Asa anatafuta msaada kwa mfalme wa Ushami.

¹Katika mwaka wa 36 wa ufalme wa Asa ndipo, Basa, mfalme wa Waisiraeli, alipopanda kuijia nchi ya Yuda, akajenga Rama, asipatikane mtu anayeweza kutoka wala kuingia kwa Asa, mfalme wa Wayuda.

²Ndipo, Asa alipochukua fedha na dhahabu katika vilimbiko vya Nyumba ya Bwana na vya nyumba ya mfalme, akazituma kwake Benihadadi, mfalme wa Ushami, aliyekaa Damasko, kumwambia:

³Liko agano, tuliloliagana mimi na wewe, naye baba yangu na baba yako; kwa hiyo ninatuma kwako fedha na dhahabu. Nenda, ulivunje agano, uliloliagana na Basa, mfalme wa Waisiraeli, aondoke kwangu!

⁴Benihadadi akamwitikia mfalme Asa, akawatuma wakuu wa vikosi vyake, alivyokuwa navyo, kwenda kupigana na miji ya Waisiraeli, wakaiingia miji ya Iyoni na Dani na Abeli-Maimu na miji yote ya Nafutali iliyokuwa yenye vilimbiko.

⁵Basa alipoyasikia haya akaacha kuujenga Rama na kuzikomesha kazi zake.

⁶Kisha mfalme Asa akawatwaa Wayuda wote, wakayachukua mawe ya huko Rama nayo miti yake, Basa aliyoitumia ya kujenga Rama, naye akaitumia ya kujenga Geba na Misipa.

Mfumbuaji Hanani anamwonya Asa.

⁷Siku hizo mtazamaji Hanani akaja kwa Asa, mfalme wa Wayuda, akamwambia: Kwa kuwa umemwegemea mfalme wa Ushami, usimwegemee Bwana Mungu wako, kwa hiyo vikosi vya mfalme wa Ushami vimeponyoka mkononi mwako.[#Yer. 17:5.]

⁸Wale Wanubi na Walibia hawakuwa vikosi vingi vyenye magari na wapanda farasi wengi mno? Lakini kwa kuwa ulimwegemea Bwana, akawatia mkononi mwako.[#2 Mambo 14:9-13.]

⁹Kwani macho ya Bwana huzunguka katika nchi zote, ajitokeze kuwa mwenye nguvu kwao waliomwelekezea mioyo yao yote mizima. Katika jambo hili umefanya upumbavu, kwa hiyo tangu sasa huna budi kupiga vita.

¹⁰Asa akamkasirikia mtazamaji, akamfunga nyumbani mwenye mikatale, kwani alimchafukia kwa ajili ya hayo. Nao watu wengine Asa akawakorofisha siku zile.[#2 Mambo 18:26; Mat. 14:3.]

Kufa kwake Asa.

¹¹Mambo ya Asa, ya kwanza na ya mwisho, tukitaka kuyatazama, tunayaona, yameandikwa katika kitabu cha wafalme wa Wayuda na wa Waisiraeli.

¹²Katika mwaka wa 39 wa ufalme wake Asa akaugua miguu, huu ugonjwa wake ukazidi sana; namo katika huu ugonjwa wake hakumtafuta Bwana, ila waganga.

¹³Kisha Asa akaja kulala na baba zake, akafa katika mwaka wa 41 wa ufalme wake.

¹⁴Wakamzika penye makaburi yake, aliyojichimbia mjini mwa Dawidi; wakamlaza katika kilalo walichokijaza uvumba wa namna nyingi na manukato yaliyotengenezwa na mafundi, wakamvukizia mavukizo makubwa sana.[#2 Mambo 21:19; Yer. 34:5.]