Anwani.

¹Sisi Paulo na Silwano na Timoteo tunawaandikia ninyi mlio wateule wa Tesalonike katika Mungu Baba yetu na Bwana Yesu Kristo![#1 Tes. 1:1.]

²Upole uwakalie na utengemano unaotoka kwa Mungu Baba na kwa Bwana Yesu Kristo![#Rom. 1:7.]

Paulo atuliza mioyo ya wenye kuumizwa.

³*Sharti tumshukuru Mungu siku zote kwa ajili yenu, ndugu; hii inatupasa, kwa sababu nguvu zenu za kumtegemea Mungu zinaongezeka sana, nao upendano unakua, maana ninyi nyote kila mmoja wenu humpenda mwenzake.[#2 Tes. 2:13; 1 Tes. 1:2-3.]

⁴Kwa hiyo hata sisi wenyewe twajivuna kwa ajili yenu katika wateule wa Mungu, kwamba mwavumilia, tena mwamtegemea Bwana katika mafukuzo na maumivu yenu yote, mnayojitwika.[#2 Kor. 7:4.]

⁵Humu ndimo, hukumu yake Mungu itakamoonekana kuwa ya kuongoka: ninyi mtaambiwa: Ufalme wa Mungu umewapasa kwa hivyo, mnavyoteswa kwa ajili yake huo.[#Luk. 21:36; Fil. 1:28.]

⁶Kwani wongofu wa Kimungu ndio huu: wenye kuwaumiza atawalipizia maumivu,[#Rom. 12:19; Ufu. 18:6-7.]

⁷nanyi mwumizwao mtapata kutulizwa pamoja nasi, Bwana Yesu atakapotokea waziwazi toka mbinguni pamoja na malaika wa nguvu zake.[#Mat. 16:27; 25:31-46; 1 Tes. 4:16.]

⁸Naye atashuka mwenye moto uwakao sana, awalipize wale wasiomjua Mungu, kwamba walikataa kuutii Utume mwema wa Bwana wetu Yesu.[#Yes. 66:15; Rom. 2:8.]

⁹Nalo lipizi, watakalolipata, ni mwangamizo wa kale na kale, maana watatupwa, wasiuone uso wa Bwana na utukufu wa nguvu zake.[#Yer. 2:10,19,21.]

¹⁰Hivi vitakuwa siku ileile, atakapokuja kutukuzwa kati ya watakatifu wake na kustaajabiwa kati yao wote wamtegemeao; kwani mambo hayo, tuliyoyashuhudia, yalipata kwenu wenye kuyategemea.*[#Kol. 3:4.]

¹¹Kwa ajili ya neno hili twawaombea ninyi siku zote, Mungu wetu awape kufanya mwenendo uupasao wito wenu, mpate nguvu za kuyatimiza mema yote yaliyowapendeza na za kufanya matendo yafanyikayo kwa kumtegemea.

¹²Hivyo ndivyo, Jina la Bwana wetu Yesu litakavyotukuzwa mwenu, nanyi mtatukuzwa mwake, yatakapotimia yale, Mungu wetu na Bwana Yesu Kristo aliyowagawia.