Mose anawahimiza Waisiraeli, wayaangalie Maonyo.

¹Sasa Isiraeli, yasikilize maongozi na maamuzi, nitakayowafundisha, myafanye, mpate kupona na kuiingia na kuichukua hiyo nchi, Bwana Mungu wa baba zenu atakayowapa, iwe yenu.

²Hayo, mimi nitakayowaagiza, msiyaongeze, wala msiyapunguze, ila yaangalieni haya maagizo ya Bwana Mungu, mimi nitakayowaagiza ninyi![#5 Mose 12:32; Fano. 30:6; Ufu. 22:18-19.]

³Macho yenu yameyaona, Bwana aliyomfanyizia Baali-Peori, kwani wao wote waliomfuata Baali-Peori amewaangamiza Bwana Mungu wako, watoweke kwako.[#4 Mose 25:3-9.]

⁴Lakini ninyi mliogandamana na Bwana Mungu wenu mnaishi nyote hata leo.

⁵Tazameni, nimewafundisha ninyi maongozi na maamuzi, kama Bwana Mungu wangu alivyoniagiza; yafanyeni yayo hayo katika nchi hiyo, mtakayoiingia kuichukua, iwe yenu.

⁶Yaangalieni, myafanye! Kwani huo utakuwa werevu wenu wa kweli na utambuzi wenu machoni pao yale makabila watakayoyasikia hayo maongozi yenu yote, waseme; Kumbe watu hawa ni werevu wa kweli na watambuzi, kwa hiyo ni kabila kubwa.

⁷Kwani liko taifa gani kubwa, miungu yake inalolikalia karibu hivi, kama Bwana Mungu wetu alivyo karibu kwetu po pote, tunapomlilia?[#5 Mose 33:29; 2 Sam. 7:23.]

⁸Tena liko taifa gani kubwa lililo lenye maongozi na maamuzi yaongokayo kama haya maonyo yote, mimi ninayowatolea ninyi leo masikioni penu?

⁹Jiangalie tu na kuiangalia roho yako, usiyasahau kabisa hayo mambo, macho yako yaliyoyaona, yasiondoke moyoni mwako siku zote, utakazokuwapo. Nawe uyajulishe kwa wanao na kwa wana wa wanao![#Sh. 103:2.]

¹⁰Wakumbushe mambo ya siku ile, uliposimama mbele ya Bwana Mungu wako kule Horebu, Bwana aliponiambia: Kusanya kwangu watu hawa, niseme maneno yangu masikioni mwao, wajifunze kunicha siku zote, watakazokuwapo katika nchi, kisha wawafundishe wana wao nao.[#2 Mose 19:17; 5 Mose 6:7; 11:19.]

¹¹Napo, mlipomkaribia na kusimama mlimani chini, mlima ukawaka moto mpaka juu ndani ya mbinguni, kukawa na giza na mawingu meusi kabisa.

¹²Ndipo, Bwana aliposema nanyi toka motoni, nanyi mkazisikia sauti za maneno yake, lakini hakuna mwenye mwili, mliyemwona, ni kuzisikia hizo sauti tu.

¹³Ndivyo, alivyowatangazia Agano lake, alilowaagiza kulifanya, yale maagizo kumi, kisha akayaandika katika mbao mbili za mawe.[#2 Mose 31:18.]

¹⁴Mimi nami Bwana akaniagiza siku hizo kuwafundisha maongozi na maamuzi, myafanye katika hiyo nchi, mnayotaka kuivukia, mwichukue, iwe yenu.

¹⁵Ziangalieni sana roho zenu! Kwani hamkuona mwenye mwili ye yote siku hiyo, Bwana aliposema nanyi kule Horebu toka motoni.

¹⁶Msijiponze na kujifanyizia kinyago cho chote cha kuchongwa, wala cha kuyeyushwa, wala cha kuchorwa maweni kwa mfano wa mtu mume au mke,[#2 Mose 20:4.]

¹⁷wala kwa mfano wo wote wa nyama wa huku nchini, wala kwa mfano wo wote wa ndege mwenye mabawa ya kurukia angani,

¹⁸wala kwa mfano wo wote wa dudu atambaaye mchangani, wala kwa mfano wo wote wa samaki wa majini chini ya nchi!

¹⁹Wala usiyainue macho yako na kuyaelekeza mbinguni, ulitazame jua na mwezi na nyota, hivyo vikosi vya mbinguni, usijaribiwe kuviangukia na kuvitumikia, kwa kuwa Bwana Mungu wako aliviwekea makabila yote pia yaliyoko chini ya mbingu yote nzima.[#5 Mose 17:3.]

²⁰Lakini ninyi Bwana aliwachukua na kuwatoa katika tanuru ya kuyeyushia vyuma, ndio Misri, mwe kabila llilo lake yeye mwenyewe, kama inavyoelekea leo.[#2 Mose 19:5-6.]

²¹Kisha Bwana akanikasiria mimi kwa ajili yenu, akaapa, kwamba nisiuvuke Yordani, nisiingie hiyo nchi njema, Bwana Mungu wako atakayokupa wewe, iwe fungu lako mwenyewe.[#5 Mose 3:26.]

²²Kwa hiyo mimi nitakufa katika nchi hii pasipo kuuvuka Yordani; lakini ninyi mtauvuka, mwichukue hiyo nchi njema, iwe yenu.

²³Jiangalieni, msilisahau Agano la Bwana Mungu wenu, alilolifanya nanyi, msijifanyizie kinyago cho chote cha kuchongwa, wala cha kuyeyushwa kwa mfano wo wote, Bwana Mungu wako aliokukataza.

²⁴Kwani Bwana Mungu wako ni moto ulao, yeye ni Mungu mwenye wivu.[#2 Mose 20:5; 5 Mose 9:3; Yes. 10:17; Ebr. 12:29.]

²⁵Mtakapozaa wana na wana wa wana, mwe wazee katika nchi hiyo, msijiponze na kujifanyizia kinyago cho chote cha kuchongwa, wala cha kuyeyushwa, kwani hivyo mtafanya yaliyo mabaya machoni pake Bwana Mungu wenu, mmkasirishe.

²⁶Kwa hiyo nazitaja mbingu na nchi, ziwashuhudie leo hivi, ya kama hivyo mtaangamia upesi na kutoweka katika nchi hiyo, mnayovukia Yordani, mje kuichukua, iwe yenu, hamtakaa siku nyingi ndani yake, ila mtaangamizwa kabisa.[#5 Mose 30:19; 31:28; 32:1.]

²⁷Yeye Bwana atawatawanya katika makabila mengine, msalie wachache wanaohesabika upesi kwao wamizimu, Bwana atakakowapeleka.

²⁸Huko ndiko, mtakakotumikia miungu iliyo kazi za mikono ya watu, iliyo miti na mawe, isiyoona, isiyosikia, isiyokula, isiyonusa.[#5 Mose 28:36; Sh. 115:4-7.]

²⁹Lakini mtakapomtafuta huko Bwana Mungu wenu mtamwona, ukimtafuta kwa moyo wako wote na kwa roho yako yote.[#Sh. 27:8; Yer. 29:13-14.]

³⁰Utakaposongeka kwa kupatwa na mambo hayo yote siku zile za mwisho, ndipo, utakaporudi kwa Bwana Mungu wako, uzisikilize sauti zake.[#3 Mose 26:40.]

³¹Kwani Bwama Mungu wako ni Mungu mwenye huruma, hatakuacha kabisa, wala hatakuangamiza kabisa, wala hatalisahau Agano, alilowaapia baba zako.

³²Uliza tu mambo ya siku za kale zilizokuwa mbele yako tangu siku ile, Mungu alipomwumba Adamu na kumweka katika nchi, tena chunguza tangu mwisho wa huku wa mbingu hata mwisho wa huko wa mbingu, kama lilifanyika, au kama lilisikilika jambo kubwa kama hili.

³³Wako watu walioisikia sauti ya Mungu, akisema toka motoni, kama wewe ulivyoisikia, kisha wawepo wenye uzima?[#2 Mose 20:1,19.]

³⁴Au Mungu alijaribu hata penginepo kuja kujichukulia taifa moja katikati ya mataifa mengine kwa majaribu na kwa vielekezo na kwa vioja na kwa kupiga vita na kwa kutoa nguvu za kiganja chake na kwa kuukunjua mkono wake na kwa matisho makuu yanayoogopesha, kama Bwana Mungu wenu alivyowafanyizia ninyi kule Misri machoni pako?

³⁵Wewe ulionyeshwa hayo, upate kujua, ya kuwa Bwana ni Mungu, hakuna mwingine tena, asipokuwa yeye peke yake.[#5 Mose 32:39.]

³⁶Uliisikia sauti yake, ikitoka mbinguni, ipate kukuonya, nako huku nchini alikuonyesha moto wake mkubwa, nako kutoka humo motoni ukaisikia sauti yake.

³⁷Kwa kuwa aliwapenda baba zako, akawachagua halafu wao wa uzao wao, akakutoa Misri kwa nguvu zake kuu akikuongoza kwa uso wake,[#2 Mose 33:14.]

³⁸afukuze mbele yako mataifa makubwa yenye nguvu za kukushinda wewe, akuingize kwao na kukupa nchi yao, iwe yako, kama inavyoelekea leo.

³⁹siku hii ya leo yajue na kuyaweka moyoni mwako, ya kuwa Bwana ndiye Mungu mbinguni juu na huku nchini chini, hakuna mwingine tena.

⁴⁰Kwa hiyo yaangalieni maongozi yake na maagizo yake, mimi ninayokuagiza leo, upate kuona mema wewe na wanao watakaokuwapo nyuma yako, siku zako zipate kuwa nyingi katika nchi, akupayo Bwana Mungu wako, iwe yako siku zote.

Miji mitatu ya kuikimbilia.

⁴¹Kisha Mose akatenga miji mitatu ng'ambo ya Yordani ya maawioni kwa jua,[#4 Mose 35:6-29; 5 Mose 19:2-13.]

⁴²mtu apate kuikimbilia, kama amemwua mwenziwe pasipo kujua, naye alipokuwa si mchukivu wake tangu zamani, basi, atakapokimbilia mmojawapo hiyo miji, awe amepona.

⁴³Nayo ni hii: Beseri wa nyikani katika nchi ya tambarare kwa Warubeni na Ramoti wa Gileadi kwa Wagadi na Golani wa Basani kwa Wamanase.

⁴⁴Haya ndiyo maonyo, Mose aliyowawekea wana wa Isiraeli;

⁴⁵tena ndiyo mashuhuda na maongozi na maamuzi, Mose aliyowaambia wana wa Isiraeli, walipotoka Misri.

⁴⁶Aliyasema ng'ambo ya huku ya Yordani katika bonde linaloelekea Beti-Peori katika nchi ya Sihoni, mfalme wa Waamori, aliyekaa Hesiboni, Mose na wana wa Isiraeli waliyempiga walipotoka Misri.

⁴⁷Nayo nchi yake wakaichukua, iwe yao, hata nchi ya Ogi, mfalme wa Basani; hawa wafalme wawili wa Waamori ndio waliokaa ng'ambo ya Yordani ya maawioni kwa jua,

⁴⁸toka Aroeri ulioko ukingoni kwenye kijito cha Arnoni mpaka milimani kwa Sioni, ndio Hermoni,[#5 Mose 3:8-9.]

⁴⁹nayo nyika yote ya ng'ambo ya Yordani ya maawioni kwa jua mpaka kwenye bahari ya nyikani chini ya matelemko ya Pisiga.