Fujo la Abisalomu.

¹Hayo yalipokwisha, Abisalomu akajipatia magari na farasi na watu 50, wamtangulie na kupiga mbio.[#1 Fal. 1:5.]

²Kila siku Abisalomu hujidamka, kisha husimama mjini kando kwenye lango la mji. Basi, kila mtu aliyepita mwenye shauri la kwenda kwa mfalme kuamuliwa, Abisalomu humwita kwake na kumwuliza: Wewe unatoka mji gani? Aliposema: Mtumishi wako ni mmoja wao wa mashina ya Waisiraeli,

³Abisalomu humwambia: Tazama, shauri lako ni zuri, linapasa, lakini kwa mfalme hakuna atakayekusikiliza.

⁴Kisha Abisalomu husema: Kama wangeniweka mimi kuwa mwamuzi katika nchi hii, ningeyakata vema mashauri ya kila mtu atakayekuja kwangu mwenye neno la kugombana na mwenye shauri lo lote.

⁵Napo, mtu alipomkaribia, amwangukie, hukunjua upesi mkono wake, apate kumnonea.

⁶Hivyo ndivyo, Abisalomu alivyowafanyizia Waisiraeli wote waliokwenda shaurini kwa mfalme, navyo ndivyo, alivyoiiba mioyo ya waume wa Waisiraeli.

⁷Miaka 40 ilipokwisha, Abisalomu akamwambia mfalme: Na niende kumlipa Bwana huko Heburoni, niliyomwapia ya kumtolea.

⁸Kwani mtumishi wako ameapa kiapo, nilipokaa Gesuri kwa Washami, cha kwamba: Kama Bwana atanirudisha Yerusalemu, nitamtumikia Bwana.[#1 Mose 28:20; 2 Sam. 13:38.]

⁹Mfalme akamwambia: Nenda na kutengemana! Basi, akaondoka, akaenda Heburoni.[#1 Sam. 20:42.]

¹⁰Kisha Abisalomu akatuma wapelelezi kwa mashina yote ya Waisiraeli kwamba: Mtakaposikia, mabaragumu yakilia, semeni: Abisalomu amepata ufalme Heburoni!

¹¹Pamoja na Abisalomu walikwenda toka Yerusalemu watu 200 walioalikwa naye, waliokwenda pasipo mawazo mabaya yo yote, maana hawakujua neno lo lote.

¹²Abisalomu akatuma kumchukua Ahitofeli wa Gilo aliyekuwa mmoja wao waliomwongoza Dawidi mashaurini; akamtoa huko Gilo mjini kwake, alipochinja ng'ombe za tambiko. Hivyo lile fujo likapata nguvu, nao watu waliorudi upande wa Abisalomu wakaendelea kuwa wengi zaidi.[#2 Sam. 23:34.]

Kukimbia kwake Dawidi.

¹³Mtu alipofika kwa Dawidi na kumpasha habari ya kwamba: Mioyo ya waume wa Waisiraeli imegeuka kumfuata Abisalomu,

¹⁴Dawidi akawaambia watumishi wake wote, aliokuwa nao Yerusalemu: Haya! Ondokeni, tukimbie! Kwani hatutapata kupona, Abisalomu akitujia. Pigeni mbio, twende, asitukamate upesi na kutufanyizia mabaya, akiwaua waliomo humu mjini kwa ukali wa panga.[#Sh. 3:1.]

¹⁵Watumishi wa mfalme wakamwambia mfalme: Yote yampendezayo bwana wetu mfalme, basi, sisi watumishi wako tuko.

¹⁶Kisha mfalme akatoka pamoja nao wote waliokuwamo nyumbani mwake, wakienda kwa miguu yao; mfalme akaacha masuria kumi tu wa kuiangalia nyumba.

¹⁷Mfalme alipokwisha kutoka hivyo pamoja na watu wake wote, wakienda kwa miguu, wakasimama penye nyumba ya mwisho.

¹⁸Ndipo, watumishi wake wote walipopita kando yake, nao Wakreti wote na Wapuleti wote na Wagati wote, watu 600 waliotoka Gati wakienda kwa miguu, wote pia wakapita hapo mbele ya mfalme.[#2 Sam. 8:18.]

¹⁹Mfalme akamwuliza Itai wa Gati: Mbona wewe nawe utakwenda pamoja na sisi? Rudi, ukae kwa mfalme! Kwani wewe u mgeni aliyefukuzwa kwao; haya! Nenda zako![#2 Sam. 18:2.]

²⁰Umefika jana; basi, leo nitawezaje kukusumbua na kukuchukua kwenda na sisi? Mimi ninakwenda na kutangatanga po pote, nitakapokwenda, lakini wewe rudi! Nao ndugu zako warudishe pamoja na wewe, nao upole na welekevu na uwakalie!

²¹Itai akamjibu mfalme akisema: Hivyo, Bwana alivyo Mwenye uzima, tena bwana wangu mfalme alivyo mzima, mahali, bwana wangu mfalme atakapokuwa, kama ni pa kufia, au kama ni pa kuponea, ndipo, mtumishi wako naye atakapokuwa.

²²Ndipo, Dawidi alipomwambia Itai: Basi, nenda nawe, upite! Naye Itai wa Gati akapita na watu wake wote na wake na watoto wote waliokuwa naye.

²³Watu wote wa nchi hiyo wakalia na kuzipaza sauti zao pamoja na watu wote walipita hapo, mfalme alipouvuka mto wa Kidoroni pamoja na wale watu wote waliopita mbele yake, wakajielekeza kushika njia ya kwenda nyikani.[#Yoh. 18:1.]

²⁴Mara akaja naye Sadoki pamoja na Walawi wote waliolichukua Sanduku la Agano la Mungu; wakalitua Sanduku la Agano, naye Abiatari akatambika, mpaka watu wote walipokwisha kupita na kutoka mjini.

²⁵Mfalme akamwambia Sadoki: Lirudishe mjini Sanduku la Mungu! Kama nitaona upendeleo machoni pa Bwana, atanirudisha, nipate kuliona tena napo mahali, linapokaa.

²⁶Lakini kama ataniambia hivi: Sipendezwi na wewe, basi, niko, anifanyizie atakayoyaona kuwa mema.[#1 Sam. 3:18; 2 Sam. 10:12.]

²⁷Kisha mfalme akamwambia mtambikaji Sadoki: Je? Wewe siwe mtazamaji? Rudi mjini na kutengemana pamoja na mwanao Ahimasi na Yonatani, mwana wa Abiatari, hawa wana wenu wawili waende nanyi.[#1 Fal. 1:42.]

²⁸Tazameni, mimi nitakawilia penye mbuga za nyikani, mpaka itafika kwangu habari toka kwenu.

²⁹Kwa hiyo Sadoki na Abiatari wakalirudisha Sanduku la Mungu Yerusalemu, wakakaa huko.

³⁰Dawidi akapapanda pa kuukwelea mlima wa michekele, akaenda akilia, nacho kichwa chake kilikuwa kimefunikwa, naye mwenyewe alikwenda pasipo kuvaa viatu; hata watu wote waliokuwa naye walikuwa wamekifunika kila mtu kichwa chake, nao wakawa wakipanda na kulia.

³¹Walipompasha Dawidi habari ya kwamba: Ahitofeli yuko kwa Abisalomu pamoja nao waliovunja maagano, Dawidi akasema: Bwana na aligeuze shauri la Ahitofeli kuwa ujinga!

³²Dawidi alipofika pale juu, watu wanapomtambikia Mungu, mara akaja Mwarki Husai akimwendea njiani mwenye kanzu iliyoraruliwa na mwenye mchanga kichwani pake.

³³Dawidi akamwambia: Ukienda pamoja nami safari yangu, ndipo, utakaponilemea.

³⁴Lakini ukirudi mjini na kumwambia Abisalomu: Mimi nitakuwa mtumishi wako, mfalme; kama nilivyokuwa mtumishi wa baba yako tangu kale, ndivyo, nitakavyokuwa sasa mtumishi wako. Basi, ndivyo, utakavyolitengua shauri la Ahitofeli.[#2 Sam. 17:7.]

³⁵Je? Mle mjini hunao wale watambikaji Sadoki na Abiatari? Iwe hivyo: kila neno, utakalolisikia nyumbani mwa mfalme, uwasimulie wale watambikaji Sadoki na Abiatari.

³⁶Tazama, wanao mle mjini wana wao wawili: Sadoki anaye Ahimasi, Abiatari anaye Yonatani. Kwa kuwatumia hao mtaweza kuniletea kila neno, mtakalolisikia.[#2 Sam. 17:15-17.]

³⁷Ndipo, Husai aliyekuwa rafiki yake Dawidi aliporudi mjini, Abisalomu alipoingia Yerusalemu.[#1 Mambo 27:33.]