Mawe ya kuwakumbushia Waisiraeli Maonyo.

¹Mose pamoja na wazee wa Waisiraeli wakawaagiza watu kwamba: Yaangalieni maagizo yote, mimi ninayowaagiza leo![#Yos. 8:30-35.]

²Siku hiyo, mtakapouvuka Yordani kwenda katika hiyo nchi, Bwana Mungu wako atakayokupa, ujisimikie mawe makubwa na kuyapaka chokaa!

³Kisha uyaandike maneno yote ya Maonyo haya utakapokwisha kuvuka, kusudi upate kuingia katika nchi hiyo, Bwana Mungu wako atakayokupa. Nayo ni nchi ichuruzikayo maziwa na asali, kama Bwana Mungu wa baba zako alivyokuambia.

⁴Hapo mtakapouvuka Yordani yasimikeni mlimani kwa Ebali mawe haya, ninayowaagiza leo, kisha myapake chokaa!

⁵Kisha umjengee huko Bwana Mungu wako mahali pa kumtambikia, napo pajengwe kwa mawe yasiyochongwa kwa chuma cho chote.[#2 Mose 20:25.]

⁶Hapo pa kumtambikia Bwana Mungu wako sharti upajenge kwa mawe yaliyo mazima, kisha umtolee Bwana Mungu wako juu yake ng'ombe za tambiko za kuteketezwa nzima.

⁷Uchinje nazo ng'ombe za tambiko za shukrani, upate kula huko na kumfurahia Bwana Mungu wako.[#5 Mose 12:7.]

⁸Nayo yale mawe uyaandike maneno yote ya haya Maonyo na kuyachora vema!

⁹Kisha Mose na watambikaji Walawi wakawaambia Waisiraeli wote kwamba: Nyamaza kimya, Isiraeli, upate kusikia! Leo hivi umepata kuwa ukoo wake Bwana Mungu wako.[#5 Mose 26:18-19.]

¹⁰Kwa hiyo isikie sauti ya Bwana Mungu wako, uyafanye maagizo yake na maongozi yake, mimi ninayokuagiza leo!

Maapizo ya mlimani kwa Ebali.

¹¹Siku hiyo Mose akawaagiza watu kwamba:

¹²Hawa na waende kusimama mlimani kwa Gerizimu na kuwabariki hawa watu, mtakapokwisha kuuvuka Yordani: Simeoni na Lawi na Yuda na Isakari na Yosefu na Benyamini.[#5 Mose 11:29.]

¹³Nao hao na waende kusimama mlimani kwa Ebali na kuapiza: Rubeni na Gadi na Aseri na Zebuluni na Dani na Nafutali.

¹⁴Kisha Walawi na waanze kusema na kuwaambia watu wote wa Waisiraeli kwa kupaza sauti:

¹⁵Na awe ameapizwa mtu atakayefanya kinyago cha kuchonga au cha kuyeyusha na kuvisimamisha na kufichaficha! Kwani Bwana huchukizwa navyo, navyo ni kazi za mikono ya fundi. Nao watu wote na waitikie: Amin![#2 Mose 20:23; 34:17.]

¹⁶Na awe ameapizwa atakayembeza baba yake na mama yake! Nao watu wote na waitikie: Amin![#2 Mose 21:17.]

¹⁷Na awe ameapizwa atakayeusogeza mpaka wa mwenzake! Nao watu wote na waitikie: Amin![#5 Mose 19:14.]

¹⁸Na awe ameapizwa atakayempoteza kipofu njiani! Nao watu wote na waitikie: Amin![#3 Mose 19:14.]

¹⁹Na awe ameapizwa atakayepotoa shauri la mgeni au la mwana aliyefiwa na wazazi au la mjane! Nao watu wote na waitikie: Amin![#2 Mose 22:21-22.]

²⁰Na awe ameapizwa atakayelala na mkewe baba yake! Kwani huko atazifunua nguo za baba yake. Nao watu wote na waitikie: Amin![#3 Mose 18:8.]

²¹Na awe ameapizwa atakayelala na nyama wo wote! Nao watu wote na waitikie: Amin![#2 Mose 22:19.]

²²Na awe ameapizwa atakayelala na umbu lake aliye binti baba yake au binti mama yake! Nao watu wote na waitikie: Amin![#3 Mose 18:9,11.]

²³Na awe ameapizwa atakayelala na mkwewe! Nao watu wote na waitikie: Amin![#3 Mose 18:17.]

²⁴Na awe ameapizwa atakayempiga mwenzake mahali panapojificha! Nao watu wote na waititike: Amin![#4 Mose 35:20.]

²⁵Na awe ameapizwa atakayechukua mapenyezo, ampige mtu na kuimwaga damu yake asiyekosa! Nao watu wote na waitikie: Amin![#2 Mose 23:8; 5 Mose 16:19.]

²⁶Na awe ameapizwa asiyeyasimamisha maneno ya Maonyo haya na kuyafanya! Nao watu wote na waitikie: Amin![#Gal. 3:10.]