Elisa anamsaidia mwanamke mjane.

¹Kulikuwa na mwanamke wa wanafunzi wa wafumbuaji, akamlilia Elisa kwamba: Mume wangu, mtumishi wako, amekufa, nawe unajua, ya kuwa mtumishi wako alikuwa mwenye kumcha Bwana; tena mtu, aliyemkopa, amekuja kuwachukua wanangu mawili, wawe watumwa wake.

²Elisa akamwuliza: Nikufanyizie nini? Niambie, nyumbani mwako unavyo vyombo gani? Akajibu: Kijakazi wako hanacho cho chote nyumbani, ni kitungi cha mafuta tu.[#1 Fal. 17:12.]

³Akamwambia: Nenda kujiombea vyombo vitupu huko nje kwao wote walio majirani zako, lakini usichukue vichache!

⁴Kisha ingia mwako, ukaufunge mlango nyuma yako na nyuma ya wanao! Kisha yale mafuta yako uyatie katika hivyo vyombo vyote; kimoja kikijaa, kiweke!

⁵Akaondoka kwake, akaja kuufunga mlango nyuma yake na nyuma ya wanawe; nao wakamletea vyombo, naye akavitia mafuta.

⁶Vyombo vilipojaa, akamwambia mwanawe: Niletee chombo kingine. Akamwambia: Hakuna tena chombo kingine. Ndipo, yale mafuta yalipokoma.

⁷Basi, akaenda kumsimulia yule mtu wa Mungu yaliyokuwa, naye akamwambia: Nenda, uyauze hayo mafuta, umlipe yule anayekudai! Yatakayosalia yatumie wewe na wanao!

Elisa anamfufua mwana wa mwanamke wa Sunemu.

⁸Ikawa siku moja, Elisa akaenda Sunemu. Huko kulikuwa na mwanamke mkuu; huyu akakaza kumwomba, ale chakula kwake. Kwa hiyo kila mara alipopita hapo akafikia kwake kula chakula.[#Yos. 19:18.]

⁹Kisha yule mwanamke akamwambia mumewe: Tazama, nimetambua, ya kuwa yule mtu asiyekawa kufikia kwetu ni mtu mtakatifu wa Mungu.

¹⁰Na tumtengenezee darini chumba kidogo, tukaweke mle kitanda na meza na kiti na taa, kila atakapokuja kwetu afikie mlemle.

¹¹Ikawa siku nyingine, alipokuja huko akafikia mle chumbani, akalala humo.

¹²Akamwambia mtoto wake Gehazi: Mwite huyo mwanamke wa Sunemu! Akamwita, naye akaja kusimama mbele yake.

¹³Akamwambia Gehazi: Mwambie: Nimeona, ulivyotusumbukia hayo masumbuko yote; nami nikufanyie nini? Unalo neno la kukusemea kwa mfalme au kwa mkuu wa vikosi? Akajibu: Mimi ninajikalia katikati yao walio ukoo wangu.

¹⁴Alipouliza tena: Nimfanyie nini? Gehazi akajibu: Hana mtoto. Naye mumewe ni mzee.

¹⁵Akasema: Mwite! Alipomwita, akaja, akasimama mlangoni.

¹⁶Akamwambia: Mwaka utakapopita, wakati kama huu utabeba mwana wa kiume kifuani. Akajibu: Bwana wangu, u mtu wa Mungu, uwimwongopee kijakazi wako![#1 Mose 18:10,14.]

¹⁷Lakini yule mwanamke akapata mimba, nao mwaka ulipopita, wakati huohuo akazaa mwana wa kiume, kama Elisa alivyomwambia.

¹⁸Mtoto alipokua, siku moja akatoka kwenda kwa baba yake shambani kwenye wavunaji.

¹⁹Mara akamwambia baba yake: Kichwa changu! Kichwa changu! Ndipo, alipomwambia kijana: Mpeleke kwa mama yake!

²⁰Akamchukua, akampeleka kwa mama yake, akakaa magotini kwake mpaka saa sita; ndipo, alipokufa.

²¹Akampeleka juu, akamlaza kitandani pake yule mtu wa Mungu, akafunga mlango nyuma yake, akatoka.

²²Kisha akamwita mumewe, akamwambia: Tuma kwangu kijana mmoja na punda jike moja, nipige mbio kwenda kwake yule mtu wa Mungu, kisha nirudi!

²³Akamwuliza: Sababu gani unataka kwenda kwake leo hivi? Hakuna mwandamo wa mwezi wala siku ya mapumziko. Akajibu: Si neno.

²⁴Kisha akamtandika punda, akamwambia kijana wake: Uende ukimkimbiza, usinikawilishe safarini, nisipokuambia!

²⁵Ndivyo, alivyokwenda, akafika kwa yule mtu wa Mungu mlimani kwa Karmeli. Yule mtu wa Mungu alipomwona ng'ambo ya huko akamwambia mtoto wake Gehazi: Tazama, yule kule ni mwanamke wa Sunemu![#2 Fal. 2:25.]

²⁶Sasa piga mbio, umkute njiani, umwulize: Hujambo? Naye mumeo hajambo? Naye mtoto hajambo? Akajibu: Hawajambo.

²⁷Alipofika mlimani kwake yule mtu wa Mungu akamshika miguu; ndipo, Gehazi alipokuja, amwondoe, lakini yule mtu wa Mungu akamwambia: Mwache! Kwani anayo machungu rohoni; naye Bwana amenificha jambo hili, hakuniambia.

²⁸Ndipo, yule mwanamke aliposema: Bwana wangu, nilikuomba kunipatia mtoto? Sikukuambia: Usinidanganye?[#2 Fal. 4:16.]

²⁹Naye Elisa akamwambia Gehazi: Funga viuno vyako, uichukue fimbo yangu mkononi mwako, uende! Ukiona mtu, usimwamkie! Kama anakuamkia, usimjibu! Uiweke fimbo yangu usoni pa mtoto![#Luk. 10:4.]

³⁰Ndipo, mama ya mtoto aliposema: Hivyo, Bwana alivyo Mwenye uzima, tena hivyo, wewe mwenyewe ulivyo mzima, sitakuacha kabisa! Ndipo, alipoinuka kufuatana naye.

³¹Lakini Gehazi alikuwa amekwenda mbele yao, akaiweka ile fimbo usoni pa mtoto, lakini haikuwako sauti wala pumzi. Ndipo, aliporudi kukutana naye mwenyewe, akamwambia kwamba: Mtoto hakuamka.

³²Elisa alipoingia mle chumbani akamwona mtoto, ya kuwa ni mfu, amelazwa kitandani pake.

³³Akaenda, akajifungia mlango, wawe wawili tu, yeye na mtoto, kisha akamwomba Bwana.[#Tume. 9:40.]

³⁴Akapanda, akamlalia mtoto akiweka kinywa chake kinywani pake na macho yake machoni pake navyo viganja vyake viganjani pake; alipomlalia hivyo, mwili wake mtoto ukapata jasho.[#1 Fal. 17:21.]

³⁵Kisha Elisa akaondoka tena, akatembea chumbani mara moja huku, mara moja huko, kisha akapanda tena kumlalia hivyo; ndipo, mtoto alipopiga chafya mara saba, kisha akayafumbua macho yake.

³⁶Akamwita Gehazi, akamwambia: Mwite huyo mwanamke wa Sunemu! Akamwita. Alipoingia kwake, akamwambia: Mchukue mwanao![#Luk. 7:15; Ebr. 11:35.]

³⁷Akaja, akamwangukia miguuni pake na kumwinamia; kisha akamchukua mwanawe, akatoka.

Elisa anaponya watu katika njaa.

³⁸Elisa aliporudi Gilgali, kulikuwa na njaa katika nchi hiyo. Wanafunzi wa wafumbuaji walipokuja kukaa mbele yake, akamwambia mtoto wake: Weka chungu kikubwamotoni, uwapikie hawa wanafunzi wa wafumbuaji chakula.

³⁹Mmoja akaenda shambani, akachuma mboga, akaona mtango wa mwituni, akachuma kwake hayo matango ya mwituni, akaijaza nguo yake, kisha akaja, akayakatakata chunguni kuwa chakula, kwani hawakuyajua.

⁴⁰Kisha wakawaita watu, waje kula. Ikawa, walipokila chakula hicho wakalia kwamba: Kifo kimo chunguni, wewe mtu wa Mungu! Hawakuweza kula.

⁴¹Akasema: Leteni unga! Akautupa chunguni, akasema: Wapakulieni watu hawa, wapate kula! Hakikuwamo tena mle chunguni kilichokuwa kibaya.

⁴²Kisha akaja mtu kutoka Baali-Salisa, akamletea yule mtu wa Mungu mikate ya malimbuko, nayo ilikuwa mikate ishirini ya mawele, tena gunia lenye masuke mabichi, akasema: Wapeni, watu hawa wale!

⁴³Mtumishi wake akamwambia: watu mia niwaandalie hii mikate namna gani? Akasema: Wape tu watu hawa, wale! Kwani hivi ndivyo, Bwana anavyosema: Watakula, kisha wasaze.[#Mat. 15:33; Yoh. 6:9.]

⁴⁴Ndipo, alipowaandalia, wakala, wakasaza, kama Bwana alivyosema.[#Mat. 16:9-10.]