Tukuzo la wokovu la Dawidi.

¹Dawidi akamwambia Bwana maneno ya wimbo huu, Bwana alipomponya mikononi mwa adui zake wote, namo mikononi mwa Sauli.

²Akasema:

Bwana ni ngome yangu na boma langu, tena mponya wangu;

³ni Mungu aliye mwamba wangu, kwa hiyo ninamjetea, ni ngao yangu na pembe yangu ya kunipatia wokovu, kisha ni kingo langu, nipate pa kukimbilia, ni mwokozi wangu aniokoaye, nisije kukorofishwa.

⁴Bwana atukuzwaye ndiye, ninayemwitia; ndipo, ninapookolewa mikononi mwao walio adui zangu.

⁵Kwani mafuriko ya maji yauayo yalikuwa yameniasamia, nayo majito yaangamizayo yalinistusha,

⁶kamba zivutiazo kuzimuni zilikuwa zimenizunguka, nayo mafungo yauayo yalikuwa mbele yangu.

⁷Hapo niliposongeka nalimwita Bwana, yeye aliye Mungu wangu nikamlalamikia, akaisikia sauti yangu Jumbani mwake, malamamiko yangu yakamwingia masikioni mwake.

⁸Nchi ikatukutika na kutetemeka, nayo misingi ya mbingu ikatikisika kwa kutukuswa, kwani aliitolea makali yake yenye moto.

⁹Moshi ukapanda puani mwake, moto ulao ukatoka kinywani mwake, makaa ya moto yakamulikamulika mbele yake.

¹⁰Akatanda mbingu ya kushukiapo, mawingu meusi yakawa chini ya miguu yake.

¹¹Akapanda gari, nalo likarushwa, akaonekana mabawani mwa upepo.

¹²Akatumia giza kuwa kao, limfunike pande zote, ndio mawingu yenye mvua kali na kimbunga.

¹³Kwa nguvu ya kumulika mbele yake yakawashwa makaa ya moto.

¹⁴Bwana akapiga ngurumo kule mbinguni, Alioko huko juu akaivumisha sauti yake.

¹⁵Alipopiga mishale, akawatawanya, ngurumo zilipozidi, wakapigwa bumbuazi.

¹⁶Ndipo, vilipoonekana vilindi vya baharini, nayo misingi ya nchi ikafunuliwa kwa nguvu ya makaripio yake yeye Bwana na kwa ukali wa pumzi ya pua yake.

¹⁷Akakunjua mkono toka juu, akanikamata, mle mlimo na maji mengi akanichopoa.

¹⁸Akaniponya mikononi mwa adui yangu mwenye nguvu namo mwao walionichukia kwa kuwa na uwezo kuliko mimi.

¹⁹Walikuwa wamenijia mbele ile siku, nilipokuwa nimeshindwa, lakini Bwana akanijia kuwa shikizo.

²⁰Akanitoa kwao, akanikalisha palipo papana; ndivyo, alivyoniopoa kwa kupendezwa nami.

²¹Bwana alinipa yaupasayo wongofu wangu, akanipatia tena yaupasayo ung'avu wa mikono yangu.

²²Kwani naliziangalia njia zake Bwana, nisifanye kilicho kiovu mbele yake Mungu wangu.

²³Kwani maamuzi yake yote yako mbele yangu, nayo maongozi yake sikuacha kuyafuata.

²⁴Nikawa wake pasipo kuonywa, nikajiangalia, nisimkosee.

²⁵Bwana akanipatia tena yaupasayo wongofu wangu, kwa kuwa nilikuwa nimeng'aa machoni pake.

²⁶Wewe humwia mpole aliye mpole, naye aliye mkweli wote nawe humwia mkweli wote.

²⁷Wewe humwia mng'avu aliye mng'avu, lakini aliye mpotovu nawe humpotokea.

²⁸Walio wanyonge huwaokoa, lakini macho yako huwapingia wajivunao, uwanyenyekeze.

²⁹Kwani wewe, Bwana, u taa yangu, naye Bwana huliangaza nalo giza langu.

³⁰Kwani nitashambulia vikosi vizima kwa nguvu yako, kwa nguvu ya Mungu wangu narukia napo ukutani.

³¹Njia yake Mungu haipindiki, Neno lake Bwana limeng'azwa, yeye ni ngao yao wote wamkimbiliao.

³²Kwani yuko nani aliye Mungu, asipokuwa Bwana?

Tena yuko nani aliye mwamba, asipokuwa Mungu wetu?

³³Mungu ni ngome yangu yenye nguvu, njia yangu huifanya po pote, iwe imenyoka kabisa.

³⁴Hunipatia miguu ikimbiayo kama ya kulungu, anisimamishe kwangu vilimani juu.

³⁵Huifundisha mikono yangu kupiga vita, mpaka mikono yangu iweze kupinda hata uta wa shaba.

³⁶Hunipa ngao ya kuniokoa, napo hapo, unaponinyenyekeza, hunikuza.

³⁷Huipanulia miguu yangu, ipate pa kupitia, viwiko vya miguu yangu visiteleze.

³⁸Na niwakimbize adui zangu, mpaka niwaangamize; sitarudi nisipokwisha kuwamaliza.

³⁹Nitawamaliza na kuwaponda, wasiinuke tena, sharti waanguke miguuni pangu.

⁴⁰Hunivika nguvu ya kupiga vita, huwalaza chini yangu wao waniinukiao.

⁴¹Hunipa adui zangu, niwaone migongo, nipate kuwanyamazisha wachukivu wangu.

⁴²Hakuna mwokozi, wanapolalamika, wanapomwitia Bwana, hawaitikii.

⁴³Nitawaponda, mpaka wabunguke kama mavumbi ya nchi, nikiisha kuwaseta, niwazoe kama mataka viwanjani.

⁴⁴Kwenye magomvi yao walio ukoo wangu ulinitoa, ukaniangalia, nipate kuwa kichwa chao wao wamizimu, watu, ambao nilikuwa siwajui, wanitumikie.

⁴⁵Hao watokao mbali hunipongeza, masikio yao yanaponisikia, hunitii.

⁴⁶Hao watokao mbali walikuwa wamenyauka walipotoka mabomani kwao na kutetemeka.

⁴⁷Bwana Mwenye uzima ni mwamba wangu upasao kusifiwa, yeye Mungu wa mwamba wangu aliyeniokoa sharti atukuke!

⁴⁸Mungu ndiye aliyenipatia malipizi na kushurutisha makabila ya watu, wanitii,

⁴⁹Ndiye aliyenitoa mikononi mwao walio adui zangu, kwao waniinukiao ukaniweka kuwa mkuu wao, kwao waliozidi kunikorofisha ukaniponya.

⁵⁰Kwa hiyo nitakushukuru, Bwana, kwenye wamizimu, nalo Jina lako nitaliimbia.

⁵¹Mfalme wake alimpatia wokovu mwingi, aliyempaka mafuta humfanyizia yenye upole; huyo ni Dawidi naye aliye uzao wake kale na kale.