia kale na kuwashuhudia.

⁷Kwani Mungu hakutuitia kuwa wenye uchafu, ila tuje, tutakaswe.

⁸Basi, kwa hiyo mtu akiyatangua haya, hatangui ya mtu, ila yake Mungu aliyewapa ninyi Roho wake Mtakatifu, awakalie.[#Luk. 10:16.]

Upendano sharti ukue.

⁹Kwa ajili ya upendano ninyi hampaswi na kuandikiwa neno, kwani ninyi wenyewe mmefundishwa na Mungu kupendana.[#Yer. 31:33-34; Yoh. 13:34.]

¹⁰Nanyi mnawafanyia hivi ndugu wote katika nchi yote ya Makedonia. Lakini twawaonya ninyi, ndugu, lifulizieni jambo hili!

¹¹Uchuchumieni utulivu, mpate kuyafuata mambo yenu wenyewe na kufanya kazi kwa mikono yenu, kama tulivyowaagiza![#Ef. 4:28; 2 Tes. 3:8,12.]

¹²Sharti mfanye mwenendo uwafaliao wale watu wa nje, kwao msitake mtu wo wote wa kuwasaidia.*[#Kol. 4:5.]

Kufufuka na kumwona Bwana.

¹³*Lakini, ndugu, hatutaki, ninyi mkose kujua, mambo yao waliolala yalivyo, msione masikitiko kama wale wengine wasio na kingojeo.[#1 Kor. 15:20; Ef. 2:12.]

¹⁴Kwani tukiyategemea, ya kuwa Yesu alikufa, kisha akafufuka tena, vivyo hivyo Mungu nao waliolala katika Yesu atawapeleka, wawe pamoja naye.[#Rom. 14:9; 1 Kor. 15:3-4,12.]

¹⁵Kwani neno hili, tunalowaambia, ni neno lake Bwana kwamba: Sisi tunaoishi, tuliosazwa, mpaka Bwana atakapokuja, hatutawatangulia wale waliolala.[#Mat. 16:28; 24:30-31; 1 Kor. 15:51.]

¹⁶Kwani Bwana mwenyewe atashuka toka mbinguni papo hapo, wito utakapovumika, nayo sauti ya malaika mkuu itasikilika, hata baragumu la Mungu litalia. Ndipo, waliokufa katika Kristo watakapofufuka kwanza;[#1 Kor. 15:23,52.]

¹⁷kisha sisi tuliosazwa, tutakaokuwa tu hai, tutapokonywa katika mawingu pamoja nao hao, tupate kukutana na Bwana angani. Hivyo tutakuwa pamoja na Bwana siku zote.[#Yoh. 12:26; 17:24.]

¹⁸Tulizaneni mioyo ninyi kwa ninyi na kisimuliana maneno haya!*