Anwani.

¹Mimi Paulo niliye mtume wa Kristo Yesu kwa hayo, Mungu ayatakayo, nikitangaze kiagio cha uzima uliomo mwake Kristo Yesu, nakuandikia barua, wewe Timoteo, mwanangu mpendwa.

²Upole ukukalie na wema na utengemano unaotoka kwa Mungu Baba na kwa Kristo Yesu, Bwana wetu!

Roho ya nguvu na ya upendo.

³Namshukuru Mungu, ninayemtambikia tangu siku za baba zangu kwa moyo utakatao kwa kujua mema tu. Nakukumbuka pasipo kukoma nikiomba usiku na mchana.[#Tume. 23:1; 24:16; Fil. 3:5.]

⁴Nami nikiyakumbuka machozi yako, ninatunukia kukuona wewe, furaha zinifurikie.

⁵Maana nakukumbuka moyoni, unavyomtegemea Mungu pasipo ujanja; kwanza bibi yako Loi alikukalia kumtegemea Mungu vivyo hivyo, kisha mama yako Eunike naye, lakini moyo wangu unajua, ya kuwa hata wewe unako.[#Tume. 16:1.]

⁶Kwa sababu hii nakukumbusha, uyafuate yale mema yaliyomo mwako, uliyogawiwa hapo, nilipokubandikia mikono.[#1 Tes. 5:19; 1 Tim. 4:14.]

⁷Kwani Mungu hakutupa Roho ya kutuogopesha, ila ya kututia nguvu na upendo tuonyeke.[#Rom. 8:15.]

⁸Basi, usiingiwe na soni ya kumshuhudia Bwana wetu, hata mimi niliyefungwa kwa ajili yake! Ila ukiumizwa vibaya kwa ajili ya Utume mwema vumilia pamoja nami kwa nguvu za Mungu![#Rom. 1:16.]

⁹Maana ndiye aliyetuokoa, ndiye aliyetuitia kuwa watakatifu; naye hakutuitia kwa hivyo, matendo yetu yalivyo, ila kwa hiyovyo, alivyotaka mwenyewe toka kale kutugawia yale mema yaliyomo mwake Kristo Yesu; ni yayo hayo, tuliyolimbikiwa mbele ya mwanzo wa siku za kale.[#Tit. 3:5.]

¹⁰Lakini siku za sasa yametufunikia hapo, mwokozi wetu Kristo Yesu alipotokea; ndiye aliyezitangua nguvu za kifo, kisha akatokeza mwangani uzima usioangamika, kama tulivyoambiwa na Utume mwema;[#Rom. 16:26; 1 Kor. 15:55,57; Ebr. 2:14.]

¹¹nami nikawekwa kuutangaza na kuutumikia na kuufundisha.[#1 Tim. 2:7.]

Timoteo sharti afulize kumtegemea Mungu.

¹²Kwa sababu yake nateseka hivyo, lakini sivionei soni, kwani namjua, nimtegemeaye. Tena ninalo shikizo hili la kwamba: Yuko na nguvu ya kulilinda limbiko langu, mpaka siku ile itakapotimia.[#2 Tim. 1:8,14.]

¹³Uliyoyasikia kwangu mimi, shikamana nayo! Kwani ni kielezo cha kujifundishia yale maneno yatupayo uzima, tukimtegemea Kristo Yesu na kumpenda![#1 Tim. 6:3; Tit. 2:1.]

¹⁴Hilo limbiko zuri sharti ulilinde kwa nguvu za Roho takatifu ikaayo ndani yetu sisi![#1 Tim. 6:20.]

¹⁵Neno lile nalijua, ya kuwa wote walioko Asia wameniacha; miongoni mwao wamo Figelo na Hermogene.[#2 Tim. 4:16.]

¹⁶Bwana awahurumie wao wa nyumbani mwa Onesiforo, kwa kuwa amenipoza moyo mara nyingi; hakuwa na soni ya mafungo yangu,

¹⁷ila alipofika Roma akajipingia kunitafuta, mpaka akiniona.

¹⁸Bwana ampe kuona huruma kwake Bwana siku ile! Nayo yote, aliyonitimikia huko Efeso, wewe umeyatambua kuliko mimi.