Shauri la Ahitofeli linatenguliwa.

¹Ahitofeli akamwambia Abisalomu: Na nichague watu 12000, niondoke kumfuata Dawidi upesi na usiku.[#Sh. 71:11.]

²Nitakapofika kwake, atakuwa amechoka, nayo mikono yake itakuwa imelegea; nikimstusha, akiwa hivyo, watu wote waliokuwa naye wakatimbia, nami nitampata mfalme, nimpige, akiwa peke yake.

³Kisha nitawarudisha watu wote kwako; hao watu wote, unaowatafuta wewe, watakaporudi, basi, huu ukoo wote mzima utakaa na kutengemana.

⁴Neno hili likanyoka machoni pake Abisalomu napo machoni pao wazee wote wa Waisiraeli.

⁵Lakini Abisalomu akasema: Mwite naye Mwarki Husai, tuyasikie nayo yaliyomo kinywani mwake![#2 Sam. 16:16.]

⁶Husai alipofika kwake Abisalomu, Abisalomu akamwambia kwamba: Ahitofeli amesema haya na haya; nasi tulifanye, alilolisema, au tuache? Sema wewe!

⁷Husai akamwambia Abisalomu: Mara hii shauri, Ahitofeli alilolitoa, si jema.

⁸Husai akasema: Wewe unamjua baba yako na watu wake, ya kuwa wao ndio mafundi wa vita wenye ukali rohoni mwao kama chui mke aliyenyang'anywa watoto wake, naye baba yako ni mtu wa vita, hatalala usiku kwa watu wake.

⁹Tazama, sasa yeye amekwisha kujificha katika shimo moja au penginepo palipo hivyo; lakini itakapokuwa, mwanzoni watu wa kwetu wauawe kwa kupigana nao, kila atakayevisikia atasema: Watu wanaomfuata Abisalomu wameshindwa katika mapigano.

¹⁰Ndipo, hata mwenye nguvu aliye mwenye moyo kama wa simba atakapoyeyuka kabisa, kwani Waisiraeli wote wanajua, ya kuwa baba yako ni fundi wa vita, nao watu waliokuwa naye ni wenye nguvu.

¹¹Kwa hiyo shauri langu ni hili: Kwako na wakusanyike Waisiraeli wote toka Dani mpaka Beri-Seba, wawe wengi kama mchanga ulioko ufukoni kwenye bahari, kisha mwenyewe nenda nao vitani!

¹²Kisha tutamshambulia mahali pamoja; atakapoonekana, tumwangukie, kama umande unavyoiangukia nchi, tusisaze kwake hata mtu mmoja miongoni mwao wote waliokuwa naye!

¹³Kama atakimbilia mjini, Waisiraeli wote na waupeleke mji huo kamba, tuufunge, tuuvute na kuukokota mpaka mtoni, pasionekane pake tena hata kijiwe kimoja tu.

¹⁴Ndipo, Abisalomu na watu wote wa Waisiraeli waliposema: Shauri la Mwarki Husai ni jema kuliko shauri la Ahitofeli. Lakini alikuwa Bwana aliyeagiza kulitengua shauri jema la Ahitofeli, kusudi Bwana ampatie Abisalomu mabaya.[#2 Sam. 15:31,34.]

Dawidi anapashwa habari.

¹⁵Kisha Husai akawaambia watambikaji Sadoki na Abiatari: Ahitofeli amempa Abisalomu na wazee wa Waisiraeli mashauri haya na haya, lakini mimi nimewapa shauri hili.

¹⁶Sasa tumeni upesi kumpasha Dawidi habari za kwamba: Usilale usiku huu penye mbuga za nyikani, sharti uvuke mtoni, mfalme asimezwe na mabaya pamoja na watu wote waliokuwa naye.

¹⁷Yonatani na Ahimasi walikuwa wakikaa penye Chemchemi ya Wafua nguo; kwa hiyo kijakazi mmoja akaenda kuwapasha habari, nao wakaenda kumpasha mfalme Dawidi hizo habari. Ilikuwa hivyo, watu wasipate kuwaona wakiingia mjini.[#1 Fal. 1:9.]

¹⁸Lakini kijana aliwaona, naye akampasha Abisalomu habari. Nao wote wawili wakaenda na kupiga mbio, wakaingia nyumbani mwa mtu mle Bahurimu, naye alikuwa na kisima uani pake; ndimo, walimoshukia.

¹⁹Kisha mwanamke akachukua blanketi, akalitanda juu ya kisima hicho, akaanika humo ngano zilizotwangwa, lisijulikane neno lo lote.

²⁰Watumishi wa Abisalomu walipofika nyumbani kwa huyu mwanamke na kumwuliza: Ahimasi na Yonatani wako wapi? huyu mwanamke akwaambia: Wamekwenda kukivuka kile kijito. Basi, walipowatafuta pasipo kuwaona, wakarudi Yerusalemu.

²¹Hao walipokwisha kwenda, wale wakatoka kisimani, wakaenda kumpasha mfalme Dawidi habari, wakamwambia Dawidi: Ondokeni, mvuke upesi mtoni! Kwani haya ndiyo mashauri, Ahitofeli aliyoyatoa kwa ajili yenu.

²²Ndipo, Dawidi alipoondoka pamoja na watu wote waliokuwa naye, wakauvuka Yordani. Mapema yalipopambazuka, hakusalia hata mmoja asiyeuvuka Yordani.

Ahitofeli anajiua.

²³Ahitofeli alipoona, ya kuwa shauri lake halikufanywa, akamtandika punda wake, akaondoka kwenda nyumbani mjini kwake, akayatengeneza mambo ya nyumbani, kisha akajinyonga, akafa, akazikwa kaburini mwa baba yake.[#Mat. 27:5.]

Dawidi anaingia Mahanaimu

²⁴Dawidi alipofika Mahanaimu, ndipo, Abisalomu alipouvuka Yordani, yeye na watu wote wa Waisiraeli pamoja naye.

²⁵Naye Abisalomu alimweka Amasa kuwa mkuu wa vikosi mahali pake Yoabu; Amasa alikuwa mwana wa mtu aitwaye Itira wa Isiraeli; ndiye aliyeingia kale kwa Abigaili, binti Nahasi, umbu la Seruya aliyekuwa mama yake Yoabu.[#2 Sam. 19:13.]

²⁶Waisiraeli na Abisalomu wakapiga makambi katika nchi ya Gileadi.

²⁷Ikawa, Dawidi alipoingia Mahanaimu, ndipo, Sobi, mwana wa Nahasi wa Raba wa wana wa Amoni, na Makiri, mwana wa Amieli wa Lo-Debari, na Mgileadi Barzilai wa Roglimu,[#2 Sam. 9:4; 1 Fal. 2:7.]

²⁸walipoleta vitanda na mabakuli na vyombo vya udongo na ngano na mawele na unga na bisi na kunde na mbaazi na bisi za mchele,

²⁹na asali na siagi na mbuzi na kondoo na maziwa mabivu ya ng'ombe, wakampelekea Dawidi na watu waliokuwa naye, wayale, kwani walisema: Watu hawa wana njaa, tena wamechoka kwa kupatwa na kiu za nyikani.[#2 Sam. 16:2.]