Safari ya kwenda Yerusalemu.

¹Lakini tulipokwisha kuagana nao tukatweka na kukielekeza chombo kwenda Ko kwa tanga moja; tulipofika, kesho yake tukaenda hapo Rodo; toka hapo tukafika Patara.

²Tukaona chombo cha kuvukia hata Ufoniki, tukajipakia humo, tukatweka.

³Tulipokuona kule Kipuro tukakuacha kushotoni, tukaendelea mpaka Ushami, tukashukia Tiro; kwani ndiko, chombo kilikoagiziwa kuipakua mizigo yake.

⁴Tulipowaona wanafuanzi tukakaa lhuko siku saba. Nao wakamwambia Paulo kwa nguvu ya Roho, asipande kwenda Yerusalemu.[#Tume. 20:23; 21:11-12.]

⁵Lakini tulipoziishiliza siku zetu tukaondoka kwenda zetu; wakatusindikiza wote pamoja na wanawake na watoto mpaka weuni pa mji; hapo wakapiga magoti pwani, wakatuombea.[#Tume. 20:25.]

⁶Tukaagana nao, tukaingia chomboni, lakini wale wakarudi kwao.

⁷Nasi tulipokwisha kuimaliza safari ya baharini tukatoka Tiro, tukafika Putolemai, tukawaamkia ndugu, tukakaa kwao siku moja.

⁸Kesho yake tukaondoka, tukafika Kesaria, tukaingia nyumbani mwa mpiga mbiu njema Filipo aliyekuwa miongoni mwao wale saba, tukakaa kwake.[#Tume. 6:5; 8:40.]

⁹Mtu huyu alikuwa na wana wa kike wanne, walikuwa wasichana wenye kufumbua.[#Tume. 2:17.]

¹⁰Nasi tulipokaa siku nyingi kwake, pakashuka mfumbuaji toka Yudea, jina lake Agabo.[#Tume. 11:28.]

¹¹Akatujia, akauchukua mshipi wa Paulo, akajifunga miguuni na mikono, akasema: Ndivyo, asemavyo Roho Mtakatifu: Mwenye mshipi huu Wayuda watamfunga Yerusalemu vivyo hivyo, wamtie mikononi mwa wamizimu.[#Tume. 20:23.]

¹²Tulipoyasikia haya sisi na wenyeji wa hapo tukambembeleza, asipande kwenda Yerusalemu.[#Mat. 16:22.]

¹³Ndipo, Paulo alipojibu: Huku kulia kwenu na kuniponda moyo kuna maana gani? Kwani mimi nimejielekeza siko kufungwa tu, ila hata kufa huko Yerusalemu kwa ajili ya Jina la Bwana Yesu.[#Tume. 20:24.]

¹⁴Alipokataa kutusikia, tukanyamaza tukisema: Bwana ayatakayo na yafanyike![#Mat. 26:39.]

¹⁵Siku hizi zilipopita, tukatengeneza yote, tukapanda kwenda Yerusalemu.

¹⁶Kulikuwa na wanafunzi Kesaria waliofuatana nasi, wakatupeleka kwa mtu aliyeitwa Mnasoni wa Kipuro aliyekuwa mwanafunzi wa kale, tufikie kwake.

Paulo katika Yerusalemu.

¹⁷Tulipofika Yerusalemu, ndugu wakatupokea kwa furaha.[#Tume. 15:13; Gal. 1:19.]

¹⁸Kesho yake Paulo akaingia mwa Yakobo pamoja nasi, nao wazee wote walikuwamo.

¹⁹Akawaamkia, akawasimulia moja kwa moja mambo yote, Mungu aliyoyafanya kwa wamizimu kwa ile kazi yake, aliyoitumikia.

²⁰Walipoyasikia wakamtukuza Mungu, wakamwambia Paulo: Ndugu yetu, unaona, ya kuwa Wayuda walioanza kumtegemea Bwana ni elfu nyingi na nyingi, hao wote hujikaza kuyashika Maonyo.[#Tume. 15:1.]

²¹Lakini kwa ajili yako wewe wameambiwa ya kwamba: Unawafundisha Wayuda wote wanaokaa kwa wamizimu, wambeze Mose, ukiwaambia, wasiwatahiri watoto, wala wasiyafuate mambo yaliyo mazoezo tu.[#Tume. 16:3; Rom. 10:4.]

²²Basi, iko nini inayofaa? Sharti kundi hilo zima likusanyike, kwani hawatakosa kusikia, ya kuwa umekuja.

²³Kwa hiyo ufanye, tutakavyokuambia! Tunao waume wanne wenye jambo, waliloliagana na Mungu.

²⁴Wachukue hao ujieue pamoja nao, uwalipie, wanyolewe vichwa! Hivyo wote watatambua, ya kuwa waliyoambiwa kwa ajili yako ni uwongo tu, ya kuwa wewe mwenyewe unaendelea na kuyashika Maonyo.[#Tume. 18:18; 4 Mose 6.]

²⁵Lakini kwa ajili ya wamizimu walioanza kumtegemea Bwana tumewaandikia, tulivyopatana ya kwamba, waushike mzio wa nyama za tambiko na wa damu na wa nyamafu na wa ugoni.[#Tume. 15:20,29.]

²⁶Ndipo, Paulo alipowachukua wale watu, kesho yake akaeuliwa pamoja nao, akapaingia Patakatifu, akatangaza, siku za weuo wao zitakapomalizika, kwamba ni hapo, kila mmoja atakapokwisha kutolewa kipaji cha weuo.[#4 Mose 6:9-20.]

²⁷Siku zile saba ziliposalia kidogo kutimia, Wayuda walitoka Asia wakamwona Paulo hapo Patakatifu, wakalichanganya kundi lote la watu, wakamkamata kwa mikono yao,

²⁸wakapiga kelele kwamba: Waume na Isiraeli, tusaidieni! Huyu ndiye yule mtu anayefundisha po pote watu wote, waubeze ukoo wetu nayo Maonyo, hata mahali hapa! Tena ameingiza Wagriki hapa Patakatifu, ndivyo, alivyopapatia uchafu mahali hapa Patakatifu.[#Tume. 6:13; Ez. 44:7.]

²⁹Kwani kwanza walikuwa wamemwona mjini pamoja na Tirofimo wa Efeso, wakamwazia, ya kuwa Paulo amemwingiza napo Patakatifu.[#Tume. 20:4; 2 Tim. 4:20.]

³⁰Mji wote ukatukutishwa, watu wote wakapakimbilia hapohapo, wakamkamata Paulo, wakamtoa hapo Patakatifu na kumburura; kisha milango yote ikafungwa papo hapo.

³¹Nao walipotaka kumwua, uvumi ulikuwa umemfikia mkuu wa kikosi cha askari, ya kuwa mji wote wa Yerusalemu umevurugika.

³²Mara hiyo akachukua askari na wakubwa wao, akashuka kwao mbiombio. Wale walipomwona mkuu na askari, wakaacha kumpiga Paulo.

³³Hapo, mkuu alipowafikia, akamshika, akaagiza, afungwe kwa minyororo miwili, akauliza: Nani huyu? Tena amefanya nini?[#Tume. 20:23; 21:11.]

³⁴Lakini watu kwa hivyo, walivyokuwa wengi, wengine wakapiga kelele hivyo, wengine hivyo. Asipoweza kuyatambua yaliyo kweli kwa ajili ya makelele akaagiza, apelekwe bomani.

³⁵Alipofika pa kupandia akachukuliwa na askari, wamkingie ukorofi wa watu;

³⁶kwani watu wengi mno walimfuata wakipiga kelele kwamba: Mwondoe huyu![#Tume. 22:22; Luk. 23:18.]

³⁷Walipotaka kumwingiza bomani, Paulo akamwambia mkuu wa askari: Niko na ruhusa kukuambia neno? Naye aliposema: Unajua Kigriki?

³⁸Wewe si yule Mmisri aliyefanya kishindo siku hizi akichukua watu 4000 waliokuwa wauaji na kuwapeleka nyikani?

³⁹Paulo akasema: Mimi ni mtu wa Kiyuda toka mji wa Tarso, ni mwenyeji wa mji huo wa Kilikia usio mdogo; nakuomba, nipe ruhusa ya kusema na watu.[#Tume. 9:11.]

⁴⁰Alipompa ruhusa, Paulo akasimama juu hapo pa kupandia, akawapungia watu mkono; nao walipokuwa kimya kabisa, akasema nao Kiebureo, akawaambia: