Ikonio.

¹Ikawa, walipokusanyika huko Ikonio nyumbani mwa kuombea mwa Wayuda, wakawaambia maneno yayo hayo, hata Wayuda na Wagriki wengi mno wakaja kuyategemea.

²Lakini Wayuda waliokataa kutii wakaichokoza mioyo ya wamizimu na kuwawazisha maovu, wachukizwe na hao ndugu.[#Tume. 13:45.]

³Wakakaa huko siku nyingi wakitangaza waziwazi, walivyoshikamana na Bwana, naye akayashuhudia hayo maneno, waliyoyasema ya magawio yake akitokeza vielekezo na vioja vilivyofanyizwa na mikono yao.[#Tume. 19:11; Ebr. 2:4.]

⁴Watu waliokuwamo mle mjini wakakosana, wengine walikuwa upande wa Wayuda, wengine upande wa mitume.

⁵Lakini wamizimu na Wayuda pamoja na wakubwa wao walitaka kuwashambulia, wawakorofishe na kuwapiga mawe.[#Tume. 14:19; 2 Tim. 3:11.]

⁶Walipoyatambua wakakimbilia miji ya Likaonia na Listira na Derbe na mingine iliyoko kandokando.

⁷Wakakaa huko wakiipiga hiyo mbiu njema.[#Tume. 11:19-20.]

Kiwete katika Listira.

⁸Listira kulikuwa na mtu aliyekaa hawezi miguu; ni kiwete tangu hapo, alipotoka tumboni mwa mama yake, hakuweza kwenda kamwe.[#Tume. 3:2.]

⁹Huyu alimsikiliza Paulo, alipokuwa akisema. Naye alipomkazia macho, akamwona, ya kuwa anatazamia kuponywa,[#Mat. 9:28.]

¹⁰akamwambia kwa sauti kuu: Inuka, usimame kwa miguu yako, inyoke! Ndipo, alipoinuka na kuruka na kuzungukazunguka.

¹¹Makundi ya watu walipoona, Paulo alilolifanya, wakapaza sauti wakisema kwa Kilikaonia: Miungu imegeuka kufanana na sisi watu, ikatushukia.[#Tume. 28:6.]

¹²Wakampa Barnaba jina lake Zeu na Paulo jina lake Herme, kwa sababu ndiye aliyekuwa mnenaji.

¹³Kisha mtambikaji wa nyumba ya Zeu iliyokuwa nje ya mji akaleta ng'ombe na vilemba vya maua malangoni, yeye na makundi ya watu wakataka kuwachinjia ng'ombe za tambiko.

¹⁴Lakini mitume Barnaba na Paulo walipoyasikia wakayararua mavazi yao, wakayarukia hayo makundi, wakapaza sauti

¹⁵wakisema: Waume, haya mnayafanyia nini? Hata sisi tu watu wenye kufa kama ninyi. Tunawapigia mbiu njema, mwiache miungu hii ya bure, mmgeukie Mungu Mwenye uzima aliyeziumba mbingu na nchi na bahari navyo vyote vilivyomo.[#Tume. 4:24; 10:26.]

¹⁶Siku zilizopita aliwaacha wamizimu wote, wazishike njia zao;[#Tume. 17:30.]

¹⁷lakini hakujitowesha kwenu, maana alifanya mema akiwapa mvua toka mbinguni na miaka ya mavuno mazuri, hivyo aliishibisha mioyo yenu vyakula na mashangilio.[#Sh. 147:8; Yer. 5:24.]

¹⁸Wakisema hivyo, ilisalia kidogo tu, wasiweze kuwazuia hao watu wengi, wasiwachinjie ng'ombe za tambiko.

Paulo anapigwa mawe.

¹⁹Kisha Wayuda wakaja huko toka Antiokia na Ikonio, wakachokoza makundi ya watu, wakampiga Paulo mawe, wakamtoa mjini na kumburura wakidhani, amekwisha kufa.[#2 Kor. 11:25; 2 Tim. 3:11.]

²⁰Lakini wanafunzi walipomsimamia kwa kumzungukia, akainuka, akaingia mjini. Kesho yake akatoka pamoja na Barnaba kwenda Derbe.

²¹Ule mji nao wakaupigia hiyo mbiu njema, wakapata wanafunzi wengi; kisha wakarudi kwenda Listira na Ikonio na Antiokia.

²²Wakaishupaza mioyo ya wanafunzi, wakawahimiza, wafulize kumtegemea Bwana, wakawaambia: Inatupasa kupatwa na maumivu mengi, tukiingia katika ufalme wa Mungu.[#Tume. 11:23; Rom. 5:3-5; 1 Tes. 3:3.]

²³Kila mahali penye wateule wakawawekea wazee, wakawapeleka kwa Bwana, ambaye walianza kumtegemea, wakiwaombea pamoja na kufunga.[#Tume. 13:1-2.]

²⁴Wakaikata nchi ya Pisidia, wakafika Pamfilia,

²⁵wakalitangaza lile Neno mle Perge, wakatelemka kwenda Atalia.

²⁶Huko wakajipakia chomboni kwenda Antiokia; ndiko, walikotoka kwa kutumwa, wenzao wakiwaombea, Mungu awaongoze kwa upole katika kazi ile, waliyokwisha kuitimiza.

²⁷Walipofika wakawakusanya wateule, wakawasimulia yote, Mungu aliyoyafanya kwa kuwa nao, hata alivyowafungulia wamizimu mlango, nao wapate kumtegemea.[#1 Kor. 16:9.]

²⁸Siku, walizokaa huko pamoja na wanafunzi, si chache.