Mwenendo wa mitume.

¹*Nasi tulio wenziwe wa kazi twawaonya, msigawiwe bure kipaji cha Mungu.[#2 Kor. 1:24; 5:20.]

²Kwani anasema:

Nimekuitikia, siku zilipokuwa za kupendezwa,

nikakusaidia siku ya wokovu.

Tazameni, siku za kupendezwa kweli ndizo za sasa hivi! Tazameni, leo ni siku ile ya wokovu!

³Hakuna hata mmoja, tumkwazaye kwa jambo lo lote, utumishi wetu usibezwe.

⁴Ila po pote twajitokeza kwamba: Sisi humtumikia Mungu, kwa hivyo twavumilia mengi; maumivu, mahangaiko, masongano,[#2 Kor. 4:2.]

⁵mapigo, mafungo, mashambulio, masumbuko, kukesha na kufunga.[#2 Kor. 11:23-27.]

⁶Twataka kujijulisha kuwa wenye utakato, utambuzi, uvumilivu, utu, Roho takatifu, upendo usiojua ujanja,[#1 Tim. 4:12.]

⁷neno la kweli, nayo nguvu ya Mungu. Mata yanayotupa kushinda kuumeni na kushotoni ndiyo ya wongofu,[#1 Kor. 2:4; Ef. 6:13-17.]

⁸ikiwa twatukuzwa, au ikiwa twabezwa; ikiwa twasingiziwa, au ikiwa twashangiliwa. Tuko kama wapotezaji, lakini tu wa kweli;

⁹tuko kama wasiojulika, lakini tumetambulikana; tuko kama wenye kufa, lakini tazameni, tu wenye kuishi! Tuko kama wenye kupondwa, lakini hatuuawi;[#2 Kor. 4:10-11; Sh. 118:18.]

¹⁰tuko kama wenye kusikitika, lakini twafurahi po pote; tuko kama maskini, lakini twagawia wengi mali nyingi; tuko kama wasio na kitu cho chote, lakini vyote tunavyo.*[#Fil. 4:12-13.]

¹¹Enyi Wakorinto, tumewafumbulia vinywa vyetu, tena mioyo yetu nayo imewafungukia kabisa.

¹²Humu ndani yetu penu sipo padogo, lakini mioyoni mwenu mnasongeka.

¹³Nasema nanyi kama na watoto wangu, nikiwaambia: Tulipeni vivyo hivyo, mkitupatia nasi pakubwa mioyoni mwenu![#1 Kor. 4:14.]

Kuwaepuka wasio wa Mungu.

¹⁴*Msiingie utumwa wa mwingine pamoja nao wasiomtegemea Mungu! Je? Yako magawio wongufu na upotovu unayoyagawiana? Au iko bia ya mwanga na ya giza?[#Ef. 5:11.]

¹⁵Yako mapatano ya Kristo na ya Beliali? Au liko fungu lililo lake amtegemeaye Mungu nalo lake asiyemtegemea Mungu?

¹⁶Au iko nyumba yake Mungu inayofanana napo penye mizimu? Kwani sisi tu nyumba yake Mungu aliye Mwenye uzima; kama Mungu alivyosema:

Nitakaa katikati yao, tena nitatembea katikati yao,

nami nitakuwa Mungu wao, nao watakuwa ukoo wangu.

¹⁷Kwa hiyo Bwana anasema:

Tokeni kati yao, mjitenge,

msiguse yenye uchafu, nami nipate kuwapokea!

¹⁸Ndipo, nitakapokuwa Baba yenu,

nanyi mtakuwa wanangu wa kiume na wa kike.

Hivi ndivyo, anavyosema Bwana Mwenyezi.