Wapotevu wa siku za mwisho.

¹Lakini yatambue haya: siku za mwisho patakuwa na siku ngumu.[#1 Tim. 4:1.]

²Kwani watu watakuwa wenye kujipenda wenyewe, wenye choyo, wenye kujitutumua na kujikweza, wenye matusi, wasiwatii wazazi, wasishukuru, wasimche Mungu,

³wasiwapende wenzao, wasitake kupatanishwa na mtu kwa kupenda usengenyaji, wasijikataze lo lote, wasionyeke, wasipende mema yo yote,

⁴ila watakuwa wachongezi na wakorofi na wenye majivuno; kuzifuata tamaa za miili watakupenda kuliko kumfuata Mungu;[#Fil. 3:19.]

⁵watajitendekeza kuwa wenye kumcha Mungu, lakini nguvu yake huipingia. Walio hivyo uwaepuke![#Mat. 7:15,21; Tit. 1:16.]

⁶Kwani wenzao ndio wale wanaonyemelea nyumbani mwa watu, watongoze wanawake wanyonge waliolemewa na makosa, wakiongozwa na tamaa nyingi;[#Mat. 23:14; Tit. 1:11.]

⁷hao hufundishwa toka kale, lakini hapana, watakapoweza kuufikia utambuzi wa kweli.

⁸Kama Yane na Yambure waliombisha Mose, ndivyo, hata hao wanavyoyabisha yalio ya kweli; hufanana nao wenye wazimu, wakajulika kuwa wenye kumtegemea Mungu bure tu.[#2 Mose 7:11,22.]

⁹Lakini hawataendelea sana, kwani upumbavu wao utawatokea wote waziwazi, kama hata upumbavu wao wale ulivyojulika.

Nguvu ya Neno la Mungu.

¹⁰Lakini wewe umeufuata ufundisho wangu na mwenendo wangu na mawazo yangu na njia yangu ya kumtegemea Mungu na utulivu wangu na upendo wangu na uvumilivu wangu,

¹¹hata mafukuzo na mateso yangu, niliyoyapata huko Antiokia na Ikonio na Listra. Nami niliyavumilia hayo mafukuzo yote, naye Bwana akaniokoa katika yote.[#Sh. 34:20; Tume. 13:50; 14:5,19.]

¹²Nao wote wanaotaka kuishi na kumcha Mungu kwa kuwa wake Kristo Yesu sharti wapate mafukuzo.[#Mat. 16:24; Tume. 14:22.]

¹³Lakini watu walio wabaya na wadanganyi wataendelea, wajifikishe palipo pabaya; hupoteza watu, tena hupotezwa wenyewe.[#1 Tim. 4:1.]

¹⁴*Lakini wewe ukae na kuyashika yale, uliyofundishwa, uliyoyatambua kwamba: Ndiyo ya kweli, maana unajua, waliokufundisha walivyo.[#2 Tim. 2:2.]

¹⁵Tena kwa sababu umeyajua Maandiko matakatifu tangu utoto wako, haya yanaweza kukuerevusha, uokoke kwa kumtegemea Kristo Yesu.[#Yoh. 5:39.]

¹⁶Kwani kila neno la Maandiko, mtu aliloambiwa na Mungu, linafaa, litufundishe, lituonyeshe ubaya wetu, liitulize mioyo yetu, lituonye, tupate wongofu;[#2 Petr. 1:19-21.]

¹⁷ndivyo, anavyotengenezewa mtu wa Kimungu ajikazaye kufanya kazi njema zo zote.*[#Mat. 5:48; 1 Tim. 6:11.]