Mfumbuaji Azaria anamshikiza Asa.

¹Roho ya Mungu ikaja kumkalia Azaria, mwana wa Odedi,

²akamtokea Asa, akamwambia: Nisikilizeni, wewe Asa nanyi nyote Wayuda na Wabenyamini: Bwana yuko pamoja nanyi, mkiwa naye; mkimtafuta, atawaonekea ninyi, lakini mkimwacha, atawaacha nanyi.

³Siku nyingi Waisiraeli walikuwa pasipo Mungu wa kweli, pasipo mtambikaji aliyewafundisha Maonyo.[#Hos. 3:4.]

⁴Waliposongeka wakamrudia Bwana Mungu wa Isiraeli, wakamtafuta, naye akawaonekea.[#Yer. 29:13-14.]

⁵Siku zile hawakupata kutengemana, wala aliyetoka, wala aliyeingia, kwani wenyeji wote wa nchi hizi walikuwa na mahangaiko mengi.

⁶Ikasukumana, kabila na kabila nyingine, hata mji na mji mwingine, kwani Mungu aliwatisha na kuwasonga po pote.[#Luk. 21:10.]

⁷Lakini ninyi jitieni nguvu, wala msiilegeze mikono yenu! Kwani matendo yenu yatapata mshahara wao.[#1 Kor. 15:58.]

Sikukuu ya kumshukuru Mungu.

⁸Asa alipoyasikia hayo maneno ya ufumbuaji wa mfumbuaji Odedi akajishupaza, akayatowesha matapisho katika nchi yote ya Yuda na ya Benyamini, hata katika miji, aliyoiteka milimani kwa Efuraimu, nayo meza ya kumtambikia Bwana iliyokuwa mbele ya ukumbi wa Bwana akairudishia upya.

⁹Kisha akawakusanya Wayuda na Wabenyamini wote nao waliokaa ugenini kwake, Waefuraimu na Wamanase na Wasimeoni, kwani wengi waliokuwa Waisiraeli walirudi upande wake walipoona, ya kuwa Bwana Mungu wake yuko pamoja naye.

¹⁰Wakakusanyika Yerusalemu katika mwezi wa tatu wa mwaka wa kumi na tano wa Ufalme wa Asa,

¹¹wakamtolea Bwana siku hiyo ng'ombe za tambiko, walizozitoa katika mateka: ng'ombe 700 na kondoo 7000.

¹²Wakaagana, wamtafute Bwana Mungu wa baba zao kwa mioyo yao yote na kwa roho zao zote,[#Yos. 24:25.]

¹³kwamba: Kila asiyemtafuta Bwana Mungu wa Isiraeli auawe, mdogo kwa mkubwa, mume kwa mke.

¹⁴Wakamwapia Bwana kuyafanya hayo wakipaza sauti za kumshangilia na kupiga matarumbeta na mabaragumu.

¹⁵Wayuda wote wakakifurahia hicho kiapo, kwani waliapa kwa mioyo yao yote; kwa kuwa walimtafuta Bwana kwa kupendezwa kabisa, akawaonekea, akawapatia kutulia pande zote.[#2 Mambo 14:6-7; 20:30.]

¹⁶Mfalme Asa akamwondoa naye mama yake Maka katika ukuu wake, kwa kuwa alitengeneza kinyago cha Ashera, nacho kinyago chake Asa akakikatakata na kukipondaponda, kisha akakiteketeza penye kijito cha Kidoroni.

¹⁷Lakini matambiko ya vilimani hayakutoweka kwao Waisiraeli, lakini moyo wake Asa ulikuwa mtimilifu siku zake zote.

¹⁸Navyo, baba yake alivyovitakasa, pamoja navyo alivyovitakasa mwenyewe, fedha na dhahabu na vyombo, akavipeleka Nyumbani mwa Mungu.

¹⁹Vita havikuwako hata mwaka wa 35 wa ufalme wa Asa.