Waisiraeli wanakatazwa matanga ya kimizimu.

¹Ninyi m watoto wake Bwana Mungu wenu; kwa hiyo msijichanje chale, wala msizinyoe nyushi katikati ya macho yenu kwa ajili ya mfu![#3 Mose 19:27-28.]

²Kwani ninyi m watu watakatifu wa Bwana Mungu wako, maana Bwana akikuchagua kuwa kabila lililo lake mwenyewe kuliko makabila yote yakaayo huku nchini.

Nyama wenye kutakata nao wenye uchafu.

³Usile cho chote kinachotapisha!

⁴Hawa ndio nyama, mtakaowala: ng'ombe, kondoo na mbuzi,

⁵kulungu na paa na funo na mbarapi na kuro na pofu na swala.

⁶Nyama wote wenye kwato zilizopasuka na kutengeka kabisa kuwa kwato mbili, kama ni wenye kucheua, ndio, mtakaowala miongoni mwa nyama.

⁷Lakini nao hao msiwale miongoni mwao wanaocheua namo miongoni mwao walio wenye kwato zilizopasuka na kutengeka: ngamia na sungura na pelele. Kweli wanacheua, lakini hawapasui kwato, kwa hiyo ni mwiko kwenu.

⁸Naye nguruwe, kweli anayapasua makwato, lakini hacheui; kwa hiyo ni mwiko kwenu. Nyama zao hao msizile, nayo mizoga yao msiiguse.

⁹Katika nyama wote waliomo majini mtakula hawa: wote wenye mapezi na magamba mtawala;

¹⁰lakini wote wasio wenye mapezi na magamba msiwale! ni mwiko kwenu.

¹¹Kila ndege mwenye kutakata mtakula.

¹²Lakini wao, mtakaoacha kula nyama zao, ni hawa: kozi na pungu na furukombe,

¹³na tumbuzi na mwewe na ngusu na ndugu zake,

¹⁴na makunguru yote na ndugu zao,

¹⁵na mbuni na kinega na dudumizi na kipanga na ndugu zake,

¹⁶na mumbi na bundi na yangeyange,

¹⁷na korwa na tai na shakwe,

¹⁸na korongo na kitwitwi na ndugu zake na hudihuda na popo.

¹⁹Wadudu wote wenye mabawa wanaotambaa ni mwiko kwenu, hawaliwi.

²⁰Ndege wote wenye kutakata mtakula.

²¹Msile kibudu cho chote! Mgeni aliomo malangoni mwako utampa, ale, au utakiuza kwa mtu wa kimizimu. Kwani ninyi m watu watakatifu wa Bwana Mungu wenu. Kitoto cha mbuzi usikipike katika maziwa ya mama yake.[#2 Mose 22:31; 23:19.]

Mafungu ya kumi.

²²Mwaka kwa mwaka sharti utoe fungu la kumi la mapato yote ya mbegu zako zitakazotoka shambani.[#3 Mose 27:30.]

²³Hili fungu la kumi ulile mbele ya Bwana Mungu wako mahali pale, atakapopachagua kuwa pa kulikalishia Jina lake, nalo hilo fungu la kumi ulitolee ngano zako na mvinyo zako mbichi na mafuta yako, tena wana wa kwanza wa ng'ombe nao wa mbuzi na kondoo wako, upate kujifunza kumcha Bwana Mungu wako siku zote.[#5 Mose 12:18.]

²⁴Kama safari ya kutoka kwako kwenda huko itakuwa ndefu zaidi, usiweze kuyapeleka hayo matoleo, kwa kuwa ni mbali zaidi kutoka kwako kwenda mahali pale, Bwana Mungu wako atakapopachagua kuwa pa kulikalishia Jina lake, basi, hapo Bwana Mungu wako atakapokubariki,

²⁵yale matoleo yageuze kuwa fedha, kisha hizo fedha zifunge mkononi mwako, upate kwenda nazo mahali pale, Bwana Mungu wako atakapopachagua.

²⁶Ndipo, utakapoweza kujipatia kwa hizo fedha yote, roho yako itakayotunukia, ng'ombe na mbuzi na kondoo na mvinyo na vileo nayo mengine yote, roho yako itakayoyapenda, ujipatie, kisha utakula hapo mbele ya Bwana Mungu wako, mfurahiwe pamoja wewe nao waliomo nyumbani mwako.

²⁷Naye Mlawi atakayekuwapo malangoni pako usimwache, kwani hana fungu la nchi kwako lililo lake mwenyewe.[#5 Mose 12:19.]

²⁸Miaka mitatu itakapopita, mafungu yote ya kumi utakayoyatolea mapato yako ya mwaka huo, uyaweke malangoni pako.[#5 Mose 26:12-15.]

²⁹Kisha Walawi, kwa kuwa kwako hawana fungu lao la nchi lililo lao wenyewe, na waje pamoja na wageni, nao wliofiwa na wazazi, nao wajane waliomo malangoni mwako, na waje, wale, washibe! Hivyo ndivyo, Bwana Mungu wako atakavyokubarikia kazi zote za mikono yako, utakazozifanya.