Yatakayowapata majirani zao Waisiraeli.

¹Maneno ya Amosi aliyekuwa mchunga ng'ombe na kondoo kwao Tekoa; ni mambo yatakayowapata Waisiraeli, naye aliyaona katika siku za Uzia, mfalme wa Yuda, na za Yoroboamu, mwana wa Yoasi, mfalme wa Isiraeli; ilikuwa miaka miwili kabla ya ule mtetemeko wa nchi[#Amo. 7:14; 2 Fal. 14:23; 15:1; Zak. 14:5.]

²Alisema:

Bwana atanguruma mle Sioni,

ataivumisha sauti yake mle Yerusalemu;

ndipo, mbuga za wachungaji zitakaposikitika,

nao mlima wa Karmeli utakauka juu yake.

³Hivi ndivyo, Bwana anavyosema:

Kwa ajili ya mapotovu ya Damasko matatu au manne

sitayarudisha, yasiwapate,

kwa kuwa waliupura Gileadi kwa magari ya chuma ya

kupuria.

⁴Nitatupa moto nyumbani mwa Hazaeli, uyale majumba ya Benihadadi,

⁵nitalivunja komeo la Damasko,

nitawang'oa wakaao katika Bonde la Maovu,

nitamng'oa naye mshika bakora ya kifalme mle Beti-Edeni;

nao watu wa Ushami watatekwa na kuhamishwa kwenda Kiri.

Bwana ameyasema.

⁶Hivi ndivyo, Bwana anavyosema:

Kwa ajili ya mapotovu ya Gaza matatu au manne

sitayarudisha, yasiwapate,

kwa kuwa waliwateka wote pia na kuwahamisha,

wawapeleke utumwani kwa Waedomu.

⁷Nitatupa moto bomani mwa Gaza, uyale majumba yao,

⁸nitawang'oa wakaao mle Asdodi,

naye mshika bakora ya kifalme mle Askaloni;

kisha nitaugeuza mkono wangu, uujie Ekroni,

ndipo, Wafilisti waliosalia watakapoangamia.

Bwana Mungu ameyasema.

⁹Hivi ndivyo, Bwana anavyosema:

Kwa ajili ya mapotovu ya Tiro matatu au manne

sitayarudisha, yasiwapate,

kwa kuwa wote pia, waliowateka, waliwahamisha

na kuwapeleka kwa Waedomu,

hawakulikumbuka agano la Kindugu.

¹⁰Nitatupa moto bomani mwa Tiro, uyale majumba yao.

¹¹Hivi ndivyo, Bwana anavyosema:

Kwa ajili ya mapotovu ya Edomu matatu au manne

sitayarudisha, yasiwapate,

kwa kuwa waliwakimbiza ndugu zao kwa panga,

wakajizuia, wasiwahurumie,

kwa kuwa waliendelea siku zote kuwanyafua kwa ukali,

hawakomi kuwachafukia kale na kale.

¹²Nitatupa moto mle Temani, uyale majumba ya Bosira.

¹³Hivi ndivyo, Bwana anavyosema:

Kwa ajili ya mapotovu ya wana wa Amoni matatu au manne

sitayarudisha, yasiwapate

kwa kuwa waliwatumbua wenye mimba wa Gileadi,

wapate kuipanua mipaka yao.

¹⁴Lakini nitawasha moto bomani mwa Raba, uyale majumba

yao,

wapige makelele, kwa kuwa ni siku ya vita,

pawe uvumi, kwa kuwa ni siku ya chamchela.

¹⁵Naye mfalme wao atakwenda kuhamishwa, kwa kuwa atatekwa yeye na wakuu wake.

Bwana ameyasema.