Matunzo ya watambikaji na ya Walawi.

¹Watambikaji Walawi, ndio shina lote la Lawi, wasipate fungu la nchi kuwa lao wenyewe kwao Waisiraeli. Ng'ombe za tambiko za Bwana za kuteketezwa nayo yampasayo Bwana kupewa yawe yao; ndiyo, watakayokula.[#4 Mose 18:8-20; 5 Mose 10:9; 1 Kor. 9:13.]

²Kweli wasiwe na fungu lililo lao kwao ndugu zao, ila Bwana mwenyewe atakuwa fungu lao, kama alivyowaambia.

³Lakini hii itakuwa haki yao watambikaji kwao watu watakaochinja ng'ombe ya tambiko, kama ni ng'ombe, au kama ni kondoo: sharti wampe mtambikaji mkono na mashavu mawili na matumbo.

⁴Tena malimbuko ya ngano zako nayo ya mvinyo mbichi nayo ya mafuta, nayo malimbuko ya nywele za kondoo, mkiwanyoa, na mmpe.

⁵Kwani Bwana Mungu wako amemchagua katika mashina yako yote, asimame na kutumikia katika Jina lake Bwana, yeye na wanawe siku zote.

⁶Itakapokuwa, Mlawi atoke malangoni pako pawapo pote kwao Waisiraeli, anapokaa ugenini, aende kwa tunu yote ya roho yake mahali pale, Bwana atakapopachagua,

⁷basi, na atumikie katika Jina la Bwana Mungu wake, kama ndugu zake Walawi wote wanaosimama hapo mbele ya Bwana.

⁸Watakula sawasawa na kugawiana fungu kwa fungu kuliko yale, atakayoyapata kwa kuuza mali ya baba zake.

Waisiraeli wanakatazwa uganga

⁹Utakapoingia katika hiyo nchi, Bwana Mungu wako atakayokupa, usijifundishe kuyafanya matapisho ya hao wamizimu.

¹⁰Kwako asionekane mtu atakayemtumia mwanawe wa kiume au wa kike kuwa ng'ombe ya tambiko ya kuteketezwa, wala asionekane mwenye kuagulia ndege na mawingu, wala mpiga bao, wala mlozi,[#3 Mose 18:21; 19:26,31; 20:27.]

¹¹wala mfinga nyoka kwa uganga, wala mwenye kuuliza mizimu, wala mwenye kujua uchawi wote, wala mfanya mashauri na wafu.[#1 Sam. 28:11.]

¹²Kwani kila ayafanyaye hayo humchukiza Bwana, naye Bwana Mungu wako anawafukuza wao mbele yako kwa ajili ya hayo machukizo.

¹³Lakini wewe sharti ukae kwa Bwana Mungu wako pasipo kumkosea.[#1 Mose 6:9; Sh. 15:2.]

¹⁴Kwani mataifa hayo, utakayoyafukuza, huwasikia waaguliao mawingu na ndege, lakini wewe Bwana Mungu wako hakukupa ruhusa kuwatumia hao.

Kiagio cha mfumbuaji wa kweli.

¹⁵*Miongoni mwa ndugu zako wewe Bwana Mungu wako atakuinulia mfumbuaji atakayelingana na mimi, nanyi sharti mmsikie.[#4 Mose 12:6-8; Yoh. 1:45; 6:14; Tume. 3:22; 7:37; Ebr. 12:24.]

¹⁶Ni kwa ajili yao yote, uliyomwomba Bwana Mungu wako kule Horebu siku hiyo ya mkutano kwamba: Nisiendelee kuisikia sauti ya Bwana Mungu wangu na kuuona huu moto mkubwa, nisife.[#2 Mose 20:19; Ebr. 12:19.]

¹⁷Ndipo, Bwana aliponiambia: Wamefanya vema waliposema hivyo.[#5 Mose 5:28.]

¹⁸Nitawainulia mfumbuaji miongoni mwa ndugu zao atakayelingana na wewe; nitampa maneno yangu kinywani mwake, awaambie yote, nitakayomwagiza.

¹⁹Itakuwa, mtu akikataa kuyasikia maneno yangu, atakayoyasema katika Jina langu, mimi nitamlipisha.*

²⁰Lakini mfumbuaji atakayejikuza mwenyewe na kusema neno katika Jina langu, nisilomwagiza kulisema, analolisema katika jina la mungu mwingine, huyo mfumbuaji hana budi kufa.[#5 Mose 13:5; Yer. 14:15.]

²¹Nawe ukiuliza moyoni mwako: Tutajuaje neno kuwa neno, Bwana asilolisema?

²²ni hivi: mfumbuaji akisema neno kwa Jina la Bwana, lakini hilo neno haliji, wala halitimii, basi, hilo ndilo neno, Bwana asilolisema, yule mfumbuaji amelisema kwa kujikuza tu, kwa hiyo usimwogope!