Mose anawafanyia Waisiraeli mara ya pili Agano la Mungu.

¹Haya ndiyo maneno ya Agano, Bwana aliyomwagiza Mose kulifanya na wana wa Isiraeli katika nchi ya Moabu, tena liko Agano lile, alilolifanya nao mlimani kwa Horebu.[#5 Mose 5:2.]

²Mose akawaita Waisiraeli wote, akawaambia: Ninyi mliona yote, Bwana aliyomfanyizia Farao, nao watumishi wake wote na wenyeji wote wa nchi yake machoni penu katika nchi ya Misri.[#2 Mose 19:4.]

³Yale majaribu makubwa macho yako yaliyaona kuwa vielekezo na vioja vikubwa.

⁴Lakini mpaka siku hii ya leo Bwana hajawapa ninyi mioyo inayovitambua, wala macho yanayoona, wala masikio yanayosikia.[#5 Mose 5:29; Yes. 6:9-10.]

⁵Nayo hiyo miaka 40, niliyowatembeza nyikani, nguo zenu hazikuchakaa miilini penu,[#5 Mose 8:2,4.]

⁶wala viatu vyako havikuchakaa miguuni pako; hamkula mikate, wala hamkunywa mvinyo au kileo kingine, mpate kujua, ya kuwa mimi ni Bwana Mungu wenu.

⁷Mlipofika mahali hapa, Sihoni, mfalme wa Hesiboni, na Ogi, mfalme wa Basani, walitaka kupigana na sisi, nasi tukawapiga,[#4 Mose 21:21-35.]

⁸tukazichukua nchi zao, tukawapa wao Warubeni na Wagadi nao wa nusu la shina la Manase, ziwe mafungu yao.[#4 Mose 32.]

⁹Sasa yaangalieni maneno ya Agano hili na kuyafanya, mpate kufanikiwa mambo yote, mtakayoyafanya.

¹⁰Leo mnasimama nyote mbele ya Bwana Mungu wenu, walio vichwa vyenu vya mashina yenu, wazee wenu na wakuu wenu, nanyi nyote mlio waume wa Kiisiraeli,

¹¹wana wenu na wake zenu na mgeni wako aliye makambini mwako naye mchanja kuni zako naye mchota maji yako.

¹²Huku ni kwamba, upate kuandamana nalo Agano la Bwana Mungu wako, analolifanya leo na wewe, nacho kiapo chake.

¹³Naye anakuweka leo kuwa ukoo wake, naye atakuwa Mungu wako, kama alivyokuambia, kama alivyowaapia nao baba zako Aburahamu na Isaka na Yakobo.

¹⁴Lakini si ninyi peke yenu, ninaofanya nao Agano hili na kuwaapia kiapo hiki,[#5 Mose 5:3.]

¹⁵ila ni wao wanaosimama leo hapa pamoja na sisi mbele ya Bwana Mungu wetu, tena ni wao nao wasiokuwapo leo hapa pamoja na sisi.

¹⁶Kwani ninyi mnajua wenyewe, jinsi tulivyokaa katika nchi ya Misri, tena tulivyopita katikati ya wamizimu, ambao mlipita kwao,

¹⁷mkayaona matapisho yao na vinyago vyao, walivyokuwa navyo, vilivyo miti tu na mawe au fedha na dhahabu.

¹⁸Lakini kwenu asiwe mtu mume wala mke wala mlango wala shina watakaoigeuza mioyo yao, wamwache Bwana Mungu wetu wakienda kuitumikia miungu ya hao wamizimu, lisichipuke kwenu shina litakalozaa majani yenye sumu na uchungu kama wa nyongo.[#Ebr. 12:15.]

¹⁹Mtu aliye hivyo atakapoyasikia maneno ya kiapizo hiki asijibariki mwenyewe moyoni mwake kwamba: Nitapata kutengemana, ijapo niendelee kuufuata ushupavu wa moyo wangu, kusudi niyapokonye mabichi na makavu.

²⁰Aliye hivyo Bwana atakataa kabisa kumwondolea mabaya, ila hapo ndipo, makali ya Bwana pamoja na wivu wake yatakapowaka moto wenye moshi kwa kumkasirikia huyo mtu, navyo viapizo vyote vilivyoandikwa humu kitabuni vitamkalia, naye Bwana atalifuta jina lake chini ya mbingu.[#5 Mose 28:15-68.]

²¹Tena Bwana atamtenga na kumtoa katika mashina yote ya Isiraeli, apatwe na mabaya, vimtimilikie viapizo vyote vya Agano hili lililoandikwa katika kitabu cha Maonyo haya.

²²Navyo vizazi vijavyo nyuma, ndio wana wenu watakaotokea nyuma yenu, nao wageni watakaotoka katika nchi ya mbali watayaona hayo mapigo ya nchi hii nayo magonjwa, Bwana aliyoiuguza;

²³kwani nchi yake nzima ataiteketeza kwa mawe ya kiberiti na kwa chumvi, isiweze kupandwa wala kuotesha kijiti, wala majani yo yote yasiweze kumea huko, mwangamizo wake uwe kama ule wa Sodomu na wa Gomora, nao wa Adima na wa Seboimu, Bwana aliyoiangamiza kwa makali yake yaliyowaka moto.[#1 Mose 19:24; Hos. 11:8.]

²⁴Watakapoviona wamizimu wote watauliza: Bwana akiifanyizia nchi hii mambo kama haya, ni kwa sababu gani? Makali makuu yawakayo moto hivyo yako na maana gani?

²⁵Ndipo, watu watakapowaambia: Ni kwa kuwa waliliacha Agano la Bwana Mungu wa baba zao, alilolifanya nao alipowatoa katika nchi ya Misri;

²⁶wakaenda zao, wakatumikia miungu mingine na kuitambikia, nayo ni miungu, wasiyoijua, isiyowagawia kitu.

²⁷Ndipo, makali ya Bwana yalipoiwakia nchi hii, akailetea viapizo vyote vilivyoandikwa humu kitabuni.

²⁸Bwana akawang'oa katika nchi yao kwa makali yaliyowaka moto na kwa machafuko makubwa, akawatupa, wajiendee katika nchi nyingine, kama inavyoelekea leo.

²⁹Mambo yaliyofunikwa ni yake Bwana Mungu wenu; lakini yaliyofunuliwa ni yetu sisi na ya wana wetu, tuyafanye maneno yote ya Maonyo haya.[#5 Mose 32:34; Sh. 147:19-20.]