Paulo aliyoyaona Melite.

¹Tulipokwisha kuokoka, ndipo, tulipoambiwa, ya kuwa kisiwa kinaitwa Melite.

²Wenyeji wa huko wakatutunza kwa upendo usiopatikana kila siku: wakawasha moto, wakatupokea mwao sisi sote kwa ajili ya mvua iliyotunyea na kwa ajili ya baridi.[#2 Kor. 11:27.]

³Paulo alipodondoa mzigo wa vijiti kuvitia motoni, mkatoka humo nyoka kwa ajili ya moto, akamzingazinga mkono.

⁴Wenyeji walipomwona yule mdudu, alivyomng'ang'ania mkononi pake, wakasemezana wao kwa wao: Mtu huyu hakosi kuwa mwuaji, kwani ingawa ameokoka baharini, tena lipizi halimwachi, awepo.

⁵Alipomkung'uta yule mdudu motoni, hakuna kiovu tena kilichompata.[#Mar. 16:18.]

⁶Lakini wale walimtunduia na kungoja, avimbe au aanguke chini akifa papo hapo. Lakini walipongoja sana na kuona, ya kuwa hapati kibaya cho chote, wakageuka na kusema: Yeye ni mungu![#Tume. 14:11.]

⁷Lakini hapo karibu palikuwa na kiunga cha mkuu wa kisiwa, jina lake Pubulio. Huyu akatupokea mwake siku tatu, akatutunza na kutupendeza.

⁸Baba yake Pubulio alipoingiwa na homa na kuhara damu, Paulo akaingia mwake, akamwombea, akambandikia mikono, akamponya.

⁹Hayo yalipokwisha kufanyika, nao wengine wa kisiwa kile waliokuwa wenye magonjwa wakamjia, wakaponywa,

¹⁰wakatutukuza kwa matukuzo mengi. Nasi tulipoingia chomboni tena, wakatupakilia navyo vyote vya kutumia njiani.

Kufika Roma.

¹¹Miezi mitatu ilipopita, tukaondoka tukijipakia chomboni kilichotoka Alekisandria; kilikuwa kimezimaliza siku za kipupwe pale kisiwani; kilikuwa chenye chapa cha mapacha.

¹²Tulipofika Sirakuse, tukakaa huko siku tatu.

¹³Kutoka huko tukazunguka, tukafika Regio. Tulipongoja siku moja, kukavuma upepo wa kusini, tukafika Puteoli kwa mwendo wa siku mbili.

¹⁴Huko tukakuta ndugu, tukabembelezwa nao, tukae kwao siku saba. Ndivyo, tulivyokwenda kufika Roma.

¹⁵Ndugu wa huko walipovisikia wakaja kukutana na sisi, wakatujia mpaka Apioforo, wengine mpaka Tiretaberne. Paulo alipowaona akamshukuru Mungu, akachangamka.

¹⁶Tulipoingia Roma, bwana askari akampa mwenzake mkubwa wafungwa, lakini Paulo akapewa ruhusa ya kukaa, alipotaka, pamoja na askari aliyemlinda.[#Tume. 27:3.]

Paulo na Wayuda wa Roma.

¹⁷Siku tatu zilipopita, akawakusanya wakubwa wa Wayuda. Walipokusanyika, akawaambia: Waume ndugu, mimi sikuwakosea wao wa ukoo wetu wala mazoea ya baba zetu. Nimefungwa huko Yerusalemu, nikatiwa mikononi mwa Waroma.[#Tume. 23:1.]

¹⁸Nao waliponiulizauliza wakataka kunifungua, kwa sababu kwangu hakuna neno linalopasa, niuawe.

¹⁹Lakini Wayuda walipobisha, nikashurutishwa kutaka kuhukumiwa na Kaisari, lakini hapo siko kwamba: Niwasute walio wa taifa langu.[#Tume. 25:10-11.]

²⁰Kwa sababu hii nimewaita, niwaone ninyi, tusemeane. Kwani kingojeo cha Waisiraeli ndicho, nilichofungiwa mnyororo huu.[#Tume. 26:6-7.]

²¹Nao wakamwambia: Sisi kwa ajili yako hatukupata barua toka Yudea, wala hakuna ndugu aliyetujia na kutusimulia mambo yako, wala kusema kibaya, ulichokifanya.

²²Lakini twataka kusikia kwako mwenyewe mawazo yako, kwani chama hiki tumekijua, nako kwetu kinatambulika, ya kuwa kinabishiwa po pote.[#Tume. 24:14; Luk. 2:34.]

²³Walipokwisha kuagana naye siku, wengi wakamjia huko, alikofikia, akawaeleza tangu asubuhi mpaka jioni akiushuhudia ufalme wa Mungu; tena akajaribu kuwashinda kwa ajili yake Yesu na kuwafumbulia maonyo ya Mose na maneno ya wafumbuaji wengine wakayaitikia maneno yake, wengine wakakataa kuyategemea.

²⁴Wengine wakayaitikia maneno yake, wengine wakakataa kuyategemea.

²⁵Hivyo wakashindwa kupatana wao kwa wao, wakajiendea zao. Ndipo, Paulo aliposema neno kwa kinywa cha mfumbuaji Yesaya:

²⁶Nenda kwao wa ukoo huu, useme:

Kusikia mtasikia, lakini hamtajua maana;

Kutazama mtatazama, lakini hamtaona.

²⁷Kwani mioyo yao walio ukoo huu imeshupazwa,

wasisikie kwa masikio yao yaliyo mazito,

nayo macho yao wameyasinziza,

wasije wakaona kwa macho yao,

au wakasikia kwa masikio yao,

au wakajua maana kwa mioyo yao,

wakanigeukia, nikawaponya.

²⁸Basi, ijulikane kwenu ninyi ya kwamba: Wokovu huu wa Mungu umepelekwa kwenye wamizimu; hao ndio watakaousikia.[#Tume. 13:46.]

²⁹Alipovisema hivyo, Wayuda walikwenda wakibishana sana wao kwa wao.

³⁰Paulo akakaa miaka miwili mzima katika nyumba yake, aliyokuwa ameipanga, akawapokea wote walioingia kwake,

³¹akautangaza ufalme wa Mungu, akayafundisha mambo ya Bwana Yesu Kristo pasipo woga na pasipo kuzuiliwa na mtu.[#Tume. 28:23.]