Miji ya kuikimbilia

¹Bwana Mungu wako atakapokwisha kuyang'oa hayo mataifa walio wenye hiyo nchi, Bwana Mungu wako atakayokupa, uichukue, iwe yako, ukae mijini mwao namo nyumbani mwao,[#5 Mose 4:41-43.]

²ndipo ujitengee miji mitatu katikati ya hiyo nchi yako, Bwana Mungu wako atakayokupa, uichukue, iwe yako.

³Utakapojitengenezea njia za kwenda huko uanze kuigawanya mipaka ya hiyo nchi yako, Bwana Mungu wako atakayokupa, iwe yako mwenyewe, uitoe mafungu matatu, mwuaji apate pa kukimbilia.

⁴Nalo shauri lake mwuaji atakayekimbilia kwako, apate kupona, liwe hivyo: Itakuwa, mtu ampige mwenzake pasipo kuvijua, pasipo kuwa mchukivu wake tangu zamani.

⁵Itakuwa, kama mtu akienda na mwenzake mwituni kukata kuni, napo hapo, mkono wake ulipolipandisha shoka kukata mti, chuma kikachomoka katika kipini, kikampata mwenzake, naye akafa, basi, hapo na akimbilie miji hiyo mmojawapo, apate kupona.

⁶Naye mwenye kuilipiza hiyo damu asimkimbize huyo mwuaji kwa ajili ya moto huo unaowaka moyoni mwake, amkamate, kwa kuwa njia ni ndefu, ampige, azimie roho, naye yule hakukora manza za kuuawa, kwani hakuwa mchukivu wake tangu zamani.

⁷Kwa sababu hii mimi ninakuagiza kwamba: Jitengee miji mitatu!

⁸Tena itakuwa, Bwana Mungu wako aipanue mipaka yako, kama alivyowaapia baba zako, ya kuwa atawapa.

⁹Hivi vitakuwa, ukiyaangalia na kuyafanya haya maagizo yote, mimi ninayokuagiza leo, umpende Bwana Mungu wako, uzishike njia zake siku zote; basi, hapo, hivyo vitakapotimia, sharti hiyo miji mitatu uiongeze kwa kujitengea mji mitatu mingine,

¹⁰ni kwamba: katikati ya hiyo nchi yako, Bwana Mungu wako atakayokupa, iwe fungu lako, isimwagwe damu ya mtu asiyekora manza za kufa, hiyo damu ikakukalia wewe.

¹¹Lakini mtu akiwa mchukivu wa mwenzake, akamvizia na kumnyatianyatia, mwisho akampata, ampige na kuizimiza roho yake, afe kabisa; napo, atakapokimbilia miji hiyo mmojawapo,

¹²wazee wa mji wake na watume watu, wamchukue kule na kumtia mikononi mwake mlipiza hiyo damu, afe.

¹³Jicho lako lisimwonee machungu, upate kuondoa kwao Waisiraeli damu ya mtu asiyekora manza za kufa. Ndipo, utakapoona mema.

Mipaka isisogezwe.

¹⁴Usimsogezee mwenzako mipaka, wakale waliyoikata penye fungu lako, utakalolichukua, liwe lako katika hiyo nchi, Bwana Mungu wako atakayokupa, uichukue, iwe yako.[#5 Mose 27:17.]

Mapatilizo ya mashahidi wa uwongo.

¹⁵Mtu mmoja asimwondokee mwingine katika shauri la manza zo zote, wala la ukosaji wo wote uliomkosesha mtu kosa lo lote, watu wanalolikosa, ila shauri litawezekana tu kwa ushahidi wa watu wawili au watatu.[#5 Mose 17:6; Yoh. 8:17; 2 Kor. 13:1.]

¹⁶Shahidi mkorofi atakapomwinukia mwenzake kumsingizia upotovu,

¹⁷Nao watu wawili wanaobishana na waende kusimama mbele ya Bwana na mbele ya watambikaji na mbele ya waamuzi watakaokuwapo siku hizo,[#5 Mose 17:9.]

¹⁸nao waamuzi na watafute vema sana iliyo kweli. Nao watakapoona, ya kama yule shahidi ni shahidi wa uwongo, naye alitaka kumkorofisha ndugu yake kwa uwongo,

¹⁹basi, na mmfanyie yaleyale, aliyoyawazia kumfanyizia ndugu yake. Hivyo ndivyo, utakavyouondoa ubaya huo katikati yako.

²⁰Wao wengine wasiokuwapo watakapovisikia wataogopa, wasiendelee kufanya mambo mabaya kama hayo katikati yako.

²¹Jicho lako lisiwaonee machungu, ila uwatoze roho kwa roho, jicho kwa jicho, jino kwa jino, mkono kwa mkono, mguu kwa mguu.[#2 Mose 21:23-25.]