Yosafati na Ahabu wanampelekea mfalme wa Ushami vita.

¹Ikawa, Yosafati alipopata mali na macheo mengi akamwoza mwanawe binti Ahabu.[#2 Mambo 17:5.]

²Miaka ilipopita michache, akashuka kwenda Samaria kwake Ahabu; Ahabu akamchinjia yeye na watu wake, aliokuwa naye, mbuzi na kondoo na ng'ombe wengi, akamchochea kupanda Ramoti wa Gileadi.

³Ahabu, mfalme wa Waisiraeli, akamwuliza Yosafati, mfalme wa Wayuda: Utakwenda pamoja na mimi Ramoti wa Gileadi? Akamwambia: Mimi ni kama wewe, watu wangu ni kama watu wako, tutakwenda pamoja na wewe vitani.

⁴Kisha Yosafati akamwambia mfalme wa Waisiraeli: Uliza leo hivi, Bwana atakavyosema![#2 Fal. 3:11.]

⁵Ndipo, mfalme wa Waisiraeli alipowakusanya wafumbuaji, watu 400, akawauliza: Twende Ramoti wa Gileadi kupga vita au niache? Wakasema: Panda tu! Mungu atautia mkononi mwa mfalme.

⁶Yosafati akauliza: Huku hakuna tena mfumbuaji wa Bwana, tumwulize naye?

⁷Mfalme wa Waisiraeli akamwambia Yosafati: Yuko bado mtu mmoja wa kumwuliza neno la Bwana, lakini mimi ninamchukia, kwani hanifumbulii yatakayokuwa mema, ila siku zote husema yatakayokuwa mabaya, naye ndiye Mikaya, mwana wa Imula. Yosafati akasema: Mfalme asiseme hivyo!

⁸Ndipo, mfalme wa Waisiraeli alipomwita mtumishi mmoja wa nyumbani, akamwambia: Piga mbio kumwita Mikaya, mwana wa Imula!

⁹Mfalme wa Waisiraeli na Yosafati, mfalme wa Wayuda, walikuwa wamekaa kila mmoja katika kiti chake cha kifalme na kuvaa mavazi, wakawa wakikaa hapo pa kupuria ngano penye lango la kuuingilia mji wa Samaria, nao wafumbuaji wote wakawa wakifumbua mbele yao.

¹⁰Ndipo, Sedekia, mwana wa Kenaana, alipojifanyizia pembe za chuma, akasema: Hivi ndivyo, Bwana anavyosema: Kwa pembe kama hizi utawakumba Washami, mpaka uwamalize.

¹¹Nao wafumbuaji wote wakafumbua hivyo kwamba: Upandie Ramoti wa Gileadi! Utafanikiwa, naye Bwana atautia mkononi mwake mfalme.

¹²Yule mjumbe aliyekwenda kumwita Mikaya akamwambia kwamba: Tazama, maneno ya wafumbuaji ni kinywa kimoja tu cha kufumbua mema yatakayomjia mfalme, Basi, neno lako nalo na liwe kama neno la mmoja wao hao, useme mema yatakayokuwa.

¹³Mikaya akasema: Hivyo, Bwana alivyo Mwenye uzima, nitasema hayo tu, Mungu wangu atakayoniambia.

Mfumbuaji Mikaya anamkataza Yosafati kwenda vitani.

¹⁴Alipofika kwake mfalme, mfalme akamwuliza: Mika, twende Ramoti wa Gileadi kupiga vita au niache? Akasema: Pandeni! Mtafanikiwa, maana watatiwa mikononi mwenu.

¹⁵Mfalme akamwambia: Nimekuapisha mara nyingi, usiniambie mengine katika Jina la Bwana, isipokuwa iliyo ya kweli.

¹⁶Ndipo, aliposema: Nimewaona Waisiraeli, nao walikuwa wametawanyika milimani kama kondoo wasio na mchungaji, naye Bwana akasema: Hawa hawana bwana, na warudi na kutengemana kila mtu nyumbani kwake.

¹⁷Mfalme wa Waisiraeli akamwambia Yosafati: Sikukuambia: Hanifumbulii yatakayokuwa mema, ila yatakayokuwa mabaya tu?

¹⁸Mikaya akasema: Lakini lisikieni neno la Bwana! Nimemwona Bwana, akikaa katika kiti chake kitukufu, navyo vikosi vyote vya mbinguni vikasimama kuumeni na kushotoni kwake.

¹⁹Bwana akauliza: Yuko nani atakayemponza Ahabu, mfalme wa Waisiraeli, aje kuupandia Ramoti wa Gileadi, aangushwe huko? Wakajibu, mmoja akisema hivi, mmoja hivi.

²⁰Kisha akatokea roho, akasimama mbele ya Bwana, akasema: Mimi nitamponza. Bwana akamwuliza: Kwa nini?

²¹Akasema: Nitatoka kuwa roho ya uwongo vinywani mwa wafumbuaji wake wote. Bwana akasema: Utamponza kweli, utaweza hivyo, toka kufanya hivyo!

²²Sasa tazama! Bwana ametia roho ya uwongo vinywani mwa hawa wafumbuaji wako, maana yeye Bwana amekwisha kukutakia mabaya.

²³Ndipo, Sedekia, mwana wa Kenaana, alipomkaribia Mikaya, akampiga makofi na kumwuliza: Roho ya Mungu imeshika njia gani, inipite mimi, ije kusema na wewe?[#2 Mambo 18:10.]

²⁴Mikaya akasema: Jiangalie! Utaviona siku hiyo, utakapoingia chumba kwa chumba, upate kujificha.

²⁵Mfalme wa Waisiraeli akasema: Mchukueni Mikaya, mmrudishe kwa Amoni, mkuu wa mji, na kwa Yoasi, mwana wa mfalme,

²⁶mseme: Hivi ndivyo, mfalme anavyosema: Mwekeni huyu kifungoni, mmpe chakula cha mahangaiko na maji ya mahangaiko, hata nitakaporudi salama.[#2 Mambo 16:10.]

²⁷Mikaya akasema: kama utarudi salama, Bwana hakusema kinywani mwangu. Kisha akasema: Lisikieni hili, ninyi makabila yote!

Kufa kwake Ahabu.

²⁸Kisha mfalme wa Waisiraeli na Yosafati, mfalme wa Wayuda, wakapanda kwenda Ramoti wa Gileadi.

²⁹Mfalme wa Waisiraeli akamwambia Yosafati: nitavaa nguo nyingine, niingie penye mapigano, lakini wewe zivae nguo zako! Ndipo, mfalme wa Waisiraeli alipovaa nguo nyingine, kisha wakafika penye mapigano.

³⁰Naye mfalme wa Ushami alikuwa amewaagiza wakuu wa magari, aliokuwa nao, kwamba: Msipigane na mtu ye yote, mdogo kwa mkubwa, ila mpigane na mfalme wa Waisiraeli peke yake tu!

³¹Ikawa, wakuu wa magari walipomwona Yosafati wakamwazia yeye kuwa mfalme wa Waisiraeli, wakamzunguka kupigana naye. Ndipo, Yosafati alipopiga yowe, Bwana akamsaidia, yeye Mungu akawaondoa hapo, alipokuwa, na kuwadanganyadanganya.

³²Ikawa, wakuu wa magari walipoona, ya kuwa siye mfalme wa Waisiraeli, wakarudi na kuacha kumfuata.

³³Kulikuwa na mtu, akauvuta upindi wake kwa kubahatisha tu, akampiga mfalme wa Waisiraeli hapo, vyuma vya kisibau chake vilipounganishwa. Ndipo, alipomwambia mwendeshaji wa gari: ligeuze kwa mkono wako, unitoe hapa, wanapopigana, kwani nimeumia.

³⁴Mapigano yakazidi siku hiyo, kwa sababu hii mfalme wa Waisiraeli alikuwa amejisimamisha garini ng'ambo ya huku kuwaelekea Washami hata jioni, akafa, jua lilipokuchwa.