Paulo anasema na watu.

¹Waume mlio ndugu na baba, sikilizeni, ninayojikania sasa mbele yenu![#Tume. 7:2; 13:26.]

²Waliposikia, ya kuwa anasema nao kwa msemo wao wa Kiebureo, wakakaza kunyamaza.[#Tume. 21:40.]

³Akasema: Mimi ni mtu wa Kiyuda, nimezaliwa Tarso katika nchi ya Kilikia. Nikalelewa humu mjini, nikakaa miguuni pa Gamalieli na kufundishwa Maonyo ya baba zetu kwa uangalifu wote. Nikajipingia kumfanyia Mungu kazi, kama nanyi nyote leo.[#Tume. 5:34.]

⁴Njia hiyo nikaifuata, mpaka nikiua watu; waume na wake nikawafunga na kuwatia kifungoni.[#Tume. 8:3.]

⁵Hayo hata mtambikaji mkuu na wazee wote watanishuhudia. Kisha nikapewa barua nao za kwenda kwa ndugu walioko Damasko, nako niwafunge wale waliokuwako, niwalete Yerusalemu, wapatilizwe.

⁶Lakini nilipokwenda na kufika karibu ya Damasko, ilipokuwa saa sita ya mchana, mara palitoka mwanga mkubwa mbinguni, ukanimulikia pande zote.

⁷Nikaanguka chini, nikasikia sauti iliyoniambia: Sauli, Sauli, unanifukuzaje?

⁸Nami nilipojibu: Ndiwe nani, Bwana? akaniambia: Mimi ni Yesu wa Nasareti, ambaye unanifukuza wewe.

⁹Nao wenzangu, tuliokuwa pamoja, waliuona mwanga, lakini aliyesema nami hawakumsikia sauti yake.

¹⁰Nilipouliza: Nifanyeje, Bwana? Bwana akanijibu: Inuka, uende Damasko! Ndimo, utakamoambiwa yote, uliyoagizwa kuyafanya.

¹¹Kwa hivyo, nilivyokuwa sioni kwa kumetuka kwake ule mwanga, nikashikwa mkono na wenzangu, nikaingia Damasko.

¹²Kulikuwa na mtu, jina lake Anania, ni mwenye kuyashika Maonyo yote, kama wanavyomshuhudia Wayuda wote wanaokaa huko.

¹³Huyo akanijia, akasimama mbele yangu, akaniambia: Ndugu yangu Sauli, uwe mwenye kuona! Nami saa ileile nikapata kuona.

¹⁴Kisha akasema: Mungu wa baba zetu amekuchagua huko kale, upate kuyatambua, ayatakayo, umwone naye Mwongofu wake, uisikie na sauti ya kinywa chake mwenyewe,

¹⁵anavyokuambia: Utakuwa shahidi wangu kwa watu wote ukiwaambia, uliyoyaona nayo uliyoyasikia.

¹⁶Sasa unakawilia nini? Inuka, ubatizwe na kuoshwa, makosa yako yakuondoke, ukilitambikia Jina lake!

¹⁷Niliporudi Yerusalemu nikaja kuombea Patakatifu; hapo nikazimia roho,

¹⁸nikamwona, naye akaniambia; Piga mbio, utoke upesi Yerusalemu! Kwani hawatakupokea, ukinishuhudia mimi.

¹⁹Nam nikasema: Bwana, wao wenyewe wanajua, mimi nilivyowafunga waliokutegemea na kuwapiga mo mote nyumbani mwa kuombea.[#Tume. 22:4.]

²⁰Napo hapo, damu ya shahidi wako Stefano ilipomwagwa, mimi mwenyewe nilikuwa nimesimama hapohapo kwa kupendezwa, nikayalinda mavazi yao wale waliomvua.[#Tume. 7:58; 8:1.]

²¹Naye akaniambia: Enenda tu! Kwani mimi nitakutuma, uende mbali kwa wamizimu.[#Tume. 9:15; 13:2.]

²²Ndipo, wale waliomsikiliza mpaka neno hili walipopaza sauti wakisema: Mwondoe huyu nchini! Kwani haimpasi kuwapo.[#Tume. 21:36.]

²³Walipopiga kelele hivyo na kuzirarua nguo zao na kutupa uvumbi juu angani,

²⁴mkuu wa kikosi akaagiza, aingizwe bomani; akasema, wamwulize kwa mapigo, apate kuijua sababu ya kumpigia makelele kama hayo.

²⁵Walipomfunga kwa mikanda, apigwe, Paulo akamwambia bwana askari aliyesimama hapo: Je? Mko na ruhusa kupiga mtu aliye Mroma, asipohukumiwa kwanza?[#Tume. 16:37-38; 23:27.]

²⁶Bwana askari alipovisikia hivi akamwendea mkuu wa kikosi, akamjulisha akisema: Wataka kufanya nini? Kwani mtu huyu ni Mroma.

²⁷Mkuu wa kikosi akamwendea, akamwambia: Niambie, wewe u Mroma? Naye akasema: Ndio.

²⁸Mkuu wa kikosi alipojibu: Mimi huu Uroma nimeununua kwa fedha nyingi, Paulo akasema: Mimi nimezaliwa nao.

²⁹Papo hapo wale waliotaka kumwuliza kwa mapigo wakamwacha. Naye mkuu wa kikosi akaogopa alipotambua, ya kuwa ni Mroma, kwani yeye alimfunga.

Paulo mbele ya wakuu.

³⁰Kesho yake alitaka kuyatambua mashtaka ya Wayuda, kama ni ya kweli; kwa hiyo akamfungua, akaagiza, watambikaji wakuu na baraza yote ya wakuu wakusanyike pamoja, akampeleka Paulo chini kwao, akamsimamisha mbele yao.