Wimbo wa Mose.

¹Yasikilizeni, ninyi mbingu, nitakayoyasema!

Nawe nchi, yasikilize maneno ya kinywa changu!

²Mafunzo yangu na yatiririke kama maji ya mvua,

maneno yangu na yadondoke kama umande,,

kama manyunyu yanayonyunyiziwa majani mabichi,

kama matone ya mvua yanayotonea vijiti!

³Kwani nitalitangaza Jina la Bwana, nanyi mpeni ukuu aliye Mungu wetu!

⁴Ni mwamba, matendo yake humalizika, kwani njia zake zote huendelea sawa, ni Mungu mtegemevu asiye na upotovu, ni mwenye wongofu, tena ni mnyofu.

⁵Wasio watoto wake kwa kuwa wachafu, humfanyia mabaya, ndio kizazi chenye upotovu, hupenda kubisha.[#Yes. 1:2-4.]

⁶Mbona mnamlipa Bwana hivyo? M wapumbavu wasiojua maana? Kumbe siye baba yako aliyekununua? Siye aliyekufanya na kukutengeneza vema?[#2 Mose 4:22; Yes. 63:16; Mal. 1:6.]

⁷Zikumbuke siku za kale, uitambue miaka yao vizazi vilivyopita! Mwulize baba yako! Atakusimulia; waulize wazee! Nao watakuambia.[#Sh. 77:12.]

⁸Alioko huko juu alipoyagawia mataifa mafungu yao ya nchi, alipowatawanya wana wa watu, ndipo, alipoiweka mipaka ya makabila kwa hesabu yao wana wa Isiraeli.[#1 Mose 11:8; Tume. 17:26.]

⁹Kwani fungu lake Bwana ni huu ukoo wake, aliojipatia kwa kura kuwa wake, ndio wa Yakobo.

¹⁰Alimwona katika nchi ya nyikani isiyo ya watu, nayo ilikuwa inatisha kwa ngurumo za nyama wa jangwani, akamkingia pande zote na kumjengea; kama ni mboni ya jicho lake, ndivyo, alivyomlinda.[#Sh. 17:8; Zak. 2:8.]

¹¹Alikuwa kama tai akitaka kuwainua hao wanawe kiotani na kupapatika juu yao hayo makinda yake; ndivyo, alivyoyakunjua mabawa yake, amchukue, ndivyo, alivyompeleka, akizikalia mbawa zake.[#2 Mose 19:4; Sh. 36:8.]

¹²Yeye Bwana peke yake ndiye aliyemwongoza, mungu mwingine wa ugenini hakuwa naye.

¹³Akampitisha juu ya nchi akimlisha mazao ya mashambani, akamnyonyesha asali ya ngomeni na mafuta ya mwambani[#Sh. 81:17.]

¹⁴na siagi za ng'ombe na maziwa ya kondoo, nayo mafuta yao wana kondoo, nayo ya madume ya kondoo wa Basani, nayo ya madume ya mbuzi, nayo mafuta menginemengine kama ya kiini cha ngano, ukanywa nazo mvinyo nyekundu zilizo damu za zabibu.

¹⁵Lakini Yeshuruni* aliponona akapiga mateke kwa kunona na kunenepa na kwa kushiba sana; ndipo, yeye alipomtupa Mungu, naye ndiye aliyemfanya; akambeza yule aliyekuwa mwamba wa wokovu wake.[#Yes. 44:2; 5 Mose 31:20.]

¹⁶Kwa kufuata miungu migeni wakamchokoza, kwa kufanya yaliyomchukiza wakamkasirisha.

¹⁷Ng'ombe za tambiko wakaitolea nayo mizimu isiyo Mungu, hata miungu mingine, wasiyoijua; kwa kuzushwa siku hizo za karibu ilikuwa mipya, nao baba zenu walikuwa hawakuipa macheo.

¹⁸Aliyekuzaa ukamwazia kuwa si kitu, naye ni mwamba; ukamsahau Mungu, ambaye ulizaliwa naye.

¹⁹Bwana alipoyaona akawatupa kwa kuwakasirikia wanawe wa kiume na wa kike.

²⁰Akasema: Na niufiche uso wangu, wasiuone, mimi niuone mwisho wao, jinsi utakavyokuwa, kwani ndio kizazi chenye mapotovu, ndio wana wasiotegemeka.

²¹wamenichokoza kwa kufuata isiyo miungu, wakanikasirisha kwa kufanya yasiyo na maana, kwa hiyo nami na niwachokoze nikiwaletea watu wasio watu, na niwakasirishe nikiwaletea taifa la watu wasiojua maana.[#Yer. 2:11; Rom. 10:19.]

²²Kwani uko moto uliowashwa na makali yangu, nao ukachoma na kufika hata kuzimuni kuliko chini ya nchi, ukaila nchi na mazao yake, nayo misingi ya milima ukaiunguza.

²³Nitawapatia mabaya mengi, yawe chungu zima, nitaimaliza mishale yangu kwa kuwapiga.[#Sh. 91:5.]

²⁴Itakapokuwa, wazimie roho kwa njaa tu, tena itakapokuwa, waliwe na moto ulio wa homa kali, itakapokuwa, wapatwe na magonjwa yenye uchungu, ndipo, nitakapotuma kwao nyama wenye meno makali na nyoka wenye sumu watambaao uvumbini.

²⁵Upanga utawaua wana huko nje, namo nyumbani mwao yatakuwa mastusho; ndipo, watakapokufa vijana wa kiume na wa kike, hata wachanga pamoja na wazee.

²⁶Ningesema: Na niwapeperushe, niwakomeshe watu, wasiwakumbuke tena.

²⁷Lakini ninayaogopa matata ya adui, wale wapingani wao wasibishe kwamba: Mikono yetu ndiyo inayopasa kutukuzwa, kwani aliyeyafanya haya yote siye Bwana.

²⁸Kwani ndio taifa la watu waliopotelewa na akili, kwa hiyo hakuna utambuzi unaooneka kwao.[#Yes. 27:11; Yer. 4:22.]

²⁹Kama wangekuwa werevu wa kweli, wangeijua maana yao haya, wangeutambua nao mwisho utakaowapata wenyewe.

³⁰Inawezekanaje, mtu mmoja akifukuza watu elfu, au wawili wakikimbiza watu maelfu kumi? Sio kwa sababu yule aliye mwamba wao amekwisha kuwauza? Sio kwa sababu Bwana amewatia mikononi mwao wengine?[#3 Mose 26:8,36,37.]

³¹Kwani mwamba wao wale si kama mwamba wetu, nao adui zetu wenyewe hawana budi kuviitikia.

³²Kwani mizabibu yao ni ileile ya Sodomu, nayo mashamba yao ni yaleyale ya Gomora, maana zabibu zao ni zenye sumu, navyo vichala vyao ni vyenye uchungu.[#Yes. 1:10.]

³³Kwa kuwa uchungu wa majoka nvinyo zao huwasha; kama sumu kali za pili zilivyo, ndivyo, zilivyo nazo.

³⁴Kumbe haya hayakuwekwa na kufungiwa kwangu? Kumbe hayamo katika vilimbiko vyangu kwa kutiwa muhuri?[#5 Mose 29:29.]

³⁵Lipizi ni langu mimi, ni mimi nitakayelipisha. Miguu yao itakapoteleza, ndipo, litakapokuwa, kwani siku ya mwangamizo wao iko karibu, nayo yatakayowapata yanapiga mbio kufika upesi.[#Sh. 94:1; Rom. 12:19; Ebr. 10:30.]

³⁶Kwani Bwana atawaamulia walio ukoo wake, walio watumishi wake ndio, atakaowahurumia; atakapoziona nguvu za mikono yao kuwa zimekwisha kabisa, atakapoona, ya kama hakuna tena mwenye nguvu kwao wala kwao waliofungwa, wala kwao waliofunguliwa:[#1 Fal. 14:10.]

³⁷ndipo, atakapouliza: Miungu yao iko wapi? Uko wapi mwamba wao, waliouegemea?

³⁸Wako wapi walioyala mafuta ya ng'ombe zao za tambiko? Wako wapi waliozinywa mvinyo za vinywaji vyao vya tambiko? Na wainuke, wawasaidie ninyi wakija kwenu kuwakingia![#Amu. 10:14.]

³⁹Tazameni sasa: Mimi kama nilivyokuwa, ndivyo, nilivyo, hakuna Mungu tena kuliko mimi! Mimi ni mwenye kuua na mwenye kurudisha uzimani, ni mwenye kupiga kidonda, nami ni mwenye kuponya, hakuna awezaye kuokoa mkononi mwangu.[#2 Mose 15:26; 5 Mose 4:35; 1 Sam. 2:6; Iy. 5:18; Yes. 45:5; Hos. 6:1-2.]

⁴⁰Kwani nauinua mkono wangu kuuelekeza mbinguni kwamba: Hivyo nilivyo mwenye uzima kale na kale,[#2 Mose 6:8; Ez. 33:11.]

⁴¹nitakapounoa upanga wangu ulio wenye umeme, nao mkono wangu utakaposhika mapatilizo, ndipo, nitakapowalipiza wapingani wangu na kuwalipisha wachukivu wangu.

⁴²Nitailewesha mishale yangu, izidi kunywa damu, nao upanga wangu utakula nyama, ni damu zao watakaouawa nazo zao watakaotekwa, ni nyama zao walio vichwa na watawalaji wa adui.

⁴³Shangilieni, enyi wamizimu, pamoja nao walio ukoo wake! Kwani damu za watumishi wake huzilipizia kisasi, huwalipiza wapingani wake, awapatie upozi walio wenyeji wa nchi yake, walio ukoo wake.[#Rom. 15:10.]

⁴⁴Mose akenda, akayasema maneno yote ya wimbo huu masikioni pa watu, yeye na Yosua, mwana wa Nuni.

⁴⁵Mose alipokwisha kuwaambia Waisiraeli wote maneno haya yote,

⁴⁶akawaambia: Yawekeni mioyoni mwenu maneno haya yote, mimi ninayowashuhudia leo, nanyi mwaagize wana wenu, wayaangalie na kuyafanya maneno yote ya Maonyo haya![#5 Mose 6:7.]

⁴⁷Kwani hili si neno la kusimuliana tu ninyi kwa ninyi, ila ni uzima wenu. Nanyi mtakapolifanya neno hili, siku zenu zitakuwa nyingi za kukaa katika hiyo nchi, mnayoivukia Yordani, mwichukue, iwe yenu.[#3 Mose 18:5.]

Mose anafumbuliwa na Bwana, atakapokufa.

⁴⁸Siku iyo hiyo Bwana akamwambia Mose kwamba:

⁴⁹Kwenye milima hii ya Abarimu uupande huo mlima wa Nebo ulioko katika nchi ya Wamoabu, unaoelekea Yeriko, uitazame nchi ya Kanaani, mimi nitakayowapa wana wa Isiraeli, iwe yao.[#4 Mose 27:12; 33:48.]

⁵⁰Utakapokwisha kuupanda mlima huo utakufa, uchukuliwe kwenda kwao walio ukoo wako, kama kaka yako Haroni alivyokufa mlimani kwa Hori na kuchukuliwa kwenda kwao walio ukoo wake.[#4 Mose 20:23-29.]

⁵¹Kwani mlikataa kunitii katikati ya wana wa Isiraeli kwenye Maji ya Magomvi kule Kadesi katika nyika ya Sini, mkaacha kunitakasa katikati ya wana wa Isiraeli.[#4 Mose 20:12-13.]

⁵²Kwa sababu hii utaiona hiyo nchi mbele yako, lakini hutaingia katika hiyo nchi, nitakayowapa wana wa Isiraeli.[#5 Mose 34:4.]