Yosafati anabarikiwa kwa kumcha Mungu.

¹Mwanawe Yosafati akawa mfalme mahali pake, akajipatia nguvu za kuwatawala Waisiraeli.[#1 Fal. 15:24.]

²Akaweka vikosi vya askari katika miji yote ya Yuda iliyokuwa na maboma, kisha akaweka wenye amri katika nchi ya Yuda, namo katika miji ya Efuraimu, baba yake Asa aliyoiteka.

³Bwana akawa naye Yosafati, kwani aliendelea katika njia ya kwanza ya babu yake Dawidi, asiitafute miungu ya Baali,

⁴ila alimtafuta Mungu wa baba yake, akaendelea na kuyashika maagizo yake, asifanye matendo ya Waisiraeli.

⁵Kwa hiyo Bwana akaushupaza ufalme wake mkononi mwake, Wayuda wote wakampa Yosafati matunzo, akapata mali na macheo mengi.[#2 Mambo 18:1.]

⁶Kwa kuzishika njia za Bwana moyo wake ukawa mkuu, kisha akayaondoa matambiko ya vilimani na miti ya Ashera katika nchi ya Yuda.

⁷Katika mwaka wa tatu wa ufalme wake akatuma watu wake Benihaili na Obadia na Zakaria na Netaneli na Mikaya, waende kufundisha watu katika miji ya Yuda;

⁸pamoja nao walikuwa Walawi Semaya na Netania na Zebadia na Asaheli na Semiramoti na Yonatani na Adonia na Tobia na Tobu-Adonia; pamoja nao hawa Walawi walikuwa watambikaji Elisama na Yoramu.

⁹Wakawafundisha watu katika nchi ya Yuda wakikishika kitabu cha Maonyo ya Bwana, wakazunguka katika miji yote ya Yuda na kufundisha watu.

¹⁰Stusho la Bwana likaziguia nchi zote zenye wafalme zilizoizunguka nchi ya Yuda, wasipigane na Yosafati.

¹¹Kwao Wafilisti wakatoka wajumbe, wakamletea Yosafati matunzo na fedha, walizozichanga, Waarabu nao wakamletea mbuzi na kondoo, madume ya kondoo walikuwa 7700, hata madume ya mbuzi 7700.[#1 Fal. 14:21.]

¹²Ndivyo, Yosafati alivyoendelea kuwa mkuu zaidi, akajenga katika nchi ya Yuda ngome na miji yenye vilimbiko.

¹³Akawa na mapato mengi mle mijini mwa Yuda, namo Yerusalemu akawa na watu wa kupiga vita waliokuwa mafundi wenye nguvu.

¹⁴Wakijipanga kwa milango ya baba zao, ikawa hivyo: Wayuda walikuwa na wakuu wa maelfu, mkuu mwenyewe ni Adina, pamoja naye wakawa mafundi wa vita wenye nguvu 300000.

¹⁵Wa pili ni mkuu Yohana, pamoja naye wakawa watu 280000.

¹⁶Akafuatwa na Amasia, mwana wa Zikiri, aliyejitoa mwenyewe kuwa mtu wa Bwana, pamoja naye wakawa mafundi wa vita wenye nguvu 200000.

¹⁷Kwao Wabenyamini Eliada alikuwa fundi wa vita mwenye nguvu, pamoja naye wakawa watu 200000 waliochukua pindi na ngao.

¹⁸Wa pili alikuwa Yozabadi, pamoja naye wakawa watu 180000 wenye mata ya vita.

¹⁹Hawa ndio waliomtumikia mfalme kuliko wale, mfalme aliowaweka katika miji yenye maboma katika nchi yote ya Yuda.