Kukosa na kufa kwake Amunoni.

¹Hayo yalipokwisha kufanyika, Abisalomu, mwana wa Dawidi, alikuwa na umbu lake, jina lake Tamari, naye alikuwa mzuri; kwa hiyo Amunoni, mwana wa Dawidi, akampenda.[#2 Sam. 3:2.]

²Naye Amunoni akasongeka moyoni, akapata kuwa mgonjwa kwa ajili ya umbu lake Tamari, kwani alikuwa mwanamwali, naye Amunoni akaviona kuwa vigumu sana kumfanyizia lo lote.

³Lakini Amunoni alikuwa na mwenzake, jina lake Yonadabu, mwana wa Simea, kaka yake Dawidi; huyu Yonadabu alikuwa mwerevu sana.[#1 Sam. 16:9.]

⁴Huyu akamwuliza: Mbona wewe, mwana wa mfalme, unanyongeka hivyo kila kunapokucha? Huwezi kunisimulia sababu yake? Ndipo, Amunoni alipomwambia: Mimi nampenda Tamari, umbu lake ndugu yangu Abisalomu.

⁵Yonadabu akamwambia: Lala kitandani pako kuwa kama mgonjwa sana! Kisha baba yako akija kukutazama, umwambie: Kama umbu langu Tamari angekuja kuniandalia chakula na kukitengeneza hicho chakula machoni pangu, nipate kuviona, basi, ningekula na kuvipokea mkononi mwake.

⁶Kwa hiyo Amunoni akalala kitandani kuwa kama mgonjwa. Mfalme alipokuja kumtazama, Amunoni akamwambia mfalme: Kama umbu langu Tamari angekuja kuandalia machoni pangu vikate viwili, ningevila na kuvipokea mkononi mwake.

⁷Ndipo, Dawidi alipomtuma Tamari kwenda mle nyumbani kwamba: Nenda nyumbani mwa umbu lako Amunoni, umtengenezee chakula!

⁸Ndipo, Tamari alipokwenda nyumbani mwa umbu lake Amunoni, naye alikuwa amelala; akachukua unga, akaukanda, akautengeneza machoni pake kuwa vikate, akavioka hivyo vikate.

⁹Kisha akakichukua kikaango, akavitia katika sahani machoni pake, lakini Amunoni akakataa kuvila, akasema: Watoeni watu wote humu mwangu! Walipokwisha kuwatoa watu wote mwake,

¹⁰Amunoni akamwambia Tamari: Kilete hicho chakula chumbani humu, nikile na kukipokea mkononi mwako! Tamari akavichukua hivyo vikate, alivyovitengeneza, akampelekea umbu lake Amunoni mle chumbani.

¹¹Alipompa, avile, akamshika na kumwambia: Njoo, umbu langu, ulale kwangu![#3 Mose 18:9.]

¹²Lakini akamwambia: Sivyo, umbu langu, usinichukue kwa nguvu. Kwani mambo kama hayo hayafanywi kwao Waisiraeli, nawe usiufanye upumbavu huu![#5 Mose 22:21.]

¹³Mimi nami nitakwenda wapi nikitwezwa hivyo? Wewe nawe utakuwa mpumbavu mwenzao walio hivyo kwao Waisiraeli. Ila sema na mfalme sasa, kwani hatakukataza kunioa.

¹⁴Lakini hakutaka kuyasikia, aliyomwambia, akamkamata kwa nguvu na kumshurutiza, mpaka akimpata, alale naye.

¹⁵Kisha Amunoni akaingiwa na machukizo makubwa sana ya kuchukizwa naye, nayo hayo machukizo yake ya kuchukizwa naye yakawa makubwa kuliko ule upendo wake wa kwanza wa kumpenda; kwa hiyo Amunoni akamwambia: Ondoka, uende zako!

¹⁶Naye akamwambia: La, sivyo! Kibaya hiki cha kunifukuza kingekuwa kikubwa kuliko kile, ulichonifanyizia, lakini akakataa kumsikia,

¹⁷akamwita kijana aliyemtumikia, akamwambia: Mtoeni huyu humu mwangu, aende nje! Tena funga mlango, akiisha kutoka.

¹⁸Naye alikuwa amevaa rinda refu la nguo za rangi, kwani ndiyo mavazi, watoto wa kike wa mfalme waliyoyavaa siku za kuwa wanawali. Yule mtumishi wake alipomtoa nje na kufunga mlango, alipokwisha kutoka,

¹⁹Tamari akachukua uvumbi, akautia kichwani pake, akalirarua lile rinda la nguo za rangi, alilokuwa amelivaa, akabandika mkono kichwani pake, akaenda zake na kulia.[#Iy. 2:12.]

²⁰Ndipo, Abisalomu alipomwuliza umbu lake: Umbu lako Amunoni amekuwa kwako? Umbu langu, sasa nyamaza tu! Ndiye umbu lako. Neno hili usiliweke moyoni mwako! Basi, Tamari akakaa na ukiwa wake nyumbani mwa Abisalomu, umbu lake.

²¹Mfalme Dawidi alipoyasikia mambo haya, akachafuka sana.

²²Lakini Abisalomu hakusema na Amunoni wala neno baya wala jema, kwani Abisalomu alimchukia Amunoni, kwa kuwa alimchukua umbu lake Tamari kwa nguvu.

²³Miaka miwili ilipopita, Abisalomu akajipatia watu wa kukata manyoya ya kondoo kule Baali-Hasori upande wa Efuraimu; ndipo, Abisalomu alipowaalika wana wote wa mfalme.

²⁴Abisalomu akaja hata kwa mfalme, akamwambia: Tazama, wako wenye kukata manyoya ya kondoo kwa mtumishi wako, mfalme naye na aje pamoja na watumishi wake kwa mtumishi wako!

²⁵Mfalme akamwambia Abisalomu: Sivyo, mwanangu, tusije sote kwako, tusikulemee. Hata alipomhimiza, hakutaka kwenda, ila akambariki.

²⁶Abisalomu akamwambia: Kama huji, ndugu yangu Amunoni na aende na sisi. Mfalme akamwuliza: Unamtakia nini kwenda na wewe?

²⁷Abisalomu alipomhimiza, akampa Amunoni ruhusa kwenda pamoja naye pamoja na wana wote wa mfalme.

²⁸Kisha Abisalomu akawaagiza vijana wake kwamba: Angalieni! Moyo wa Amunoni utakapochangamka kwa kunywa mvinyo, nitawaambieni: Mpigeni Amunoni! Ndipo, mtakapomwua pasipo kuogopa. Kwani ni mimi ninayewaagiza ninyi kuvifanya. Jipeni mioyo, mpate kuwa wenye nguvu![#3 Mose 20:17.]

²⁹Vijana wa Abisalomu wakamfanyizia Amunoni, kama Abisalomu alivyowaagiza. Ndipo, wana wote wa mfalme walipoondoka, wakapanda kila mmoja nyumbu wake, wakakimbia.

³⁰Hao walipokuwa njiani, Dawidi akapata habari kwamba: Abisalomu amewaua wana wote wa mfalme, asisalie kwao hata mmoja.

³¹Ndipo, mfalme alipoinuka, akayararua mavazi yake, akajilaza chini, nao watumishi wake wote wakawa wamesimama wenye mavazi yaliyoraruliwa.

³²Naye Yonadabu, mwana wa Simea, kaka yake Dawidi, akaanza kusema kwamba: Bwana wangu asiwaze, ya kwamba wamewaua vijana wote walio wana wa mfalme, kwani Amunoni amekufa peke yake, kwani shauri hili lilikuwa limekatwa na kinywa chake Abisalomu tangu siku ile, yule alipomchukua umbu lake Tamari kwa nguvu.

³³Sasa bwana wangu mfalme asiliweke neno hili moyoni mwake la kwamba: Wana wote wa mfalme wamekufa! Ila ni Amunoni peke yake aliyekufa.

Abisalomu anamkimbilia babu kule Gesuri.

³⁴Lakini Abisalomu alikuwa amekimbia. Kijana wa mfalme aliyekuwa mlinzi alipoyainua macho yake, aone vema, mara akaona watu wengi wanaotelemka katika njia iliyoko mgongoni kwake upande wa milimani.

³⁵Ndipo, Yonadabu alipomwambia mfalme: Tazama, wana wa mfalme wanakuja! Kama mtumishi wako alivyosema, ndivyo, inavyokuwa.

³⁶Alipokwisha kusema, ndipo, wana wa mfalme walipofika, wakapaza sauti zao, wakalia; naye mfalme na watumishi wake wote wakalia kilio kikubwa sana.

³⁷Abisalomu alipokimbia akaenda kwa Talmai, mwana wa Amihudi, mfalme wa Gesuri. Naye Dawidi akamlilia mwanawe kila siku.[#2 Sam. 3:3; 14:23.]

³⁸Naye Abisalomu akakaa miaka mitatu kule Gesuri, alikokwenda kwa kukukimbilia.

³⁹Naye mfalme Dawidi akatamani sana kwenda kumtokea Abisalomu, alipokwisha kuutuliza moyo wake kwa ajili ya kufa kwake Amunoni.