Kuchanga vipaji.

¹Ndugu, twawatambulisha kipaji cha Mungu, wateule wa Makedonia walichogawiwa:[#Rom. 15:26.]

²maana walipojaribiwa na maumivu yao mengi wameshinda, wakachangamka sana; kwa hiyo hao walio wenye umaskini usiopimika wakajikaza kuonyesha wingi wa mali zilizomo katika mioyo yenye neno moja tu.

³Kwani nawashuhudia kwamba: Wenyewe walipendezwa na kuchanga, kama walivyoweza, na kupapita hapo, walipoweza.

⁴Wakatubembeleza sana na kutuomba, tusiwakataze kulitoa fungu lao la kuingia katika bia hiyo ya kuwatumikia watakatifu.[#2 Kor. 9:1; Tume. 11:29.]

⁵Tena hawakutoa, kama tulivyowangojea, ila kwanza walijitoa wenyewe kumtumikia Bwana na sisi; hivyo wameyamaliza, Mungu ayatakayo.

⁶Kwa hiyo tulimhimiza Tito, aitimize hata kwenu kazi hiyo ya vipaji, kama alivyoianza kwanza.

⁷Lakini kama mwapitavyo wengine katika mambo yo yote, ikiwa kumtegemea Mungu au kupiga mbiu au kutaka utambuzi au kujihimiza kufanya mema yo yote au kutupenda kwa moyo, kama tunavyowapenda ninyi, hivyo sharti mwapite hata katika vipaji hivi.[#1 Kor. 1:5; 16:1-2.]

⁸Sisemi, kwamba niwatolee nguvu, lakini kwa hivyo, wengine walivyojihimiza, nataka, upendo wenu nao utambulike, ya kama ni wa kweli.

⁹Kwani mmekitambua kipaji, tulichopewa na Bwana wetu Yesu Kristo: Huyu alikuwa mwenye mali nyingi, akawa maskini kwa ajili yenu, kwamba umaskini wake yeye uwapatie ninyi mali nyingi.[#Mat. 8:20; Fil. 2:7.]

¹⁰Nami niliyoyatambua humu, ndiyo, ninayowatolea, kwani yanawafalia ninyi: mwaka wa jana mlitangulia kuifanya kazi hiyo; tena siko kuifanya tu, mlianza hata kuiitikia.

¹¹Lakini sasa sharti mmalize kuifanya, maana kama mapenzi yenu ya kuiitikia yalivyotokea upesi, vivyo hivyo mtokeze nayo mapenzi ya kuifanya mkichanga kwa vile, mlivyo navyo.

¹²Kwani kama yako mapenzi, mtu hupendezeka akivitoa, alivyo navyo, asivitoe, asivyo navyo.[#Fano. 3:28; Mar. 12:43.]

¹³Kwani hatuchangii kwamba: Wengine wapate kutulia, ninyi mkiumizwa, ila sharti yalinganike:

¹⁴mapato mengi yenu yao wale sharti yapunguze makosekano yenu ya siku nyingine; hivyo yatalinganika,[#2 Kor. 9:12.]

¹⁵kama ilivyoandikwa kwamba:

Aliyeokota nyingi hakufurikiwa;

wala aliyeokota chache hakupungukiwa.

Kumtuma Tito na ndugu wengine.

¹⁶Lakini na tumshukuru Mungu aliyempa Tito kujihimiza vivyo hivyo moyoni mwake kwa ajili yenu.

¹⁷Kwani tulipombembeleza, akaitikia. Lakini kwa hivyo, alivyokaza kujihimiza, aliondoka kwenda kwenu kwa mapenzi yake mwenyewe.

¹⁸Tukatuma pamoja naye ndugu mmoja anayesifiwa kwenye wateule wote hivyo, anavyoutangaza Utume mwema.[#2 Kor. 12:18.]

¹⁹Lakini sivyo hivyo tu, ila hata kuchaguliwa amechaguliwa nao wateule kuwa mfuasi wetu wa kutusaidia katika kazi hii ya vipaji, tutumikiayo sisi, tumtukuze Bwana, tukijulikana kuwa wenye kumpendeza.[#Gal. 2:10.]

²⁰Hivyo twajikinga, mtu asitusengenye kwa ajili ya machango haya makubwa yatumikiwayo nasi.

²¹Kwani twajilindia, yaendelee vizuri, sipo mbele ya Bwana tu, ila napo mbele ya watu.

²²Tena pamoja nao tulituma ndugu yetu, tuliyemwona mara nyingi katika mambo mengi, anavyojihimiza. Lakini sasa anakaza kujihimiza, kwa sababu yako mengi, anayoyatazamia kwenu.

²³Basi, Tito mwamjua kuwa mwenzangu anayenisaidia kazi za kwenu; nao hao ndugu zetu ni mitume wa wateule, maana wampatia Kristo utukufu.[#2 Kor. 7:13; 12:18; Rom. 16:7.]

²⁴Basi, hao waonyesheni upendo wenu, tuliojivunia tulipowatukuza ninyi! Uonyesheni mbele yao wateule![#2 Kor. 7:14.]