Wasioweza nao wanaoweza kupokelewa katika mkutano wa Waisiraeli.

¹Katika mkutano wa Bwana asiingie mume aliyekomeshwa kuzaa kwa kupondwa au kwa kukatwa.

²Katika mkutano wa Bwana asiingie mwana wa ugoni wa ndugu na ndugu; ijapo awe wa kizazi chake cha kumi, asiingie katika mkutano wa Bwana.

³Mwamoni wala Mmoabu asiingie katika mkutano wa Bwana, ijapo awe wa kizazi chao cha kumi, kale na kale na wasiingie katika mkutano wa Bwana.

⁴Kwa kuwa hapo, mlipotoka Misri, hawakuwaendea na kuwapelekea ninyi wala chakula wala maji, tena walimkodisha Bileamu, mwanawe Beori, na kumtoa Petori ulioko Mesopotamia, aje, akuapize.[#4 Mose 22:5-6.]

⁵Lakini Bwana Mungu wako akakataa kumsikia Bileamu, akakugeuzia kiapizo chake kuwa mbaraka kwa hivyo, Bwana Mungu wako alivyokupenda.

⁶Nawe usiwatafutie utengemano wala mema yo yote siku zako zote kale na kale!

⁷Lakini Mwedomu usichukizwe naye; kwani ni ndugu yako. Wala Mmisri usichukizwe naye, kwani ulikuwa mgeni katika nchi yake.[#1 Mose 25:25-26.]

⁸Wana wao watakaozaliwa wa kizazi cha tatu wataweza kuingia katika mkutano wa Bwana.

Maagizo menginemengine.

⁹Utakapotoka makambini kuwaendea adui zako, jiangalie, usifanye kibaya cho chote!

¹⁰Atakapokuwako kwako mtu asiye mwenye kutakata kwa jambo lililompata na usiku, sharti atoke kwenda nje ya makambi, asiingie ndani ya makambi.[#3 Mose 15:16,18.]

¹¹Itakapokuwa saa ya jioni, ajiogeshe majini, kisha jua litakapokuchwa, aweza kuingia ndani ya makambi.

¹²Tena huko nje ya makambi uwe na mahali pa kuendea chooni.

¹³Namo katika vyombo vyako uwe na muo; napo utakapokwenda chooni huko nje, kwanza ufukue nao kishimo, upate kukaa, kisha uyafunike yaliyokutoka.

¹⁴Kwani Bwana Mungu wako hutembea katikati ya malango yako, akuponye na kuwatia adui zako mikononi mwako. Kwa hiyo makambi yako sharti yawe matakatifu, asione kwako cho chote kisichofaa, akarudi nyuma na kukuacha.[#3 Mose 26:12.]

¹⁵Mtumwa aliyekukimbilia, ajiponye mikononi mwa bwana wake, usimrudishe kwake yule bwana wake.

¹⁶Na akae kwako mahali, atakapojichagulia po pote penye malango yako patakapokuwa pema machoni pake, nawe usimsumbue.[#2 Mose 22:21.]

¹⁷Katika wana wa kike wa Kiisiraeli wasiwe wagoni wa Patakatifu, wala katika wana wa kiume wa Kiisiraeli wasiwe wagoni wa Patakatifu.[#3 Mose 19:29; 1 Fal. 14:24.]

¹⁸Wala usiingize Nyumbani mwa Bwana Mungu wako mshahara wa ugoni wala fedha za kuuza mbwa, ijapo ziwe za kiapo cho chote, kwani Bwana Mungu wako huzikataa zote mbili kwa kuchukizwa nazo.[#3 Mose 18:22; Ufu. 22:15.]

¹⁹Usimkopeshe ndugu yako, ujipatie faida ya fedha au faida ya chakula au faida ya cho chote, watu wanachokikopeshea faida.[#2 Mose 22:25; 3 Mose 25:36.]

²⁰Asiye wa Kiisiraeli na umkopeshe, ujipatie faida, lakini ndugu yako usimkopeshe, ujipatie faida, kusudi Bwana Mungu wako akubarikie kazi zote, mikono yako itakazozifanya katika hiyo nchi, utakayoiingia kuichukua, iwe yako.

²¹Utakapoapa kiapo cha kumpa Bwana Mungu wako cho chote usikawie kukitimiza, kwani Bwana Mungu wako atakitafuta kwako, nawe usipompa utakuwa kama mwenye kujikosesha.[#4 Mose 30:3.]

²²Lakini utakapoacha kuapa hivyo hukosi.

²³Lakini yaliyokwisha kutoka midomoni mwako sharti uyaangalie na kuyafanya, kama ulivyomwapia Bwana Mungu wako kwa kuyapenda mwenyewe uliyoyasema kwa kinywa chako.

²⁴Utakapoingia mizabibuni kwa mwenzako utaweza kula zabibu, kama roho yako itakavyopenda, hata ushibe, lakini usitie nyingine chomboni.

²⁵Utakapoingia penye ngano za mwenzako zilizoiva utaweza kukonyoa masuke kwa mkono wako, lakini usiyakatekate mabua ya mwenzako kwa mundu.[#Mat. 12:1.]