Mambo ya vita.

¹Utakapotoka kwenda vitani kupigana na adui zako, ukaona farasi na magari na watu wengi kuliko wewe, usiwaogope! Kwani Bwana Mungu wako aliyekutoa katika nchi ya Misri kukuleta huku yuko pamoja na wewe.

²Tena hapo, mapigano yatakapokuwa karibu, mtambikaji na awakaribie ninyi kusema na watu.

³Awaambie: Sikilizeni, Waisiraeli! Ninyi leo mnakwenda kupigana na adui zenu, lakini kwa hiyo mioyo yenu isilegee, msiwaogope na kutetemeka, wala msiwastuke.

⁴Kwani Bwana Mungu wenu atakwenda pamoja nanyi kuwapigania na adui zenu, awaokoe.

⁵Kisha wenye amri na waseme na watu na kuwaambia: Kama yuko mtu aliyejenga nyumba mpya, naye hajaieua, bado, na aende kurudi nyumbani kwake, asife katika mapigano, mtu mwingine akiieua.[#5 Mose 16:18.]

⁶Au kama yuko mtu aliyepanda shamba la mizabibu naye hajalilimbua, na aende kurudi nyumbani kwake, asife katika mapigano, mtu mwingine akalilimbua.[#3 Mose 19:24-25; 5 Mose 28:30.]

⁷Au kama yuko mtu aliyeposa mwanamke, naye hajamwoa, na aende kurudi nyumbani kwake, asife katika mapigano, mwingine akamwoa.[#5 Mose 24:5.]

⁸Kisha mwenye amri na aendelee kusema na watu na kuwaambia: kama yuko mtu mwoga mwenye moyo uliolegea, na aende kurudi nyumbani kwake, asiiyeyushe mioyo ya ndugu zake kuwa, kama moyo wake ulivyo.[#Amu. 7:3.]

⁹Nao wenye amri watakapokwisha kusema na watu, na waweke wakuu wa vikosi kuwatangulia watu.

Watakavyoifanyizia miji ya adui.

¹⁰Utakapokaribia mji kupigana nao, kwanza uulize mapatano.[#4 Mose 21:21-22.]

¹¹Watakapokuitikia kwa kutaka mapatano, wakakufungulia malango, basi, watu wote watakaoonekana humo watakufanyizia kazi za nguvu na kukutumikia hivyo.

¹²Lakini watakapokataa kukuitikia mapatano wakitaka kupigana na wewe, basi, na uusonge.

¹³Bwana Mungu wako atakapoutia mikononi mwako, sharti uwapige wa kiume wote waliomo kwa ukali wa upanga.[#4 Mose 31:7,17.]

¹⁴Lakini wanawake na watoto na nyama wa kufuga nayo yote yatakayokuwa humo mjini na ujitwalie yote pia kuwa mateka yako ya humo mjini, nawe utaweza kula mateka ya adui zako, Bwana Mungu wako atakayokupa.

¹⁵Hivyo ndivyo, utakavyoifanyizia miji yote iliyoko mbali sana kutoka kwako, isiyo miongoni mwa miji ya wamizimu hawa wa huku.

¹⁶Lakini katika miji ya haya makabila, Bwana Mungu wako atakayokupa, iwe fungu lako mwenyewe, usiponye hata mmoja avutaye pumzi.[#Yos. 10:40.]

¹⁷Ila sharti uwatie mwiko kabisa wa kuwapo hao Wahiti na Waamori na Wakanaani na Waperizi na Wahiwi na Wayebusi, kama Bwana Mungu wako alivyokuagiza,[#5 Mose 7:1-2.]

¹⁸kusudi wasiwafundishe ninyi kuyafanya hayo matapisho yote, waliyoifanyizia miungu yao, ninyi mkamkosea Bwana Mungu wenu.

¹⁹Utakapokaa siku nyingi kwa kusonga mji na kupigana nao, upate kuuteka, usiiharibu miti yake na kuikata kwa shoka, ila ule matunda yao, kwa hiyo usiikate. Au miti ya shambani ni watu, uiendee kuisonga nayo usoni pako?

²⁰Hiyo miti tu, utakayoijua, ya kuwa siyo miti izaayo matunda, na uiharibu na kuikata, uitumie ya kuujengea boma mji huo unaopigana na wewe, hata uanguke.