Cheti cha kuachana.

¹Mtu akichukua mwanamke na kumwoa, naye halafu asipompendeza machoni pake, kwa kuwa ameona kwake neno lisilofaa, na amwandikie cheti cha kuachana na kumpa mkononi mwake, kisha na amtume kwenda zake na kutoka nyumbani mwake.[#Mat. 5:31-32; 19:7.]

²Atakapokwisha kutoka nyumbani mwake, na aende zake kuwa mke wa mtu mwingine.

³Naye huyu mumewe wa pili atakapochukizwa naye, na amwandikie naye cheti cha kuachana na kumpa mkononi mwake, kisha naye na amtume kwenda zake na kutoka nyumbani mwake. Hata itakapokuwa, huyu mumewe wa pili aliyemchukua kuwa mkewe afe,

⁴bwana wake wa kwanza aliyemtuma kwenda kwao hana ruhusa kumchukua kuwa mkewe tena, akiisha kutiwa uchafu, kwani haya humchukiza Bwana. Kwa hiyo usiikoseshe hiyo nchi, Bwana Mungu wako atakayokupa, iwe fungu lako.

Maongozi menginemengine.

⁵Mtu akichukua mwanamke mpya asitoke kwenda vitani, wala asifanyishwe kazi yo yote nyingine, sharti mwaka mmoja aachwe tu kukaa nyumbani mwake, amfurahishe mkewe, aliyemchukua.[#5 Mose 20:7.]

⁶Mtu usimtoze mawe ya kusagia, wala hilo la juu tu kuwa rehani, kwani hivyo ungemtoza yule mtu roho kuwa rehani.

⁷Atakapoonekana mtu atakayemwiba mwingine kwao wana wa Isiraeli, amtumie kuwa mtumwa au amwuze, mwizi huyu hana budi kuuawa; ndivyo, utakavyouondoa ubaya huo katikati yako.[#2 Mose 21:16.]

⁸Jiangalie, utakapopatwa na pigo la ukoma! Yaangalie sana na kuyafanya yote sawasawa, kama watambikaji Walawi watakavyowafunza ninyi! Kama nilivyowaagiza wao, yaangalieni, myafanye vivyo hivyo![#3 Mose 13; 14:2.]

⁹Yakumbuke, Bwana Mungu wako aliyomfanyizia Miriamu njiani, mlipotoka Misri.[#4 Mose 12:10-15.]

¹⁰Utakapomkopesha mwenzako cho chote, alichokukopa, usiingie nyumbani mwake kumtoza roho yake,

¹¹ila usimame nje, yule mtu uliyemkopesha wewe akutolee rehani yake huko nje.

¹²Naye kama ni mtu mnyonge, usilale na rehani yake,

¹³ila umrudishie rehani yake, jua litakapokuchwa, apate kulala na nguo yake ya kujifunika, akubariki. Hii itakupatia wongofu machoni pake Bwana Mungu wako.[#2 Mose 22:26.]

¹⁴Usimkorofishe mtu wa kazi aliye mkiwa na mkosefu wa mali, kama ni wa ndugu zako au mmojawapo wa wageni watakaokaa katika nchi yako malangoni pako,[#3 Mose 19:13.]

¹⁵ila umpe mshahara wake siku iyo hiyo, jua lisije kuchwa, akiwa hajapata, kwani ni mkiwa, huutaka sana wa kujitunza, asimlilie Bwana kwa ajili yako, ukawa mwenye kujikosesha.

¹⁶Baba asiuawe kwa ajili ya mwana, wala mwana asiuawe kwa ajili ya baba, ila kila mtu auawe kwa ajili ya kosa lake mwenyewe.[#2 Fal. 14:6; Ez. 18:19-20.]

¹⁷Usipotoe shauri la mgeni wala la mwana aliyefiwa na wazazi, wala mjane usimtoze nguo yake kuwa rehani![#2 Mose 22:21-22.]

¹⁸Nawe kumbuka, ya kama ulikuwa mtumwa huko Misri, Bwana Mungu wako akakukomboa na kukutoa huko. Kwa sababu hii mimi ninakuagiza kuyafanya haya.[#5 Mose 16:12.]

¹⁹Utakapoyavuna mavuno yako katika shamba lako, ukasahau mganda mmoja shambani, usirudi kuuchukua, ila uache, uwe wa mgeni au wa mwana aliyefiwa na wazazi au wa mjane, Bwana Mungu wako akubarikie kazi zote za mikono yako.[#3 Mose 19:9-10.]

²⁰Utakapoupukutisha mchekele wako usiurudie tena kuyapukutisha nayo matawi yake, matunda yao na yawe ya mgeni au ya mwana aliyefiwa na wazazi au ya mjane.

²¹Utakapochuma mizabibuni kwako, usiirudie mizabibu kuiokoteza. Na iwe ya mgeni au ya mwana aliyefiwa na wazazi au ya mjane.

²²Nawe kumbuka, ya kama ulikuwa mtumwa katika nchi ya Misri! Kwa sababu hii mimi ninakuagiza kuyafanya haya.