Elisa anaeleza chuma.

¹Wanafunzi wa wafumbuaji wakamwambia Elisa: Tazama, mahali hapa, tunapokaa machoni pako, ni padogo, hatuenei hapa.

²Na twende Yordani, tuchukue huko kila mtu nguzo moja, tujitengenezee huko mahali pa kukaa. Akajibu: Nendeni!

³Mmoja wao akasema: Ingefaa, wewe uende pamoja na watumishi wako. Akasema: Basi, nami nitakwenda.

⁴Akaenda nao; walipofika Yordani, wakakata miti.

⁵Ikawa, mmoja alipokata nguzo yake, chuma cha shoka yake kikaanguka majini, akalia kwamba: E bwana wangu! Nacho kimekopwa kwa mtu!

⁶Yule mtu wa Mungu akauliza: Kimeangukia wapi? Alipomwonyesha pale mahali, akakata kijiti, akakitupa hapohapo; ndivyo, alivyokieleza kile chuma.

⁷Kisha akamwambia: Kiokote! Naye akaunyosha mkono wake, akakikamata.

Washami wanapofushwa vitani kwa kuomba kwake Elisa.

⁸Mfalme wa Ushami akawa akiwapelekea Waisiraeli vita. Lakini kila alipopatana na watumishi wake kwamba: Nitapiga makambi yangu mahali fulani,

⁹yule mtu wa Mungu akatuma kwa mfalme wa Waisiraeli kumwambia: Angalia, usipitie mahali hapo! kwani ndiko, Washami watakakoshukia.

¹⁰Kwa hiyo mfalme wa Waisiraeli alipotaka kutuma watu kwenda mahali pale, yule mtu wa Mungu alipomkataza, akapona hapo, tena si mara moja wala mbili tu.

¹¹Ndipo, moyo wa mfalme wa Ushami ulipochafuka kwa ajili hiyo, akawaita watumishi wake, akawauliza: Hamwezi kuniambia, kama ni nani wa kwetu aliye upande wa mfalme wa Waisiraeli?

¹²Mmoja wao watumishi wake akasema: Sivyo, bwana wangu mfalme, kwani mfumbuaji Elisa alioko kwao Waisiraeli humsimulia mfalme wa Waisiraeli nayo maneno, unayoyasema chumbani mwako mwa kulalia.

¹³Ndipo, alipoagiza: Nendeni kutazama, aliko! Kisha nitatuma kumkamata. Alipopashwa habari kwamba: Yuko Dotani,

¹⁴akatuma kikosi kikubwa chenye farasi na magari kwenda huko; wakafika usiku, wakauzunguka ule mji.

¹⁵Mtumishi wa yule mtu wa Mungu alipoamka asubuhi, aondoke kutoka nje, akaona, ya kuwa kiko kikosi kinachouzunguka huo mji pamoja na farasi na magari; ndipo, yule mtoto wake alipomwambia: E bwana wangu, tufanyeje?

¹⁶Akajibu: Usiogope! Kwani walio upande wetu ndio wengi kuliko wao walio upande wao.[#2 Mambo 32:7.]

¹⁷Kisha Elisa akaomba na kusema: Bwana, mfumbue macho, apate kuona! Ndipo, Bwana alipomfumbua yule kijana macho, apate kuona, akaona, ya kuwa huo mlima wote umejaa farasi na magari ya moto yaliyomzunguka Elisa pande zote.

¹⁸Wale askari walipomshukia, Elisa akamwomba Bwana kwamba: Wapige wamizimu hawa, wapofuke! Akawapiga, wakapofuka, kama Elisa alivyoomba.[#1 Mose 19:11.]

¹⁹Kisha Elisa akawaambia: Njia hii siyo, wala mji huu sio; nifuateni, niwapeleke huko, yule mtu, mnayemtafuta, aliko! Akawapeleka Samaria.

²⁰Walipofika Samaria, Elisa akasema: Bwana, wafumbue watu hawa macho! Ndipo, Bwana alipowafumbua macho, wakaona, ya kuwa wameingia katikati ya mji wa Samaria.

²¹Mfalme wa Waisiraeli alipowaona akamwuliza Elisa: Baba, niwapige? Ukisema, nitawapiga!

²²Akajibu: Usiwapige! Je? Uliowateka kwa upanga wako na kwa upindi wako huwapiga? Waandalie vyakula na vya kunywa, wale, wanywe, kisha waende zao kwa bwana wao![#2 Mambo 28:15; Fano. 25:21.]

²³Ndipo, alipowatengenezea karamu kubwa, wakala, wakanywa; kisha akawapa ruhusa, wakaenda zao kwa bwana wao. Kisha vikosi vya Ushami havikurudi tena kuingia katika nchi ya Waisiraeli.

Njaa inaingia Samaria.

²⁴Hayo yalipokwisha kufanyika, Benihadadi, mfalme wa Ushami, akavikusanya vikosi vyake vyote, akapanda, akausonga Samaria kwa kuuzinga.

²⁵Mle Samaria ikajamo njaa kubwa; hapo, walipousonga kwa kuuzinga, kichwa cha punda kikapata kuuzwa kwa fedha 80, ndio shilingi 320, nacho kibaba cha mavi ya njiwa kikapata fedha 5, ndio shilingi 20.

²⁶Siku moja mfalme alipotembea bomani, mwanamke akamlilia kwamba: Bwana wangu mfalme, nisaidie!

²⁷Akajibu: Bwana asipokusaidia, mimi nitawezaje kukusaidia? Je? Ninacho kitokacho penye kupuria ngano au penye kukamulia zabibu?

²⁸Kisha mfalme akamwuliza: Shauri lako nini? Akasema: Huyu mwanamke mwenzangu aliniambia: Nipe mwanao, tumle leo! Kisha kesho tutamla wangu.

²⁹Basi, tukampika mwanangu, tukamla. Tena kesho yake, nilipomwambia: Nipe mwanao, tumle! akamficha.[#5 Mose 28:53.]

³⁰Mfalme alipoyasikia maneno ya huyu mwanamke, akayararua mavazi yake papo hapo, alipokuwa anatembea bomani; nao watu walipomtazama, wakaona, ya kuwa amevaa gunia ndani penye mwili wake.

³¹Akasema: Mungu anifanyizie hivi na hivi, Elisa, mwana wa Safati, akishinda leo mwenye kichwa chake!

³²Naye Elisa alikuwa akikaa nyumbani mwake, nao wazee walikaa kwake. Lakini mfalme alikuwa ametuma mtu kwenda mbele yake; huyu mjumbe alipokuwa hajafika bado kwake, yeye Elisa akwaambia wazee: Je? mmeona, ya kuwa amemtuma huyu mwuaji, anikate kichwa? Angalieni! Mjumbe atakapofika, fungeni mlango na kumzuia mlangoni! Je? Hili silo shindo la miguu ya bwana wake anayemfuata?

³³Angali akisema nao, mara mjumbe yule akashuka kufika kwake, akasema: Tazameni, mabaya haya yametoka kwake Bwana! Iko nini tena, tutakayongojea, itoke kwake Bwana?[#Amo. 3:6.]