Maagizo mengine ya kupenda watu na nyama na mengine.

¹Utakapoona, ng'ombe au kondoo wa ndugu yako wakipotea, usijifiche kuwa kama mtu asiyewaona, ila sharti uwarudishe kwake ndugu yako.[#2 Mose 23:4.]

²Kama huyo ndugu yako hakai karibu yako, usimjue, uwaweke nyumbani mwako, wakae kwako, mpaka ndugu yako awatafute; ndipo, utakapowarudisha kwake.

³Ndivyo ufanye hata utakapomwona punda wake au nguo zake au cho chote, ndugu yako atakachopotelewa nacho; wewe utakapokiona hutaweza kujificha kuwa kama mtu asiyeona.

⁴Utakapoona, punda wa ndugu yako au ng'ombe wake wakianguka njiani, usijifiche kuwa kama mtu asiyewaona, ila sharti umsaidie kuwainua.

⁵Mwanamke asivae cho chote cha mwanamume, wala mwanamume asivae nguo za kike! Kwani kila atakayefanya mambo kama hayo humchukiza Bwana Mungu wako.

⁶Utakapokuta kiota cha ndege njiani, kiko mbele yako katika mti au chini mchangani chenye makinda au chenye mayai, naye mama akiwaatamia makinda au mayai, usimchukue mama pamoja na watoto,

⁷ila umwache mama, ajiendee, uchukue watoto tu, upate kuona mema, nazo siku zako ziwe nyingi.[#3 Mose 22:28.]

⁸Utakapojenga nyumba mpya, sharti juu darini utengeneze kikingio, usifanye nyumbani mwako kuwa mwenye damu ya mtu, mtu akianguka huko.

⁹Shamba lako la mizabibu usilipande mbegu za namna mbili, lote pia lisiwe mali ya Patakatifu: mbegu, ulizozipanda, pamoja na mazao ya mizabibu.[#3 Mose 19:19.]

¹⁰Ukilima usitumie ng'ombe na punda pamoja.

¹¹Usivae nguo iliyofumwa kwa kuchanganya nyuzi za manyoya ya kondoo na za pamba pamoja.[#3 Mose 19:19.]

¹²Jifanyizie vishada penye pembe zote nne za nguo zako za kijifunika![#4 Mose 15:38.]

Mapatilizo ya ugoni.

¹³Itakuwa, mtu amwoe mkewe na kuingia kwake, kisha achukizwe naye.

¹⁴Kwa hiyo atamsingizia mambo ya uwongo, ampatie jina baya na kusema: Nimemwoa mwanamke huyu; lakini nilipoingia kwake sikumwona kuwa mwanamwali.

¹⁵Vitakapokuwa hivyo, babake na mamake yule msichana na wamchukue na kumpeleka kwa wazee wa mji huo langoni pake pamoja nayo yanayoweza kuujulisha uwanawali wake.

¹⁶Naye babake yule msichana na awaambie wazee: Nimempa mwanangu mtu huyu kuwa mkewe, kisha akachukizwa naye;

¹⁷akamsingizia mambo ya uwongo kwamba: Sikumwona kuwa mwanamwali. Lakini yatazameni haya yanayoujulisha uwanawali wa mwanangu! Kisha waikunjue hiyo nguo mbele ya wazee wa mji huo.

¹⁸Kwa hiyo wazee wa mji huo na wamchukue yule mwanamume, wamchape.

¹⁹Kisha wamtoze fedha mia, wampe babake msichana, kwa kuwa yule alimpatia msichana wa Kiisiraeli jina baya; kisha awe mkewe, asiweze kumpa ruhusa kwenda zake siku zake zote.[#5 Mose 22:29.]

²⁰Lakini lile neno likiwa la kweli, nayo yanayoujulisha uwanawali wake yasipoonekana,

²¹na wampeleke yule msichana hapo pa kuiingilia nyumba ya baba yake, hapo watu wa mji wote wampige mawe, hata afe, kwa kuwa alifanya ujinga mbaya kwao Waisiraeli wa kufanya ugoni nyumbani mwa baba yake. Hivyo ndivyo, utakavyouondoa ubaya huo katikati yako.[#1 Mose 34:7.]

²²Mtu atakapooneka, ya kuwa amelala na mwanamke aliyeolewa na mwingine, sharti wafe wote wawili, yule mwanamume aliyelala na mwanamke, naye mwanamke. Hivyo ndivyo, utakavyouondoa ubaya huo kwao Waisiraeli.[#3 Mose 20:10.]

²³Mwanamwali akiisha kuposwa na mtu, tena mwingine aliyemkuta mjini akilala naye,

²⁴sharti mwapeleke wote wawili langoni pa mji huo, mwapige mawe, hata wafe, yule kijana wa kike, kwa kuwa hakupiga kelele mjini, naye yule mwanamume, kwa kuwa amemkorofisha mchumba wa mwenzake. Hivyo ndivyo, utakavyouondoa ubaya huo katikati yako.

²⁵Lakini mwanamume atakapomkuta shambani kijana wa kike aliyekwisha kuposwa, akamkamata kwa nguvu, akalala naye, basi, huyu mwanamume aliyelala naye atakufa peke yake,

²⁶lakini yule kijana wa kike msimfanyizie neno, kwani yule kijana wa kike hakukosa neno lipasalo, auawe, kwa kuwa jambo hili ni sawasawa, kama mtu aliyemwinukia mwenziwe na kumwua, afe.

²⁷Kwani alimkuta shambani, naye yule kijana wa kike aliyekwisha kuposwa alipolia, hakuwako aliyemwokoa.

²⁸Mtu atakapoona mwanamwali asiyeposwa bado, akamshika na kulala naye, basi, wakionwa,

²⁹yule mwanamume aliyelala naye sharti ampe babake yule kijana wa kike fedha hamsini, kisha sharti awe mkewe, kwa kuwa amemkorofisha, naye hana ruhusa kumwacha siku zake zote.[#2 Mose 22:16.]

³⁰Mtu asimchukue mkewe baba yake, wala asiifunue pembe ya nguo zake![#3 Mose 18:8.]