Paulo mbele ya Agripa.

¹Agripa alipomwambia Paulo: Una ruhusa kujisemea mwenyewe, ndipo, Paulo aliponyosha mkono, akajikania hivyo:

²Mfalme Agripa, ninashangilia moyoni, kwa kuwa yote, ninayosutwa na Wayuda, nitajikania leo mbele yako wewe,

³uliyeyatambua sanasana mazoea na mashindano yote ya Kiyuda. Kwa hiyo nakuomba, unisikilize kwa kuvumilia.

⁴Mwendo wangu ulivyokuwa hapo mwanzo, nilipokuwa kijana pamoja na vijana wenzangu huko Yerusalemu, Wayuda wote wanavijua.

⁵Kwani wamenitambua kale; wakitaka wangenishuhudia, ya kwamba nimekifuata kile chama kinachokaza kuyashika mambo ya tambiko letu, kwani nalikuwa Fariseo.[#Tume. 23:6; Fil. 3:5-6.]

⁶Hata sasa ninasimama hapa, nihukumiwe, kwa sababu nangojea, kile kiagio kitimie, Mungu alichokiagana na baba zetu.[#Tume. 28:20.]

⁷Vile vile mashina yetu kumi na mawili hungojea, wakifikie; kwa hivyo wanajihimiza kumtumikia Mungu usiku na mchana. Hicho kingojeo ndicho, ninachosutiwa na Wayuda, mfalme Agripa.[#Tume. 24:15.]

⁸Kwa sababu gani huwaza kwenu, ya kuwa neno hilo halitegemeki la kwamba: Mungu anafufua wafu?

⁹Kweli nami vyaliniingia moyoni kwamba: Sharti nifanye mdngi ya kulipinga Jina la Yesu wa Nasareti.

¹⁰Hayo niliyafanya huko Yerusalemu; nilipopewa ruhusa na watambikaji wakuu nikawatia watakatifu wengi kifungoni, tena walipouawa, nami nikasaidia.

¹¹Hata katika nyumba zote za kuombea niliwaumiza mara kwa mara, nikiwashurutisha kumbeza Yesu, nikawaendea na ukorofi kama mwenye wazimu, nikawakimbiza mpaka kwenye miji iliyoko ugenini.

¹²Kwa hiyo nikaenda hata Damasko, nilipokwisha kupata maelekezo na maagizo kwa watambikaji wakuu.

¹³Ilipokuwa saa sita ya mchana, ndipo, mfalme, nilipoona hapo njiani mwanga uliotoka mbinguni wenye kumetuka kulishinda jua, ukatumulikia pande zote mimi na wenzangu waliokwenda pamoja nami.

¹⁴Tulipoanguka chini sote, nikasikia sauti iliyoniambia kwa msemo wa Kiebureo: Sauli, Sauli, unanifukuzaje? Utashindwa na kupiga mateke penye machomeo.

¹⁵Mimi nilipouliza: Ndiwe nani, Bwana? Bwana akasema: Mimi ni Yesu, ambaye unanifukuza wewe.

¹⁶Lakini inuka, usimame kwa miguu yako! Kwani hii ndiyo, niliyokutokea; Nikulinganye, utumike kuyashuhudia, uliyoyaona, nayo utakayoonyeshwa nami.[#Ez. 2:1,3.]

¹⁷Nitakuokoa kwao walio wa kwenu nako kwao wamizimu, maana ndiko, nitakakokutuma,

¹⁸uwafumbue macho yao na kuwaongoza, watoke gizani, waingie mwangani, tena watoke katika nguvu ya Satani, wamfikie Mungu; hivyo watapata kuondolewa makosa na kupewa fungu lao penye watakatifu, wakiwa wakinitegemea.[#Tume. 20:32.]

¹⁹Hapo, mfalme Agripa, sikukataa kuliitikia hilo jambo la mbinguni, nililoliona,[#Gal. 1:16.]

²⁰ila niliwatumikia kwanza wa Damasko, tena wa Yerusalemu, tena wote walioko katika nchi ya Yudea, kisha hata wamizimu nao, nikiwaambia, wajute wakimgeukia Mungu na kutenda matendo yaliyo ya kujuta kweli.

²¹Kwa sababu hiyo Wayuda walinikamata, nilipokuwa hapo Patakatifu, wakajaribu kuniua.[#Tume. 21:30-31.]

²²Lakini kwa hivyo, nilivyopata msaada kwa Mungu, ninasimama mpaka siku hii ya leo nikiwaeleza wakubwa na wadogo; sisemi mengine, yasipokuwa yale, waliyoyasema Wafumbuaji na Mose kwamba:[#Luk. 24:44-47.]

²³Yatakayokuwapo ni haya: Kristo sharti ateswe, kisha atakuwa limbuko la ufufuko wa wafu, kisha atawaalika wao wa ukoo huu nao wamizimu, wafike mwangani.[#1 Kor. 15:20.]

²⁴Alipojikania hivyo, Festo akapaza sauti akisema: Paulo, una wazimu! Ujuzi wako mwingi unakupapayusha.

²⁵Paulo akasema: Bwana wangu Festo, sina wazimu, ila natoa maneno yenye kweli na yenye maana.

²⁶Nawe mfalme, haya unayajua vema; kwa hiyo nasema mbele yako waziwazi. Kwani najua sana, ya kuwa hayo yote hakuna hata moja, usilolitambua, kwa sababu hayo hayakufanyika pembeni.[#Yoh. 18:20.]

²⁷Mfalme Agripa, unawategemea Wafumbuaji? Nimekujua, ya kuwa unawategemea.

²⁸Agripa akamwambia Paulo: Pamesalia padogo, ungenishinda, nikawa Mkristo.

²⁹Ndipo, Paulo aliposema: Namwomba Mungu, paliposalia padogo napo paliposalia pakubwa, wote hapa walionisikia leo, si wewe tu, awape kuwa, kama mimi nilivyo, pasipo minyororo hii.

³⁰Kisha mfalme na mtawala nchi na Berenike nao waliokaa pamoja nao wakainuka,

³¹wakajongea pembeni, wakasemezana wao kwa wao: Mtu huyu hakufanya neno linalopasa, auawe au afungwe.

³²Agripa akamwambia Festo: Mtu huyu angeweza kufunguliwa, kama asingalikuwa ametaka kuhukumiwa na Kaisari.[#Tume. 25:11.]