Ufalme wa Waisiraeli: Ugonjwa wa Ahazia.

¹Ahabu alipokwisha kufa, Wamoabu wakawavunjia Waisiraeli maagano.[#2 Fal. 3:5.]

²Ahazia akaanguka dirishani penye chumba chake cha juu mle Samaria, akapata kuugua; ndipo, alipotuma wajumbe, aliowaambia: Nendeni kumwuliza Baali-Zebubu, mungu wa Ekroni, kama nitapona ugonjwa huu.[#1 Fal. 22:52; Yes. 19:3.]

³Lakini malaika wa Bwana akamwambia Elia wa Tisibe: Inuka, uwaendee wajumbe wa mfalme wa Samaria, uwaambie: Je? Kwao Waisiraeli hakuna Mungu, ninyi mkienda kumwuliza Baali-Zebubu, mungu wa Ekroni?[#Yes. 8:19.]

⁴Kwa sababu hii Bwana anasema: Hutaondoka tena hapo kitandani, unapolala, ila utakufa kweli, Kisha Elia akaenda zake.

⁵Wajumbe waliporudi kwake mfalme, akawauliza: Mbona mnarudi?

⁶Wakamwambia: Mtu ametujia, akatuambia: Haya! Rudini kwa mfalme aliyewatuma, mmwambie: Hivi ndivyo, Bwana anavyosema: Je? Kwao Waisiraeli hakuna Mungu, wewe ukituma kumwuliza Baali-Zebubu, mungu wa Ekroni? Kwa sababu hii hutaondoka tena hapo kitandani, unapolala, ila utakufa kweli.

⁷Akawauliza: Yule mtu aliyewajia na kuwaambia maneno hayo alikuwa na sura gani?

⁸Wakamwambia: Yule mtu alikuwa amevaa ngozi yenye manyoya, aliyoifunga kwa ukanda wa ngozi viunoni pake. Ndipo, aliposema: Ndiye Elia wa Tisibe.[#Zak. 13:4; Mat. 3:4.]

Elia anaangusha moto toka mbinguni.

⁹Kisha mfalme akatuma kwake Elia mkuu wa kikosi cha hamsini pamoja na watu wake hamsini; alipopanda huko, aliko, akamwona, akikaa juu mlimani, akamwambia: Mtu wa Mungu, mfalme anakuagiza: Shuka!

¹⁰Lakini Elia akamjibu huyu mkuu wa hamsini na kumwambia: Kama mimi ni mtu wa Mungu, moto na ushuke toka mbinguni, ukule wewe na watu wako hamsini.[#Luk. 9:54; Ufu. 11:5.]

¹¹Akatuma tena kwake mkuu mwingine wa kikosi cha hamsini na watu wake hamsini, naye akasema na kumwambia: Mtu wa Mungu, ndivyo, mfalme anavyosema: Shuka upesi!

¹²Elia akawajibu kwamba: Kama mimi ni mtu wa Mungu, moto na ushuke toka mbinguni, ukule wewe na watu wako hamsini. Ndipo, moto uliposhuka toka mbinguni, ukamla na watu wake hamsini.

¹³Akatuma mara ya tatu mkuu wa kikosi cha hamsini na watu wake hamsini; huyu mkuu wa tatu wa kikosi cha hamsini alipopanda na kufika kwake akampigia Elia magoti, akamwambia na kumbembeleza: Mtu wa Mungu, roho yangu nazo roho za hawa watumishi wako hamsini usiziwazie kuwa si kitu!

¹⁴Tazama, moto ulishuka toka mbinguni, ukawala wale wakuu wa hamsini wawili wa kwanza na watu wao hamsini hamsini, sasa roho yangu usiiwazie kuwa si kutu!

¹⁵Ndipo, malaika wa Bwana alipomwambia Elia: Shuka naye, usimwogope! Basi, akaondoka, akashuka naye kwenda kwa mfalme.

Kufa kwake Ahazia.

¹⁶Akamwambia: Hivi ndivyo, Bwana anavyosema: Kwa kuwa umetuma wajumbe kumwuliza Baali-Zebubu, mungu wa Ekroni, kama hakuna Mungu kwao Waisiraeli wa kumwuliza, atakavyosema, kwa sababu hii hutaondoka tena hapa kitandani, unapolala, ila utakufa kweli.[#2 Fal. 1:3-4.]

¹⁷Akafa, kwa hilo neno la Bwana, Elia alilolisema; kisha Yoramuakawa mfalme mahali pake katika mwaka wa pili wa Yoramu, mwana wa Yosafati, mfalme wa Wayuda, kwani Ahazia hakuwa na mwana.[#2 Fal. 3:1.]

¹⁸Mambo mengine ya Ahazia, aliyoyafanya, hayakuandikwa katika kitabu cha mambo ya siku za wafalme wa Waisiraeli?