Vita na mali za Dawidi.

¹Hayo yalipokwisha, Dawidi akawapiga Wafilisti, akawashinda; kisha Dawidi akaishika mwenyewe hatamu ya mji mkuu, isishikwe tena na Wafilisti.

²Nao Wamoabu akawapiga, akawapima kwa kamba akiwalaza chini, akapima hivyo: wa kamba mbili wakawa wa kuuawa, nao wote wa kamba moja wakawa wa kuachwa uzimani; nao Wamoabu wakawa watumishi wa Dawidi, wakamletea mahongo.

³Kisha Dawidi akampiga Hadadezeri, mwana wa Rehobu, mfalme wa Soba, alipokwenda kuusimika tena ufalme wake huko kwenye jito la Furati.

⁴Dawidi akateka kwake wapanda farasi 1700 na askari waliokwenda kwa miguu 20000, nao farasi wote wa kuvuta magari Dawidi akawakata mishipa, akajisazia farasi wa magari mia tu.[#Yos. 11:9.]

⁵Washami Wa Damasko walipokuja kumsaidia Hadadezeri, mfalme wa Soba, Dawidi akapiga kwao Washami watu 22000.

⁶Dawidi akaweka askari kwao Washami wa Damasko, hao Washami wakawa watumishi wa Dawidi, wakamletea mahongo, ndivyo, Bwana alivyompa Dawidi kushinda po pote, alipokwenda.

⁷Dawidi akazichukua ngao za dhahabu, watumishi wa Hadadezeri walizokuwa nazo, akazipeleka Yerusalemu.

⁸Namo mle Beta na Berotai iliyokuwa miji ya Hadadezeri Dawidi akachukua shaba nyekundu nyingi mno.

⁹Toi, mfalme wa Hamati, aliposikia, ya kuwa Dawidi amevipiga vikosi vyote vya Hadadezeri,

¹⁰Toi akamtuma mwanawe Yoramu kwake mfalme Dawidi kumpongeza na kumbariki, kwa kuwa amepigana na Hadadezeri na kumshinda, kwani Toi na Hadadezeri walikuwa wakipigana vita, naye akampelekea mkononi mwake vyombo vya fedha na vyombo vya dhahabu na vyombo vya shaba.

¹¹Hivi navyo mfalme Dawidi akavitakasa kuwa mali za Bwana, kama alivyozitakasa nazo fedha na dhahabu, alizozichukua kwa mataifa yote, aliyoyashinda,

¹²kama kwao Washami na Wamoabu na wana wa Amoni na Wafilisti na Waamaleki, hata nyara za Hadadezeri, mwana wa Rehobu, mfalme wa Soba.

¹³Dawidi aliporudi kwa kuwapiga Washami akajipatia jina kuu kwa kuua watu 18000 Bondeni kwa Chumvi.[#Sh. 60:2.]

¹⁴Kisha Dawidi akaweka askari kwa Waedomu, kwao Waedomu akaweka askari po pote, nao Waedomu wote wakawa watumishi wa Dawidi. Ndivyo, Bwana alivyompa Dawidi kushinda po pote, alipokwenda.[#1 Mose 27:40.]

¹⁵Dawidi akawa mfalme wa Waisiraeli wote, naye Dawidi akawatengenezea watu wake wote mashauri yaliyokuwa sawa, maana yaliongoka.

¹⁶Naye Yoabu, mwana wa Seruya, alikuwa mkuu wa vikosi, naye Yosafati, mwana wa Ahiludi, alikuwa mwandishi wa mambo yaliyopasa kukumbukwa.[#2 Sam. 20:23-26.]

¹⁷Naye Sadoki, mwana wa Ahitubu, na Ahimeleki, mwana wa Abiatari, walikuwa watambikaji, naye Seraya alikuwa mwandishi.

¹⁸Naye Benaya, mwana wa Yoyada, alikuwa mkuu wao Wakreti na Wapuleti, nao wana wa Dawidi walikuwa watambikaji.[#1 Sam. 30:14; 2 Sam. 15:18; 1 Fal. 4:5.]